މާލޭ މައި ވިޔަފާރި ބަނދަރު ތިލަފުއްޓަށް ބަދަލުކުރުމުގެ މަޝްރޫޢުން ރާއްޖޭގެ އިގްތިސާދަށް ބޮޑު ކުރިއެރުމެއް އަންނާނެ ކަމަށާއި، ބަނދަރުގެ ޚިދުމަތްތައް 4 ގުނަ ފުޅާވާނެ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.
މާލޭގެ މައި ވިޔަފާރި ބަނދަރު ތިލަފުއްޓަށް ބަދަލުކުރުމުގެ މަޝްރޫޢު ކުރިއަށްދާ ގޮތް ބައްލަވާލެއްވުމަށްފަހު މީޑިއާތަކަށް ދެއްވި އިންޓަވިއުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވީ، މިއީ ސަރުކާރުން މިވަގުތު އެންމެ އިސްކަންދޭ އެއް މަޝްރޫޢު ކަމަށެވެ.
އަދި މިހާރު މާލޭގައި އޮތް ބަނދަރަކީ ރާއްޖޭގެ އިޤްތިޞާދު ކުރިއަރައިގެންދާ މިންވަރަށް އެކަށީގެންވާ ތަނެއް ނޫން ކަމަށާއި، ތިލަފުށީގައި ތަރައްޤީކުރާ އައު ޒަމާނީ ބަނދަރާއެކު ޕޯޓުގެ ޚިދުމަތްތައް 4 ގުނަ ފުޅާވެ، މުޅި އިޤްތިޞާދަށް ބޮޑު ކުރިއެރުމެއް ލިބިގެންދާނެ ކަމަށް ފާހަގަކުރެއްވިއެވެ.
ސަރުކާރުގެ އަމާޒަކީ އަންނަ އަހަރުގެ ނޮވެމްބަރު 11 ގެ ނިޔަލަށް ޕޯޓުގެ އެންމެހާ ޚިދުމަތްތައް ތިލަފުއްޓަށް ބަދަލުކުރުމެވެ. މިހާރު ކުރިއަށްދާ ޑޮމެސްޓިކް ކީވޯލްގެ މަސައްކަތް ނިމި، މި މަހުގެ ފަހުކޮޅު އެތަނުން ޚިދުމަތް ދޭން ފެށޭނެއެވެ.
މި މަޝްރޫޢުގެ ބައެއް މަސައްކަތްތައް މާލެ އިންޑަސްޓްރިއަލް ޒޯން ސަރަޙައްދަށްވެސް ބަދަލުކުރާނެ ކަމަށް ރައީސް ފާހަގަކުރެއްވިއެވެ. މި ޒިޔާރަތުގައި އިޤްތިޞާދީ ވަޒީރު މުޙައްމަދު ސަޢީދާއި، އެމްޕީއެލްގެ ސީއީއޯ ހުސައިން ޝަފީޤް އަދި އިންޓަރނޭޝަނަލް ކީވޯލްގެ މަސައްކަތްކުރާ ޗައިނާ ކުންފުނީގެ އިސްވެރިން ބައިވެރިވެވަޑައިގެންނެވިއެވެ.
ކިޔުންތެރިންގެ ހިޔާލު