ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު، ތިލަމާލެ ބުރިޖު މަޝްރޫޢުގެ ދަށުން މާލެއާއި ވިލިމާލެއާ ދެމެދު ކުރިއަށްދާ މަސައްކަތްތައް ސައިޓަށް ވަޑައިގެން ބައްލަވާލައްވައި، މަޝްރޫޢުގެ ސުޕަސްޓްރަކްޗާ މާލެއިން ވިލިމާލެއަށް ގުޅާލެވިފައިވާކަން އިއުލާނު ކުރައްވައިފައެވެ.
އިންޖިނޭރުންގެ ދުވަސް ފާހަގަކުރުމުގެ ގޮތުން މާލެއިން ވިލިމާލެއަށް ފައިމަގުގައި ބޭއްވި ހިނގާލުމަށްފަހު މީޑިއާތަކަށް ދެއްވި ބަސްދީގަތުމެއްގައި ރައީސް ވަނީ މުޅި މަޝްރޫޢުގެ މަސައްކަތްތައް ކުރިއަށް އޮތް އަހަރެއްހާ ދުވަހުގެ ތެރޭގައި އެއްކޮށް ނިންމާލެވޭނެ ކަމަށް އުންމީދު ކުރައްވާކަމަށް ވިދާޅުވެފައެވެ.
ގްރޭޓަރ މާލެ ކަނެކްޓިވިޓީ ޕްރޮޖެކްޓް (ޖީ.އެމް.ސީ.ޕީ)ގެ ދަށުން މާލެ، ވިލިމާލެ، ގުޅީފަޅު އަދި ތިލަފުށި ގުޅުވާލުމަށް ހިންގާ މި މަޝްރޫޢަށް އިންޑިއާ ސަރުކާރުން، ޚާއްޞަކޮށް އެޤައުމުގެ ބޮޑުވަޒީރު ނަރެންދްރަ މޯދީ ދެއްވާ އިސްކަން ފާހަގަކުރައްވައި ރައީސް ވަނީ މޯދީއަށާއި، އިންޑިއާއިން ރާއްޖެއަށް ކަނޑައަޅުއްވާފައި ހުންނަވާ ސަފީރު ޖީ. ބާލަސުބްރަމާނިއަންގެ އިތުރުން އެޤައުމުގެ ސަރުކާރަށް ޝުކުރު އަދާކުރައްވާފައެވެ.
މި ދެރަށް ގުޅާލެވުނީ މަޝްރޫޢުގެ ޢަމަލީ މަސައްކަތުގައި ހަރަކާތްތެރިވާ ދެޤައުމުގެ ޓީމުތަކުން ކުރި ބުރަ މަސައްކަތުންކަން ފާހަގަކުރައްވައި އެ އެންމެހާ ފަރާތްތަކަށްވެސް ރައީސް ވަނީ ޝުކުރު އަދާކުރައްވާފައެވެ. އަދި މި މަޝްރޫޢު އެއްކޮށް ނިމިގެން ދިޔުމަކީ މުޅި ގްރޭޓާ މާލެ ސަރަޙައްދުގެ ތަރައްޤީއަށް ލިބިގެންދާނެ ވަރަށް ބޮޑު ކުރިއެރުމެއްކަމަށް އެމަނިކުފާނު ވިދާޅުވިއެވެ.
މީގެއިތުރުން، މިފަދަ މުހިންމު މަޝްރޫޢުތައް އަވަސް ސްޕީޑުގައި ގެންގޮސް ނިންމުމަށް ސަރުކާރުން ޚާއްޞަ އަހަންމިއްޔަތެއް ދެއްވާކަން ފާހަގަކުރައްވަމުން، މި ސަރުކާރު ހަވާލުވިއިރު ބޮޑެތި ބައެއް މަޝްރޫޢުތަކުގެ މަސައްކަތް މަޑުޖެހިފައި ހުރިނަމަވެސް، މިހާރު އެ މަސައްކަތްތައް ބާރުމިނުގައި ކުރިއަށްދާކަން ރައީސުލްޖުމްހޫރިއްޔާ ފާހަގަކުރެއްވިއެވެ.
ކިޔުންތެރިންގެ ހިޔާލު