މިއަހަރު ނިމޭއިރު ހުރިހާ ކުންފުނިތަކެއްވެސް ހުންނާނީ އެކުންފުންޏަކަށް ބޭނުންވާ އަދަދުގެ މުވައްޒަފުންކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.
ސަރުކާރުން ވަނީ ކުންފުނިތައް އިސްލހުކޮށް، ގެއްލުން ކުޑަކުރުމުގެ މަސައްކަތް ފަށާފައެވެ. ކުންފުނިތަކުގެ ބެލެނިވެރި ފަރާތް، ޕީސީބީން ބުނެފައިވާގޮތުގައި ދިޔަ ސަރުކާރުގެ ދުވަސްވަރު 18000 އަށްވުރެ ގިނަ މުވައްޒަފުންވަނީ ކުންފުނިތަކަށް ވައްދާފައެވެ. ބައެއް ކުންފުނިތަކުގައި ތިބި މުވައްޒަފުންގެ މަޢުލޫމާތާއި، ވަޒީފާއަށް ވެއްދިކަމުގެ ލިޔެކިޔުންތައް ނެތްކަމުގެ ކަންބޮޑުވުން އޮތްއިރު، ކުންފުނީގެ މާލީ ޙާލަތު ދަށަށްގޮސްފައިވާކަން ޕީސީބީން ފާހަގަކުރެވެއެވެ.
ނޭޝަން ޗެޓުގައި ވާހަކަފުޅު ދައްކަވަމުން ރައީސް ވިދާޅުވީ ކުންފުނިތަކުގެ ހިންގުން ހަރުދަނާކުރުމަށް އަޅުއްވަމުންގެންދަވާ ފިޔަވަޅުތަކުގެ ތެރެއިން މިއަހަރު ނިމޭއިރު ކުންފުނިތަކުގައި މުވައްޒަފުން ތިބޭނީ އެކުންފުންޏަކަށް ބޭނުންވާ މިންވަރަށްކަމަށެވެ. ކުންފުނިތަކުން ވަކިކުރާ މުވައްޒަފުންނަށް ރިޑަންޑެންސީގެ ތެރެއިން އެކި ޕެކޭޖުތަކުން ލުއިތައް ދިނުމާއި، ލުއިލޯނުތައް ނަގައިގެން އެފަރާތްތަކަށް އަމިއްލަ މަސައްކަތެއް ފެށޭނެ މަގު ހޯއްދަވައިދެއްވާނެކަމަށް ރައީސް ވިދާޅުވިއެވެ.
ރައީސް ވިދާޅުވީ، އެމަނިކުފާނު ވެރިކަމަށް ވަޑައިގެންނެވިއިރު ކުންފުނިތަކުން މުވައްޒަފުން ވަކިނުކުރާނެކަމަށް ވިދާޅުވިކަމަށެވެ. އަދި އެގޮތަށް 2 އަހަރު ތެރޭގައި މީހުން ވަކިކޮށް ފިޔަވަޅުތަކެއް އަޅާފައިނުވާނެކަމަށެވެ. ނަމަވެސް ސަރުކާރުގެ ބައެއް ކުންފުނިތަކަށް މީހުން ނަގާފައިވަނީ ކުންފުނިތަކަށް ބޭނުންވާ ވަރަށް ވުރެ އެތައް ގުނައެއް އިތުރުކޮށްކަމަށްވާއިރު، މިފަދަ ގިނަ މުވައްޒަފުންނަކީ މަސައްކަތެއްނެތި ހަމައެކަނި އެފަރާތްތަކަށް މުސާރަ ޖަމާވަމުންދާ މުވައްޒަފުންކަމަށެވެ. ހިންގުމުގެ ނިޒާމު ހަރުދަނާކުރުމަށް އެމަނިކުފާނު ވެވަޑައިގެންނެވި ވަޢުދުފުޅު ފުއްދެވުމަށްޓަކައި ކުންފުނިތަކުގައި އެއްވެސް މަސައްކަތެއް ނެތި ތިބި މުވައްޒަފުން ވަކިކުރަންޖެހޭނެކަމަށް ޤަބޫލުކުރައްވާކަމަށް ރައީސް ވިދާޅުވިއެވެ.
ރައީސްގެ ވާހަކަފުޅުގައި ކުންފުނިތަކުން މުވައްޒަފުން ވަކިކުރާއިރުވެސް އެމީހުންގެ އަޚުލާޤީ މައްސަލަތަކަށް ބަލާނެކަމަށް ވިދާޅުވއެވެ. އެގޮތުން ހާޒިރީއާއި މަސައްކަތްކުރާ މިންވަރު ވަޒަންކުރެވޭނެކަން ފާހަގަކުރައްވާ ވިދާޅުވީ ވަކިކޮށްލާ ގިނަ މުވައްޒަފުންނަށްވެސް އިތުރު ގޮތްތައް ހޯއްދަވައިދެއްވާނެކަމަށް ވިދާޅުވިއެވެ.
