ކުއްލި ޙާލަތްތަކުގައި ބަލިމީހުން އެއްތަނުން އަނެއްތަނަށް ގެންދިއުމަށް ސަރުކާރުން ތަޢާރަފުކުރި އެއަރ އެމްބިއުލާންސްގެ ޚިދުމަތުގައި 2،336 ދަތުރުކޮށް، 3،025 ބަލިމީހުން ރައްކާތެރިކަމާއެކު އުފުލައިދީފައިވާ ކަމަށް ސިއްހަތާއި އާއިލާއާއި އިޖްތިމާއީ އެހީއާ ބެހޭ ވަޒީރު ގީލާ އަލީ ވިދާޅުވެއްޖެ އެވެ.
އެކަމަނާ މިކަން ހާމަކުރެއްވީ ރައީސުލްޖުމްހޫރިއްޔާގެ އޮފީހުގައި އިއްޔެ ބޭއްވި ނޫސްވެރިންގެ ބައްދަލުވުމުގައި ވާހަކަފުޅު ދައްކަވަމުންނެވެ.
ވަޒީރު ޤީލާ ޢަލީ ވިދާޅުވީ، 1 މާރިޗު 2024 އިން ފެށިގެން އޮގަސްޓު 2026 ގެ ނިޔަލަށް އެއަރ އެމްބިއުލާންސްގެ ޚިދުމަތް ކާމިޔާބުކަމާއެކު މުޅި ރާއްޖެއަށް ފޯރުކޮށްދެވިފައިވާ ކަމަށެވެ. އަދި މި ޚިދުމަތް ރާއްޖެއިން ބޭރަށް ފުޅާކުރުމުގެ ގޮތުން ދުބާއީ އަދި ތައިލެންޑަށް އެއަރ އެމްބިއުލާންސްގައި ބަލިމީހުން ގެންދެވޭނެ އިންތިޒާމު ހަމަޖެއްސުމަށްޓަކައި ޞިއްޙީ ވުޒާރާއާއި، އައިލެންޑް އޭވިއޭޝަން އަދި އެންސްޕާއާ ދެމެދު އެއްބަސްވުމެއްގައި ސޮއިކޮށްފައިވާ ކަމަށް ވެސް ވަޒީރު ފާހަގަކުރެއްވި އެވެ.
ވައިގެ މަގުން ދެވޭ ޚިދުމަތުގެ އިތުރުން، އެއްގަމާއި ކަނޑުމަގުން ދެވޭ އެމަޖެންސީ ދަތުރުފަތުރުގެ ނިޒާމު ވަރުގަދަކުރުމަށް ސަރުކާރުން ކޮށްފައިވާ މަސައްކަތްވެސް އެކަމަނާ ފާހަގަ ކުރެއްވި އެވެ.
އެގޮތުން މިހާތަނަށް 87 ރަށަކަށް އެމްބިއުލާންސް ފޮނުވިފައިވާ ކަމަށާއި، އިތުރު 10 ޕެރަމެޑިކް އެމްބިއުލާންސް ހޯދުމުގެ މަސައްކަތް މިހާރު ދަނީ ކުރަމުން ކަމަށްވެސް ވިދާޅުވި އެވެ
އެމްއެންޑީއެފް މެދުވެރިކޮށް ރާއްޖޭގެ ހުރިހާ ރަށަކަށް ސީ އެމްބިއުލާންސްގެ ޚިދުމަތް މެދުކެނޑުމެއްނެތި ދަނީ ފޯރުކޮށްދެމުން ކަމުގައި ވަޒީރު ވިދާޅުވި އެވެ.
އަދި އައުޓްރީޗް ޕްރޮގްރާމްތައް ހިންގުމަށާއި، އެއްރަށުން އަނެއްރަށަށް ލެބޯޓަރީ ސާމްޕަލް ފޮނުވުމުގެ އިތުރުން ސީ އެމްބިއުލާންސް ދަތިވާ ޙާލަތްތަކުގައި ބޭނުންކުރުމަށް 20 އަތޮޅަކަށް ޚާއްޞަ ހެލްތު ލޯންޗް ފްލީޓެއް ވަނީ ހަމަޖައްސާފައިވާ ކަމަށް ވިދާޅުވި އެވެ.
ވަޒީރު ޤީލާ ޢަލީ ވިދާޅުވީ، ސަރުކާރުގެ މި ހަރުދަނާ ފިޔަވަޅުތަކުގެ ސަބަބުން ކުއްލި ޞިއްޙީ ފަރުވާ ބޭނުންވާ ރައްޔިތުންނަށް އެއްވެސް ލަސްވުމެއްނެތި، ވީހާވެސް އަވަހަށް ފުރާނަ ސަލާމަތްކުރުމުގެ ފަރުވާ ފޯރުކޮށްދިނުމުގެ ފުރިހަމަ ޤާބިލުކަން ޞިއްޙީ ނިޒާމަށް ލިބިގެން ގޮސްފައިވާ ކަމަށެވެ.
ކިޔުންތެރިންގެ ހިޔާލު