މާލޭގެ ވިޔަފާރި ބަނދަރު ނުވަތަ ޕޯޓު ކ. ތިލަފުއްޓަށް ބަދަލުކުރަން ހިންގާ ބިޔަ މަޝްރޫއުގެ ދަށުން ތިލަފުށީގެ އޮޕަރޭޝަން މި މަހު ފަށާނެ ކަމަށް އެމްޕީއެލް އިން ބުނެފި އެވެ.
މާލޭގެ ވިޔަފާރި ބަނދަރެކޭ އެއްގޮތަށް ތިލަފުށީގައި ޕޯޓް އޮޕަރޭޝަން މިހާ އަވަހަށް ފަށަން ނިންމީ އޭނާ ވިދާޅުވި ގޮތުގައި މުދާ ބޭލުން ލަސްވެ، ކުރިމަތިވާ ދަތިތަކަށް މިހާރުން މިހާރަށް ވެސް ހައްލެއް ގެނައުމަށެވެ.
ހުސައިން ޝަރީފް ވިދާޅުވީ، މާލޭގެ ވިޔަފާރި ބަނދަރުގެ މިހާރުގެ ހާލަތު ހުރި ގޮތުން އެކަށީގެންވާ ވަސީލަތްތައް ނެތުމުން މުދާ ބޭލުމުގައި ގޮންޖެހުންތައް ކުރިމަތިވާ ކަމަށެވެ.
“އެހެންވީމާ އެކަން އީޒް ކުރުމަށްޓަކައި އިރާދަކުރެއްވިއްޔާ މި މަހުގެ 27 އިން ފެށިގެން އަޅުގަނޑުމެން ތިލަފުށީގައި ވެސް އޮޕަރޭޝަން ޖައްސާނަން ހަމަ މާލެއާ އެކުއެކީގައި”
ސީއީއޯ ވިދާޅުވި ގޮތުގައި އަންނަ އަހަރުގެ ނޮވެމްބަރު މަހު ތިލަފުށި ޕޯޓު ހުޅުވުމަށްޓަކައި ކުރިއަށް އޮތް ދުވަސްތަކުގައި މަސައްކަތް ދެގުނަ އިތުރު ކުރާނެ އެވެ.
އަންނަ އަހަރުގެ ނޮވެމްބަރު މަހާ ހިސާބަށް ނިންމަން އަމާޒު ހިފާފައިވާ މަޝްރޫއުގެ މަސައްކަތް ކުރިއަށް ގެންދާ ގޮތް ބައްލަވައިލެއްވުމަށް ރައީސް ޑރ. މުހައްމަދު މުއިއްޒު ތިލަފުއްޓަށް އިއްޔެ ކުރެއްވި ޒިޔާރަތުގެ ތެރެއިން އެމްޕީއެލްގެ ސީއީއޯ ހުސައިން ޝަރީފް މީޑިއާގައި ވިދާޅުވީ، ތިލަފުށީގައި ޕޯޓް އޮޕަރޭޝަންތައް މި މަހުގެ 27 ގައި ފަށާނެ ކަމަށެވެ.
އޭނާ އިއްޔެ ވިދާޅުވީ، ރައީސް މުއިއްޒު ތިލަފުއްޓަށް ވަޑައިގަތުމަކީ މަސައްކަތް ހަލުވި ކުރުމަށް ލިބުނު ވަރަށް ބޮޑު ހިތްވަރެކެވެ.
ތިލަފުށީގައި މީޑީއާއާ ވާހަކަފުޅު ދައްކަވަމުން ރައީސް އިއްޔެ ވިދާޅުވީ، މާލޭގެ ވިޔަފާރި ބަނދަރު ތިލަފުއްޓަށް ބަދަލުކުރުމަކީ މިވަގުތު ރާއްޖޭގައި ހިންގާ އިގުތިސާދީ އެންމެ ބޮޑު މަސައްކަތް ކަމަށެވެ.
ރައީސް ވިދާޅުވީ، މާލޭގެ ވިޔަަފާރި ބަނދަރު ތިލަފުއްޓަށް ބަދަލުކުރުމުގެ ފުރަތަމަ ފިޔަވަހީގެ މަޝްރޫއު ނިންމައި އަންނަ އަހަރުގެ ނޮވެމްބަރު 11 ގައި ހުޅުވާނެ ކަމަށެވެ. އެއިރުން މާލޭގައި ހިންގާ ވިޔަފާރި ބަނދަރަށް ވުރެ ހަތަރު ގުނައިގެ ސަރަހައްދެއް ބޮޑުވާނެ ކަމަށް އެ މަނިކުފާނު ވިދާޅުވި އެވެ.
ސަރުކާރުން ހާއްސަ އިސްކަމެއް ދީގެން ކުރަމުން އަންނަ މި މަސައްކަތުގެ ދަށުން ވަސީލަތް ފުރިހަމަ ޕޯޓެއްގެ ގޮތުގައި، އަންނަ އަހަރުގެ ނޮވެންބަރު މަހު މާލޭ ވިޔަފާރި ބަނދަރު ތިލަފުށީގައި އޮޕަރޭޝަނަށް ގެނެވޭނޭ ކަމުގެ ފުރިހަމަ ޔަގީންކަން ރައީސް މުއިއްޒު ވަނީ ކުރިން ވެސް ދެއްވައިފަ އެވެ.
