ގައުމީ ފަތުރުވެރިކަމުގެ ދުވަހުގެ މުނާސަބަތުގައި ސޯޝަލް މީޑިއާގައި ހިއްސާކުރެއްވި މެސެޖެއްގައި، ފަތުރުވެރިކަމުގެ ދާއިރާ އިތުރަށް ކުރިއެރުވުމަށް ސަރުކާރުން އަބަދުވެސް ފުރިހަމަ އެއްބާރުލުން ދެއްވާނެ ކަމުގެ ޔަގީންކަން ފަތުރުވެރިކަމާއި މަދަނީ އުދުހުންތަކާ ބެހޭ ވަޒީރު މުޙައްމަދު އަމީން ދެއްވައިފިއެވެ.
މި މެސެޖުގައި ވަޒީރު ވަނީ ދުވަހުގެ ތަހުނިޔާ އަރިސްކުރައްވައި، ދިވެހިރާއްޖެއަކީ ދުނިޔޭގެ ފަތުރުވެރިކަމުގެ އެންމެ މަގުބޫލު މަންޒިލްގެ ގޮތުގައި ދެމިއޮތުމަށްޓަކައި ކެނޑިނޭޅި މަސައްކަތް ކުރައްވާ ހުރިހާ ފަރާތްތަކުގެ ޚިދުމަތްތަކުގެ އަގު ވަޒަންކުރައްވާފައެވެ. އަދި ދިވެހި ރައްޔިތެއްގެ ހައިސިއްޔަތުން ރާއްޖޭގެ ފަތުރުވެރިކަމުގެ ސިނާއަތާމެދު ފަޚުރުވެރިވާ ކަމަށްވެސް އެމަނިކުފާނު ފާހަގަކުރެއްވިއެވެ.
ފަތުރުވެރިކަމުގެ ދާއިރާއަކީ ދުނިޔެއާ ރާއްޖެ ގުޅުވައިދޭ މައިގަނޑު ވަސީލަތް ކަމަށާއި، މިއީ ގައުމީ އިގުތިޞާދުގެ މައި ތަނބުގެ އިތުރުން ދިވެހި ރައްޔިތުންނަށް ގިނަގުނަ އަގުހުރި ފުރުޞަތުތަކެއް ފަހިކޮށްދޭ ދާއިރާއެއް ކަމަށް ވަޒީރު ވިދާޅުވިއެވެ.
ކޮންމެ އަހަރެއްގެވެސް އޮކްޓޫބަރު މަހުގެ ތިން ވަނަ ދުވަސް ގައުމީ ފަތުރުވެރިކަމުގެ ދުވަހުގެ ގޮތުގައި ފާހަގަކުރަން ސަރުކާރުން ނިންމެވީ 2021 ވަނަ އަހަރުއެވެ. މި ދުވަސް ފާހަގަކުރުމަށް ކަނޑައެޅުނީ ރާއްޖޭގެ އެންމެ ފުރަތަމަ ރިސޯޓު ކަމަށްވާ ކުރުނބާ މޯލްޑިވްސް ނުވަތަ މާލެ އަތޮޅު ވިހަމަނާފުށި 1972 ދެވަނަ އަހަރުގެ އޮކްޓޫބަރު މަހުގެ ތިން ވަނަ ދުވަހު ހުޅުވުމާ ގުޅިގެންނެވެ.
އެންމެ ފުރަތަމަ 50 އެނދުގެ ޖާގައަކާއެކު އާދައިގެ ގޮތަކަށް ފެށި މި ސިނާއަތަކީ މިހާރު ރާއްޖޭގެ ގައުމީ އުފެއްދުންތެރިކަމުގެ ބޮޑު އިންސައްތައެއް ހިއްސާކުރާ މައި ސިނާއަތެވެ. ގައުމީ އިގުތިޞާދަށް ލިބޭ ބޭރު ފައިސާގެ ބޮޑު ބައެއް ފަތުރުވެރިކަމުން ލިބޭއިރު، މިއީ ގިނަ އަދަދެއްގެ ދިވެހިންނަށް ވަޒީފާގެ ފުރުސަތުތައް ފަހިވެގެން ގޮސްފައިވާ މުހިންމު ދާއިރާއެކެވެ.
ކިޔުންތެރިންގެ ހިޔާލު