ޑެސްޓިނޭޝަން ޕްރިންސިޕަލްގައި ހުރި ކަންބޮޑުވުންތަކަށް ހައްލު ގެނެސްދޭނެކަމަށް ފަތުރުވެރިކަމާއި މަދަނީ އުދުހުންތަކާ ބެހޭ ވަޒީރު މުޙައްމަދު އަމީން ވިދާޅުވެއްޖެއެވެ. ވަޒީރު މިފަދައިން ވިދާޅުވީ ޤައުމީ ފަތުރުވެރިކަމުގެ ދުވަސް ފާހަގަކުރުމަށް ބޭއްވި ރަސްމިއްޔާތުގައި ވާހަކަދައްކަވަމުންނެވެ.
ފަތުރުވެރިކަމާބެހޭ ވަޒީރު މުޙައްމަދު އަމީން ވިދާޅުވީ ވޭތުވެދިޔަ ދެ މަސްދުވަހުގެ ތެރޭގައި ޑެސްޓިނޭޝަން ޕްރިންސިޕަލްގެ އުސޫލުން ޓީޖީއެސްޓީ ދެއްކުމުގެ އިތުރު ބައިތަކެއް ހިމަނައިގެން ޤާނޫނަށް ބަދަލުތަކެއް ގެނެވިފައިވާ ކަމަށެވެ.
މި ބަދަލުތަކާ ގުޅިގެން ފަތުރުވެރިކަމުގެ ދާއިރާގެ އިސް ފަރާތްތަކާއި ޓްރެވަލް އޭޖެންޓުންގެ ވަރަށް ބޮޑެތި ކަންބޮޑުވުންތަކެއް ހުރިކަން ސަރުކާރަށް ފާހަގަކުރެވިފައިވާ ކަމަށް ވަޒީރު ވިދާޅުވިއެވެ. އެ ކަންބޮޑުވުންތައް މައިގަނޑު ގޮތެއްގައި ގުޅިފައިވަނީ ކަނޑައެޅިފައިވާ މުއްދަތުތަކާއި އެކަމުގައި ހިމެނޭ އެހެނިހެން ސަބަބުތަކާކަން ފާހަގަކުރައްވާ ވަޒީރު ވިދާޅުވީ އެ މައްސަލަތަކާ ގުޅިގެން އިންޑަސްޓްރީގެ ގިނަ ފަރާތްތަކަކުން ރައީސުލްޖުމްހޫރިއްޔާގެ އަރިހަށް ހުށަހެޅުންތައް ފޮނުވާފައިވާކަމަށެވެ. އަދި ޑެސްޓިނޭޝަން ޕްރިންސިޕަލްގެ އުސޫލުން ޓީޖީއެސްޓީ ޤާނޫނަށް ވަރަށް އަވަހަށް ބަދަލުތަކެއް ގެނައުމަށް ރައީސް ނިންމަވާފައިވާކަމަށް ވަޒީރު ވިދާޅުވިއެވެ.
“މިވަގުތު ރައީސް ނިންމަވާފައި ވަނީ ޑެސްޓިނޭޝަން ޕްރިންސިޕަލްގެ އުސޫލުން ޓީޖީއެސްޓީ ޤާނޫނަށް ވަރަށް އަވަހަށް ބަދަލުތަކެއް ގެނައުމަށް.” ފަތުރުވެރިކަމާ ބެހޭ ވަޒީރު މުޙައްމަދު އަމީން ވިދާޅުވިއެވެ.
ވަޒީރުގެ ވާހަކަފުޅުގައި ވަނީ ދުނިޔޭގެ މަސްރަހަށް އަންނަ ބަދަލުތަކުގެ ސަބަބުން ފަތުރުވެރިކަމުގެ ސިނާއަތަށްވެސް ނޭދެވޭ އަސަރު ކުރާނެކަން މިއަހަރު ފެނިގެން ގޮސްފައިވާކަން ފާހަގަކުރައްވާފައެވެ. އެގޮތުން މިއަހަރު ފެށިގެން ދިޔައީ ފަތުރުވެރިކަމުގެ ސިނާޢަތުގައި އުންމީދީ އަހަރެއްގެ ގޮތުގައިނަމަވެސް މެދުއިރުމަތީގެ ހަނގުރާމައިގެ ސަބަބުން އަދި އެއާ ގުޅިގެން ބައިނަލްއަޤްވާމީ ދަތުރުފަތުރަށް ކުރިމަތިވި ގޮންޖެެހުންތަކުގެ އަސަރު ފަތުރުވެރިކަމުގެ ސިނާޢަތަށް ކުރިކަން ވަޒީރު ފާހަގަކުރެއްވިއެވެ.
ވަޒީރު ވިދާޅުވީ މި ގޮންޖެހުންތަކާއެކުވެސް ރާއްޖޭގެ ފަތުރުވެރިކަމުގައި ހުރި ވިލުންތެރިކަން ސާބިތުކޮށްދެމުންދިޔަކަމަށާއި ގުޅިގެން ކުރި މަސައްކަތްތަކުން ފަތުރުވެރިން އަންނަ މިންވަރު ކުރީގައި އޮތް ހާލަތަށް ވާޞިލްވަމުންދާކަމަށެވެ.