ތިލަފުއްޓަށް ޕޯޓް ބަދަލުކުރުމާ ގުޅޭ އިތުރު ބައެއް މައުލޫމާތު
ތިލަފުއްޓަށް މާލޭ ވިޔަފާރި ބަނދަރު ބަދަލުކުރުމުގެ މަސައްކަތުގައި، އެތެރޭގެ އުޅަނދުފަހަރަށް ހާއްސަ ކީ-ވޯލްގެ ފުރަތަމަ 100 މީޓަރުގެ މަސައްކަތް މިހާރު ވަނީ ނިމިފައި. އަދި އެތެރޭގެ ކީ-ވޯލްގެ ހިއްކި ސަރަޙައްދު ބެކްފިލް ކުރުމުގެ ގާތްގަނޑަކަށް 40 ޕަސެންޓު މަސައްކަތް ވަނީ ނިންމާފައި.
ކީ-ވޯލަށް ބޭނުންވާ ޕްރީކާސްޓް ކޮންކްރީޓް ބްލޮކްތައް ސައިޓުގައި އުފެއްދުމުގެ މަސައްކަތާއި ބޭނުންވާ މެޝިނަރީ އާއި ވަސީލަތްތައް ހޯދުމުގެ އިތުރުން ޓާމިނަލް އިމާރާތްތައް އަޅާނެ ކޮންޓްރެކްޓަރަކު ހޮވުމުގެ މަސައްކަތް މިހާރު އަންނަނީ ކުރިއަށް.
ތިލަފުށީގައި ގާއިމުކުރާ 60 ހެކްޓަރުގެ ޖާގައިގެ ބަނދަރު ހުޅުވޭއިރު އަހަރަކު 390،000 ޓީއީޔޫ ކެޕޭސިޓީގައި ކޮންޓެއިނަރު ގެންގުޅުމުގެ ޖާގަ ހަދާނެ. މި އަދަދު އަހަރަކު 1.8 މިލިއަން ޓީއީޔޫ އަށް ކޮންޓެއިނަރުގެ ކެޕޭސިޓީ އިތުރުކުރާނެ.
ބަނދަރު ހުޅުވާނީ ފުން މިނުގައި 14.6 މީޓަރު ހުންނަ ބައިނަލްއަގުވާމީ ކޮންޓޭނަރު ބޯޓުފަހަރަށް ހާއްސަ 375 މީޓަރު ދިގު ކީ-ވޯލަކާއެކުގައި. މި ކީ-ވޯލް 1.4 ކިލޯމީޓަރަށް ދިގުކުރުމުގެ ޖާގައޮންނާނެ.
ތިލަފުށި ބަނދަރުގައި ޑޮމެސްޓިކް އުޅަނދުފަހަރަށް ހާއްސަ ގާތްގަނޑަކަށް ދެ ކިލޯމީޓަރަށް ވުރެ ދިގު ކީ-ވޯލެއް ހަދާނެ.
މި ބަނދަރުގައި ގާއިމުކުރާ ބައިނަލްއަގުވާމީ ކޮންޓޭނަރު ބޯޓުފަހަރަށް ހާއްސަ 375 މީޓަރު ދިގު ކީ-ވޯލް ހެދުމާ އެކު، މުދާ ބަރުކޮށް ބާލައިހެދުން ގާތްގަނޑަކަށް ދެ ދުވަހުގެ “ޓާން އަރައުންޑް ޓައިމްއަކަށް” ކުރުކުރެވޭނެ.
ތިލަފުށި ބަނދަރު ހުޅުވޭއިރު ޝިޕް-ޓު-ޝޯ ދެ ކީ ކެރޭނާއި އެއް މޮބައިލް ހާބަރު ކެރޭނު ގާއިމުކުރުމަށް ވެސް ވަނީ ކަނޑައަޅާފައި.
އެމްޕީއެލްއިން ބުނެފައިވާ ގޮތުގައި މާލޭ ވިޔަފާރި ބަނދަރުގައި އުޅަނދުފަހަރުން މުދާ ބަރުކޮށް ބާލައި ހެދުމުގެ މި ހިދުމަތް ދިނުމަށް މިހާރު ހަތް ދުވަހާއި 14 ދުވަހާ ދެމެދުގެ މުއްދަތެއް ހޭދަވެ އެވެ. ބަނދަރު ހުޅުވޭއިރު ޝިޕް-ޓު-ޝޯ ދެ ކީ ކެރޭނާއި އެއް މޮބައިލް ހާބަރު ކެރޭނު ގާއިމުކުރުމަށް ވެސް ވަނީ ކަނޑައަޅައިފަ އެވެ.
މާލޭ ވިޔަފާރި ބަނދަރު ތިލަފުއްޓަށް ބަދަލުކުރުމުގެ މަޝްރޫއުގެ ދަށުން، އެ ތަނުގައި އިންޓަނޭޝަނަލް އަދި ޑޮމެސްޓިކް ކީ-ވޯލް ތަރައްގީކުރުމުގެ މަސައްކަތް ޗައިނާ ހާބަ އިންޖިނިއަރިން ކޮމްޕެނީ (ސީއެޗްއީސީ) އާ ވަނީ މި އަހަރުގެ ޖުލައި 20 ގައި ހަވާލުކޮށްފަ އެވެ.
ކިޔުންތެރިންގެ ހިޔާލު