ރާއްޖޭގެ ވިޔަފާރިއާއި އިޤުތިޞާދީ ތަރައްޤީއާ އެންމެ ބޮޑަށް ގުޅިފައިވާ އެއް މަޝްރޫޢަކީ މާލޭ ވިޔަފާރި ބަނދަރުގެ ހާލަތު ބަދަލުކޮށް ޒަމާނީކުރުން ކަމަށް އިޤުތިޞާދީ ތަރައްޤީއާއި ދަތުރުފަތުރާއި ވިޔަފާރިއާ ބެހޭ ވަޒީރު މުހައްމަދު ސަޢީދު ވިދާޅުވެއްޖެއެވެ.
ސޯޝަލް މީޑިއާގައި ހިއްސާކުރެއްވި ޕޯސްޓެއްގައި ވަޒީރު ވިދާޅުވީ، މައި ބަނދަރު ޒަމާނީ ކުރުމުގެ ޚިޔާލު ކުރާތާ އެތައް ޒަމާނެއް ވެފައިވީ ނަމަވެސް ބަނދަރު އޮތީ ކުރިންވެސް އޮތް ގޮތަށް ކަމަށާއި، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އިސްނަންގަވައިގެން ހިކުމަތްތެރިކަމާއެކު މި މައްސަލައަށް ޢަމަލީ ހައްލު ހޯއްދަވައިދެއްވަމުން ގެންދަވާ ކަމަށެވެ.
މާލޭ ބަނދަރުގެ މަސައްކަތްތަކުގެ ފަހުގެ އަދާހަމަ ހިއްސާކުރަމުން އެމްޕީއެލްއިން ބުނީ، އެމްޓީސީސީއާ ހަވާލުކޮށްގެން ކުރިއަށްގެންދިޔަ 100 މީޓަރުގެ ކީވޯލްގެ މަސައްކަތް ނިމި، ޔާރޑުގެ ޕޭވިންގ މަސައްކަތް އޮކްޓޫބަރުގެ ކުރީކޮޅު ނިމޭނެ ކަމަށެވެ. މި ސަރަހައްދު ފުރިހަމަވުމުން މާލޭ ބަނދަރުގައި ކުރިއަށްދާ ދޯނި ކާރގޯ ކްލިއަރެންސްތައް ތިލަފުއްޓަށް ބަދަލުކުރެވޭނެއެވެ.
ތިލަފުށީގައި ބައިނަލްއަޤްވާމީ ބަނދަރު ތަރައްޤީކުރުމުގެ މަސައްކަތް ހަވާލުކޮށްފައިވާ ޗައިނާ ހާބަރ އިންޖިނިއަރިންގ ކޮމްޕެނީން ބާރު ދުވެލީގައި މަސައްކަތް ކުރިއަށްގެންދާއިރު، ޑޮމެސްޓިކް ކީވޯލްގެ މަސައްކަތް މިއަހަރުގެ ނޮވެމްބަރުގެ ނިޔަލަށް އަދި އިންޓަރނޭޝަނަލް ކީވޯލް 2027 ޖުލައިއަށް ނިމޭނެއެވެ. އަދި ބަނދަރަށް ބޭނުންވާ އެސްޓީއެސް ކްރޭނާއި މޯބައިލް ހާބަރ ކްރޭން 2027 އޮކްޓޫބަރު 15 ގެ ކުރިން މާލެ ގެނައުމަށް އެމްޕީއެލްއިން ދަނީ މަސައްކަތް ކުރަމުންނެވެ.
ކިޔުންތެރިންގެ ހިޔާލު