ހިނަގަމުންދާ އޯގަސްޓުމަހުގެ 22 ވަނަ ދުވަހުން 26 ވަނަ ދުވަހަށް ފާއިތުވި ފަސް ދުވަހުގެ ތެރޭ މާލޭ ވިޔަފާރި ބަނދަރުން ޖުމްލަ 14،790 ބިސް ކޭސް ކްލިއާކޮށްފައިވާކަމަށް މޯލްޑިވްސް ޕޯޓްސް ލިމިޓެޑް (އެމްޕީއެލް)އިން ބުނެފިއެވެ.
އެމްޕީއެލްއިން އެމްއެމްޓީވީއާ ހިއްސާކުރި ހިސާބުތަކަށް ބަލާއިރު އެ ފަސް ދުވަހުގެ ތެރޭގައި ޖުމްލަ 1،695.328 ފްރައިޓް ޓަނުގެ ޕެރިޝަބަލް މުދާ ކްލިއާކުރިއެވެ. އޭގެ ތެރޭގައި 497.523 ފްރައިޓް ޓަނުގެ ބިސް ހިމެނެއެވެ. އެއީ އެ މުއްދަތުގައި ކްލިއާކުރި ޕެރިޝަބަލް މުދަލުގެ 29.3 އިންސައްތައެވެ.
ފާއިތުވި ފަސް ދުވަހުގެ ތެރޭ 15،000 އާ ގާތްކުރާ އަދަދެއްގެ ބިސް ކޭސް އެމްޕީއެލްއިން ކްލިއާކުރިކަން އެ ކުންފުނިން ހާމަކުރިއިރު ބިސް ލިބުމުގައި އެއްވެސް ދަތިކަމެއް ނެތްކަމަށާއި، ބިސް ވިއްކަމުންދަނީ ކޮންޓުރޯލުކޮށްގެން ނޫންކަމަށް އެސްޓީއޯއިން މިއަދު ބުނެފައިވެއެވެ.
އެސްޓީއޯއިން މިފަދައިން ބުނެފައިވަނީ ބާޒާރުގައި ބިސް ލިބުން ދަތިވެފައިވާކަމަށާއި، އެސްޓީއޯއިން ބިސް ވިއްކަމުންދަނީ ކޮންޓްރޯލުކޮށްގެންކަމަށް ބުނެ ބައެއް މީހުން މީސްމީޑިޔާގައި ފަތުރަމުންދާ ހަބަރާ ގުޅިގެންނެވެ.
އެސްޓީއޯއިން އިތުރަށް ބުނީ މިހާރުވެސް ބިހުގެ ޝިޕްމެންޓުތަކެއް ރާއްޖެއަށް އައުމުގެ މަގުމަތީ އެބަހުރި ކަމަށެވެ. އަދި ކުރިއަށް އޮތް ތަނުގައިވެސް ބިސް ލިބުމުގައި އެއްވެސް ދަތިކަމެއް ކުރިމަތިނުވާނެ ކަމުގެ ޔަގީންކަން އެ ކުންފުނިން ދީފައިވެއެވެ.
ކިޔުންތެރިންގެ ހިޔާލު