އަމީނީމަގުގެ ދެވަނަ ސެގްމެންޓު މަރާމާތު ކުރުމުގެ މަސައްކަތް ކުރިއަށް ގެންދަން އެ ސަރަހައްދު ބަންދުކޮށް ޓްރެފިކަށް ގެންނަ ބަދަލުތައް ދިވެހި ފުލުހުންގެ ޚިދުމަތުން ހާމަކޮށްފިއެވެ.
މި ސަރަހައްދުގެ ޓްރެފިކަށް އަންނަ ބަދަލު ހާމަކޮށް ފުލުހުން ނެރުނު ބަޔާނުގައި ވިދާޅުވީ، އާދީއްތަ ދުވަހު އަމީނީ މަގުގެ ދެވަނަ ސެގްމެންޓުގެ މަސައްކަތް ފެށުމަށް ހަމަޖެހިފައިވާތީ މިރޭ ދަންވަރު 12:00 އިން ފެށިގެން އެ ސަރަހައްދުގެ ޓްރެފިކް ފްލޯއަށް ބަދަލު ގެންނަން ނިންމާފައިވާ ކަމަށެވެ. އަދި މަގު މަރާމާތުކުރާ ސަރަހައްދުގައި ޕާކް ކޮށްފައިވާ އުޅަނދުތައް ނެގުމަށް ފުލުހުން ވަނީ އަންގާފައެވެ.
ފުލުހުން އާންމުކޮށްފައިވާ ޗާޓުން އެނގޭގޮތުގައި އަމީނީ މަގުގެ މަރާމާތު މަސައްކަތަށް ބަންދުކުރަން ނިންމާފައިވަނީ، އިއްޒުއްދީން މަގުން ފެށިގެން ކޯރުކެނޑި ހިނގުމާއި ހަމަށެވެ. މި ސަރަހައްދު ބަންދުކޮށްފައިވާ ވަގުތު، ބައެއް މަގުތަކުން ދުއްވުން މަނާވެ، ބައެއް މަގުތަކަށް ހަތަރު ފުރޮޅުލީ އުޅަނދު ވަނުން މަނާވާނެއެވެ.
މިބަދަލާ ގުޅިގެން ރައްޔިތުންނަށް ދިމާވެދާނެ ދަތިތަކަށް މައާފަށް އެދޭ ކަމަށް ފުލުހުން ވިދާޅުވިއެވެ. އަދި މިފަދަ ކަންކަމުގައި ރައްޔިތުންގެ ފަރާތުން ލިބޭ އެއްބާރުލުން ފާހަގަކޮށް ފުލުހުން ވަނީ ޝުކުރު އަދާކޮށްފައެވެ.
ކިޔުންތެރިންގެ ހިޔާލު