މޮރޯކޯގެ އައު ބޮޑުވަޒީރު ފާތިމާ އައްޒަހްރާ އަލް މަންސޫރީއަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ތަޙުނިޔާ ވިދާޅުވެއްޖެ އެވެ.
ފާތިމާ އައްޒަހްރާ އަލް މަންސޫރީ އަކީ މޮރޯކޯގެ ފުރަތަމަ އަންހެން ބޮޑުވަޒީރެވެ. އަދި އެކަމަނާ އަކީ އެ ޤައުމުގެ 18 ވަނަ ބޮޑުވަޒީރެވެ.
ރައީސުލްޖުމްހޫރިއްޔާގެ މެސެޖުގައި ފާތިމާ އައްޒަހްރާ އަލް މަންސޫރީ މޮރޮކޯގެ ފުރަތަމަ އަންހެން ބޮޑުވަޒީރެއްގެ ގޮތުގައި މަޤާމަށް އައްޔަނުކުރެއްވުމަކީ މުޅި ދުނިޔެއަށް އަދި ޚާއްސަކޮށް އަރަބި ދުނިޔެއަށް ލިބުނު ތާރީޚީ ކާމިޔާބެއް ކަމުގައި ސިފަކުރެއްވި އެވެ. ފާތިމާ އައްޒަހްރާ އަކީ އަރަބި ޤައުމެއްގެ މިފަދަ އިސް މަޤާމަށް އައްޔަނުކުރެވުނު ދެވަނަ އަންހެން ބޭފުޅާކަން ފާހަގަ ކުރައްވާ ރައީސުލްޖުމްހޫރިއްޔާ ވަނީ ސަރަޙައްދުގެ ސިޔާސީ ތާރީޚުގައި އާ ބާބެއް ހުޅުވިގެން ދިޔުން ކަމުގައި ވިދާޅުވި އެވެ.
އަދި މިއީ އަންހެނުންނަށް ލިބިގެންދިޔަ ބޮޑު ހިތްވަރަކާއި ހިންގުމުގެ ދާއިރާގައި އަންހެނުންނަށް ލިބުނު ކުރިއެރުމެއްގެ ގޮތުގައި ރައީސް ވަނީ ސިފަކުރައްވާފަ އެވެ.
ރައީސުލްޖުމްހޫރިއްޔާގެ މެސެޖުގައި ރާއްޖެއާ މޮރޮކޯއަކީ ވަރަށް ގާތް ދެ ޤައުމުކަން ފާހަގަ ކުރައްވާ އެ ގުޅުން އިތުރަށް ބަދަހިވެގެން ދިއުމަށް އުންމީދު ކުރައްވާ ކަމުގައި ވިދާޅުވި އެވެ. ދެ ޤައުމުގެ އޮތީ އިޙްތިރާމާއި އެއްބާރުލުން ދިނުމުގެ މައްޗަށް ބިނާވެފައިވާ ގުޅުމެއް ކަމުގައިވެސް ވިދާޅުވި އެވެ.
އެމަނިކުފާނުގެ މެސެޖު ނިންމަވައިލެއްވީ އައު ބޮޑުވަޒީރުގެ ޒަޢާމަތުގައި މޮރޮކޯއާ އެ ޤައުމުގެ ރައްޔިތުންނަށް އުފާފާޤަތިކަމާއި ކުރިއެރުމާއި ތަނަވަސްކަމާއި ކާމިޔާބީއަށް އެދިވަޑައިގަންނަވަމުންނެވެ.
ކިޔުންތެރިންގެ ހިޔާލު