ކުންފުނި އޮތިީ އެކިކަހަލަ މައްސަލަތަކުގެ ތެރޭގައިކަން އެނގޭ އޮޑިޓަރ ޖެނެރަލްގެ ރިޕޯޓުންވެސް، އެހެންވީމަ ކުންފުނި ރަނގަޅު ކުރަންޖެހޭ. ކުންފުނީގެ ޚަރަދު ކުޑަކޮށް ހިންގުން ރަނގަޅު ކުރަންޖެހޭ. ޕާފޯމެންސަށް ބަލާ ކުންފުނީގެ މުވައްޒަފުން ކުންފުންޏަށް އެންމެ ރަނގަޅުވާނެ ގޮތަށް މަދުކުރަން.
ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވިއެވެ.
ސަރުކާރުން މި އަހަރުގެ އެޕްރީލް މަހު ހާމަކޮށްފައިވާ ތަފާސްހިސާބުތަކަށް ބަލާއިރު ސަރުކާރު ހިއްސާވާ ކުންފުނިތަކުގައި 42،000 އަށްވުރެ ގިނަ މުވައްޒަފުން ތިބިއިރު، ސިވިލް ސަރވިސްގައި 34000އެއްހާ މުވައްޒަފުން ވަޒީފާ އަދާކުރަމުންދެއެވެ. އެހެންކަމުން ތަފާސްހިސާބުތަކަށް ބަލާނަމަ އެސްއޯއީތަކުގައި މުވައްޒަފުން ތިބި މިންވަރު އިތުރުކަން ހާމަވެއެވެ. ކުންފުނިތަކަށް މީހުން އިތުރުކޮށްފައި ހުރި ގޮތުގެ ޓްރެންޑަށް ބަލާއިރު، ބައެއް އިންތިޚާބުތަކާއި ދިމާކޮށް ކުންފުނިތަކަށް 1000-2000 މީހުން އިތުރުކޮށްފައި އެބަހުއްޓެވެ.
ކުންފުނިތައް ހިންގުމަށް ދަތިވާނެހެން މުވައްޒަފުން ގެންގުޅުމަކީ، ކުންފުނި ހިންގަން ފަސޭހަކަމަކަށް ނުވެއެވެ. ޚާއްސަކޮށް ދިމާވެފައިވާ އިޤްތިސާދީ ގޮންޖެހުންތަކުން އަރައިގަތުމަށް ކުންފުނިތައް ރައިޓްސައިޒު ކުރުމަކީ، މުހިންމު ފިޔަވަޅެކެވެ.
ރައީސުލްޖުމްހޫރިއްޔާ ޑރ.މުހައްމަދު މުއިއްޒު މީގެކުރިން ވިދާޅުވެފައިވަނީ، ސަރުކާރުގެ ކުންފުނިތައް ހަމަމަގަށް އަޅުވައި ރައިޓް ސައިޒު ކުރުމަކީ ރާއްޖޭގެ މާލީ ކުރިއެރުމަށާއި، މުސްތަޤުބަލަށްޓަކައި އެޅުން ކޮންމެހެން މަޖުބޫރުވެފައިވާ މުހިންމު ފިޔަވަޅެއް ކަމަށެވެ. ސަރުކާރުން އަބަދުވެސް މަސައްކަތް ކުރާނީ ޤައުމުގެ އިޤްތިސާދު ސަލާމަތްކޮށް، ރައްޔިތުންނަށް އެންމެ ފައިދާހުރި ގޮތަކަށް ޤާނޫނީ ހަމަތަކުގެ މަތިން ކަންކަން ކުރުންކަން ރައީސް ފާހަގަކުރެއްވިއެވެ.
މި މައްސަލައަށް ހައްލެއް ގެނައުމަށް ސަރުކާރުން ރަސްމީކޮށް މަސައްކަތް ފެށީ، މި އަހަރުގެ ތެރޭގައެވެ. ސަރުކާރު ކުންފުނިތަކުގެ މުވައްޒަފުންގެ އަދަދު 33 އިންސައްތަ މަދުކުރުމަށް މާލީ ކަންކަމާއި ސަރުކާރު ކުންފުނިތަކާ ބެހޭ ވުޒާރާއިން އަންގަވާފައިވަނީ، ޕްރައިވެޓައިޒޭޝަން އެންޑް ކޯޕަރަޓައިޒޭޝަން ބޯޑު (ޕީ.ސީ.ބީ)ގެ ރައީސަށް ފޮނުއްވި ސިޓީއެއްގައެވެ.
ކިޔުންތެރިންގެ ހިޔާލު