“މިދިޔަ އަހަރުގެ އޮގަސްޓް މަހާ އަޅާބަލާއިރު މިއަހަރުގެ އޮގަސްޓް މަހު ރާއްޖެ އައި ފަތުރުވެރިންގެ ޢަދަދު އިތުރު. މިއަހަރުގެ ސެޕްޓެމްބަރު މަހުގެ ނިޔަލަށް ރާއްޖެއަށް 1.57 މިލިޔަން ފަތުރުވެރިން ޒިޔާރްތަކުރި. މިއިން ހާމަކޮށްދެނީ ރާއްޖެއަށް އޮތް ޑިމާންޑާއި އުންމީދު.” ފަތުރުވެރިކަމާ ބެހޭ ވަޒީރު މުޙައްމަދު އަމީން ވިދާޅުވިއެވެ.
2040 ވަނަ އަހަރާ ހަމައަށް ދާންވާއިރަށް ދިވެހިރާއްޖެއަކީ ތަރައްޤީވެފައިވާ ޤައުމަކަށް ހެދުމަށް ކުރާ މަސައްކަތުގައި ފަތުރުވެރިކަން ސިންދަފާތު ކުރުމާއި ސިޔާސަތު އެއްގޮތް ކުރުމާއި އުފެއްދުންތެރިކަމުގެ ތަޖުރިބާގައި އެ އަމާޒަށް ވާޞިލްވުމަށް ގިނަ މަސައްކަތްތަކެއް ރާވާފައިވާކަމަށް ވަޒީރު ވިދާޅުވިއެވެ.
2027 ވަނަ އަހަރަކީ ވިޒިޓް މޯލްޑިވްސްގެ ގޮތުގައި ކަނޑައަޅާފައިވާ އަހަރުކަން ފާހަގަކުރައްވާ ވަޒީރު ވިދާޅުވީ އަންނަ އަހަރުވެގެންދާނީ ފަތުރުވެރިކަމުގެ ސިނާޢަތުން ކުރި ހޯދާފައިވާ ބައިނަލްއަޤްވާމީ ވާދަވެރިކަމުގެ ތެރޭގައި ރާއްޖޭގެ މަޤާމު އިތުރަށް ހަރުދަނާ ކުރުމަށް ލިބޭނެ ފުރުޞަތަކަކަށްކަމަށެވެ. އެކަމުގެ ނަފާ ރާއްޖޭގެ އިޤްތިޞާދަށް ކުރާނެކަމަށާއި “ވިޒިޓް މޯލްޑިވްސް އިޔަރ 2027” ވެގެންދާނީ އެންމެންގެ ޝާމިލުވުން އޮންނަ ޤައުމީ ކެމްޕޭނަކަށްކަމަށް ވަޒީރު ވިދާޅުވިއެވެ.
މި ރަސްމިއްޔާތުގައި ވާހަކަ ދައްކަވަމުން ވިޒިޓް މޯލްޑިވްސް ކޯޕަރޭޝަންގެ ސީއީއޯ އަދި މެނޭޖިން ޑިރެކްޓަރ އަބްދުﷲ ޔާސިރު ވިދާޅުވީ، މި އަހަރަކީ ފަތުރުވެރިކަމަށް ގޮންޖެހުންތަކާއި ކުރިމަތިވި އަހަރެއް ކަމަށެވެ. ނަމަވެސް މިހާރު ފަތުރުވެރިކަން ރަނގަޅުވަމުންދާކަން ފާހަގަކުރެއްވިއެވެ. އަދި މި އަހަރުގެ ކާމިޔާބީތަކަށްފަހު 2027ގައި ވިޒިޓް މޯލްޑިވްސް ފަށާނީ، ރާއްޖޭގެ ކާމިޔާބީއާއި ރާއްޖޭގެ ރަށްތަކާއި ސަޤާފަތް ފާހަގަކުރުމަށް އަޒުމު ކަނޑައަޅައިގެންކަމަށް ސީއީއޯ ވިދާޅުވިއެވެ. އަދި އެ މަސައްކަތުގައި މުޅި މުޖުތަމަޢު ބައިވެރިވާން ޖެހޭކަމަށް ވިދާޅުވިއެވެ.
މީގެއިތުރުން ޤައުމީ ފަތުރުވެރިކަމުގެ ދުވަސް ފާހަގަކުރާއިރު ރާއްޖޭގެ ފަތުރުވެރިކަމުގެ ތާރީޚަށް ބަލާލުން މުހިންމު ކަމަށާއި، ފަތުރުވެރިކަމަކީ އިޤުތިސާދުގެ މައި ލޭނާރަށްވާއިރު އެ ސިނާއަތުގައި މަސައްކަތްކުރާ މީހުންގެ އަގުވަޒަންކުރުން މުހިންމު ކަމަށްވެސް ސީއީއޯ ޔާސިރު ވިދާޅުވިއެވެ.
ރާއްޖޭގެ އެންމެ ފުރަތަމަ ރިސޯޓް ހުޅުވުނީ، 1972 ވަނަ އަހަރުގެ އޮކްޓޯބަރ މަހުގެ 3 ވަނަ ދުވަހުއެވެ. 2022 ވަނަ އަހަރުގެ ތަފާސްހިސާބުތަކަށް ބަލާއިރު، ފަތުރުވެރިކަމުގެ ސިނާއަތުގައި ޖުމްލަ 55,874 މީހުން މަސައްކަތް ކުރެއެވެ. އެހެންކަމުން، ފަތުރުވެރިކަމުގެ ސިނާއަތަކީ ރާއްޖޭގެ އިޤުތިޞާދާއި ވަޒީފާގެ ފުރުސަތުތަކަށް އިތުރު ފެހިކަމެއް ގެނެސްދިން ސިނާއަތެކެވެ.
ކިޔުންތެރިންގެ ހިޔާލު