މޯލްޑިވްސް ޕޯޓްސް ލިމިޓެޑުން މޯލްޑިވްސް މެރިޓައިމް ކޮންފަރެންސް 2026 ގެ ބްރޯންޒް ސްޕޮންސަރެއްގެ ގޮތުގައި ސާސޭ ކޮންސްޓްރަކްޝަން ޕްރައިވެޓް ލިމިޓެޑް ހަމަޖައްސައިފިއެވެ.
މި އެއްބަސްވުމުގައި އެމްޕީއެލްގެ ފަރާތުން ސޮއިކުރެއްވީ ޑީސީއީއޯ، އަލީ ހާޝިމްއެވެ. ސާސް އީ ކޮންސްޓްރަކްޝަން ޕްރައިވެޓް ލިމިޓެޑްގެ ފަރާތުން މި އެއްބަސްވުމުގައި ސޮއިކުރެއްވީ އެކުންފުނީގެ އެޗްއާރް ޑިރެކްޓަރ އިބްރާހިމް މަސްދޫމެވެ.
މިއީ އެމްޕީއެލްއިން މެރިޓައިމް ކޮންފަރެންސް ހިންގާ ދެވަނަ ފަހަރެވެ. މެރިޓައިމް ކޮންފަރެންސް ފެށުމަށް ހަމަޖެހިފައި ވަނީ މާދަމާއެވެ.
މިއީ ރާއްޖޭގެ ކަނޑުދަތުރުފަތުރާއި ބަނދަރުގެ ސިނާޢަތު ކުރިއެރުވުމަށްޓަކައި، މި ދާއިރާގެ ދިވެހި އަދި ބޭރުގެ ތަޖުރިބާކާރުންނާއި ކަމާގުޅޭ އިދާރާތައް އެއްތަނަކުން ބައްދަލުވެ މަޝްވަރާކުރުމަށް ބާއްވާ މުހިންމު ކޮންފަރެންސެކެވެ. މި ކޮންފަރެންސްގެ ފުރަތަމަ އެޑިޝަން ވަރަށް ކާމިޔާބުކަމާއެކު ބާއްވާފައިވަނީ 2024 ވަނަ އަހަރުގައެވެ.
އެ އަހަރު ބޭއްވި ފުރަތަމަ ކޮންފަރެންސްގައި ކަނޑުދަތުރުފަތުރުގެ ދާއިރާގައި ހަރަކާތްތެރިވާ ގިނަ ފަރާތްތަކެއް ބައިވެރިވެ، މުހިންމު މަޝްވަރާތަކެއް ވަނީ ކުރިއަށް ގެންގޮސްފައެވެ. އަދި މި ބައްދަލުވުމުގެ ތެރެއިން ސިނާޢަތުގެ އެކި ފަރާތްތަކުގެ މެދުގައި ގުޅުން ބަދަހިވެ، އައު ޚިޔާލުތަކާއި ތަސައްވުރުތައް ހިއްސާކުރުމުގެ ފުރުޞަތު ފަހިވެފައިވެ އެވެ.
މެރިޓައިމް ކޮންފަރެންސްގައި ރާއްޖެއާއި ރާއްޖެއިން ބޭރުގެ ކަމާބެހޭ މާހިރުންނާއި، ސިޔާސަތު އެކަށައަޅާ ފަރާތްތަކުގެ އިތުރުން ސިނާޢަތުގެ އިސްވެރިން ބައިވެރިވާނެއެވެ. މި ފަހަރުގެ ކޮންފަރެންސްގައި މައިގަނޑު ގޮތެއްގައި އަލިއަޅުވާލުމަށް ހަމަޖެހިފައިވަނީ ބަނދަރުތައް ތަރައްޤީކުރުމާއި، ކަނޑުމަތީގެ ސަލާމަތާއި ރައްކާތެރިކަމުގެ އިތުރުން ތިމާވެއްޓާ ރައްޓެހި ގޮތެއްގައި މި ސިނާޢަތް ކުރިއެރުވުމާ ގުޅޭގޮތުންނެވެ.
އެމްޕީއެލްއިން ވަނީ މި ކޮންފަރެންސްގައި ބައިވެރިވުމުގެ ފުރުޞަތު ކަނޑުދަތުރުފަތުރުގެ ދާއިރާގައި ހަރަކާތްތެރިވާ ހުރިހާ ފަރާތްތަކަކަށް ހުޅުވާލާފައެވެ. ރާއްޖޭގެ އިޤްތިޞާދުގައި ކަނޑުދަތުރުފަތުރުގެ ސިނާޢަތަކީ މުހިންމު ދައުރެއް އަދާކުރާ ދާއިރާއަކަށްވާއިރު، މިފަދަ ކޮންފަރެންސްތަކުގެ ސަބަބުން މި ސިނާޢަތަށް އިތުރު ކުރިއެރުންތަކެއް ލިބިގެންދާނެކަމަށް އެ ކުންފުނިން ޤަބޫލުކުރެއެވެ.
ކިޔުންތެރިންގެ ހިޔާލު