ހުޅުމާލޭގެ ދުވާރުތަކުގައި ގަވާއިދާ ޚިލާފަށް އުޅަނދުފަހަރު ޕާކުކުރާ ނަމަ އެ އުޅަނދުތަކުގެ ވެރިފަރާތްތަކާ މެދު ގާނޫނީ ފިޔަވަޅު އަޅާނެކަން ދިވެހި ފުލުހުންގެ ޚިދުމަތުން އަންގައިފިއެވެ.
ފުލުހުން ބުނީ ހުޅުމާލޭގެ މަގުތަކުގައި ހިނގާބިނގާވެ އުޅޭ މީހުންނަށް ޚާއްސަކޮށްފައިވާ ދުވާރުތަކުގައާއި އާންމު ދަތުރުފަތުރަށް ދަތިވާގޮތަށް އުޅަނދުފަހަރު ޕާކުކުރުން އިތުރުވަމުންދާކަން ފާހަގަކުރެވިފައިވާ ކަމަށެވެ. އެގޮތަށް ދުވާރުތަކުގައި އުޅަނދު ޕާކުކުރުމަކީ ނުރައްކާތެރި އެކްސިޑެންޓްތައް ހިނގުމަށް މެދުވެރިވާ މުހިންމު ސަބަބެއްކަމަށްވެސް ފުލުހުން ފާހަގަކުރެއެވެ.
އާންމު ރައްޔިތުންގެ ސަލާމަތާއި ރައްކާތެރިކަން ކަށަވަރުކުރުމަށާއި މަގުމަތީގެ އަމާންކަން ދެމެހެއްޓުމަށްޓަކައި، އެފަދަ ސަރަހައްދުތަކުގައި އުޅަނދު ޕާކުނުކުރުމަށް ފުލުހުން ވަނީ އިލްތިމާސްކޮށްފައެވެ. އަދި ދުވާރުތަކާއި މަނާ ސަރަހައްދުތަކުގައި ޕާކުކޮށްފައި ހުންނަ އުޅަނދުތަކާމެދު ފިޔަވަޅު އަޅަމުންގެންދާނެކަމަށްވެސް ބުނެފައިވެއެވެ.
ފަހަކަށް އައިސް މާލެ ސަރަހައްދުގައި ހިނގާ ނުރައްކާތެރި އެކްސިޑެންޓްތަކުގެ ތެރެއިން ގިނަ ހާދިސާތަކެއް ހިނގާފައިވަނީ ހުޅުމާލޭގެ މަގުތަކުގައެވެ. މާލެ ސަރަހައްދުގައި ދުއްވާ އުޅަނދުތައް އިތުރުވެ، އެކަށީގެންވާ ގޮތެއްގައި ޕާކުކުރާނެ އިންތިޒާމެއް ނެތުމަކީ މަގުމަތީގެ ނުރައްކާތައް އިތުރުވާ މުހިންމު ސަބަބެކެވެ.
މި މައްސަލަ ހައްލުކުރުމުގެ ގޮތުން މާލެއާއި ހުޅުމާލޭގައި ގަވާއިދާ ޚިލާފަށް ޕާކުކުރާ އުޅަނދުތައް ޓޯކުރުމުގެ މަސައްކަތް ފުލުހުން ދަނީ ހިންގަމުންނެވެ. އެގޮތުން ގޯޅިތަކުގެ ކަންމައްޗާއި، މިސްކިތްތަކާއި، ސްކޫލްތަކާއި، ހޮސްޕިޓަލްތަކުގެ ކުރިމަތީގައާއި، ދުވާރު މަތީގައި ޕާކުކުރާ އުޅަނދުތަކުގެ އިތުރުން ރަޖިސްޓްރީނުކޮށް ހުންނަ އުޅަނދުތަކާއި މަގުމައްޗަށް ދޫކޮށްލާފައިވާ ބާ އުޅަނދުތައްވެސް ފުލުހުން ދަނީ ނަގަމުންނެވެ.
ކިޔުންތެރިންގެ ހިޔާލު