ށ. މަރޮށީގައި ލެބޯޓަރީއެއް ގާއިމުކޮށް، 24 ގަޑިއިރު ސިއްހީ ހިދުމަތް ލިބޭނެ އިންތިޒާމު ހަމަޖެހިގެންދިއުމަކީ ބޮޑު ކުރިއެރުމެއް ކަމަށް ސިއްހަތާއި އާއިލާއާއި އިޖްތިމާއީ އެހީއާއި ބެހޭ ވަޒީރު ގީލާ އަލީ ވިދާޅުވެއްޖެއެވެ.
މަރޮށީގައި ލެބޯޓަރީގެ ހިދުމަތް ފައްޓަވައި ދެއްވާ ވާހަކަފުޅު ދައްކަވަމުން ވަޒީރު ވިދާޅުވީ، މިއަދަކީ މަރޮށީގެ ތާރީހުގައި ވަރަށް އުފާވެރި ވަރަށް ތާރީހީ ދުވަހެއް ކަމަށާއި، އަދި ރަށުގެ ސިއްހީ ހިދުމަތުގައި އިންގިލާބީ ބަދަލެއް އައިސްފައިވާ ދުވަހެއް ކަމަށެވެ.
ވަޒީރު އިތުރަށް ވިދާޅުވީ މިރަށުގެ ސިއްހީ މަރުކަޒުގައި އަލަށް ގާއިމު ކުރެވުނު، ލެބޯޓަރީގެ ހިދުމަތް ރަސްމީކޮށް ފެށުމާއެކު މިއީ މުޅި ޖަމާއަތަށް ލިބުނު އަގުހުރި ހަދިޔާއެއް ކަމަށެވެ. އަދި މަރުކަޒުގެ ހިދުމަތް 24 ގަޑިއިރަށް ބަދަލު ވެގެން ދިއުމަކީ އެންމެންނަށްވެސް ލިބޭ ވަރަށްބޮޑު ހިންހަމަޖެހުމެއް ކަމަށެވެ.
މީގެ ކުރިން ކުޑަ ކުޑަ ލޭގެ ޓެސްޓެއް ހަދާލަންވެސް ނުވަތަ ޑޮކްޓަރު ލިޔެދޭ ޓެސްޓްތައް ހަދަން ޖެހެނީ ކަނޑު ދަތުރު ކޮށްފައި ކައިރި ރަށަކަށް ގޮސްގެން ކަމަށާއި، އެކަމަށްދާ ވަގުތާއި ޖީބުންދާ ހަރަދާއި، އަދި ބަލި މީހާ އުފުލަން ޖެހޭ ތަކުލީފުތަކާއި އުނދަގޫ ތަކަށްވަނީ ނިމުމެއް އައިސްފައިވާ ކަމަށް ވަޒީރު ވާހަކަފުޅުގައި ފާހަގަކޮށްފައި ވެއެވެ.
ހައެއާއެކު މިހާރު ރަށުގައި ތިބެގެން އަވަހަށް ޓެސްޓްތައް ހެދި ބަލި ދެނެގަނެވި ވީ އެންމެ އަވަހަކަށް ފަރުވާ ފެށުމަށް މަގުފަހިވެފައިވާ ކަމަށާއި، މީގެއިތުރުން ބައްޔަކީ ނުވަތަ ކުއްލި ހާލަތަކީ ވަކި ވަގުތެއް ބަލާފައި އަންނަ ކަމެއް ނޫން ކަމަށް ވަޒީރު ވިދާޅުވިއެވެ.
އެގޮތުން ދަންވަރުގެ ވަގުތެއްގައި ކުއްލި ފަރުވާ އަކަށް ބޭނުން ވެއްޖެނަމަ ދޮރު ހުޅުވިފައި ހުރި މަރުކަޒަކާއި ތައްޔާރަށްތިބި ސިއްހީ ހިދުމަތްތެރިން ރަށުން ލިބެން ހުރުމަކީ ރައްޔިތުންގެ ފުރާނަ ސަލާމަތް ކުރަން އެޅިިގެންދާނެ ވަރަށް މުހިއްމު ފިޔަވަޅެއް ކަމަށް ވަޒީރު ވިދާޅުވިއެވެ.
“ބައްޔަކީ ނުވަތަ ކުއްލި ހާލަތަކީ ވަކި ވަގުތެއް ބަލާފައި އަންނަ ކަމެއް ނޫން. ދަންވަރުގެ ވަގުތެއްގައި ނަމަވެސް ކުއްލި ފަރުވާގެ ހާލަތެއް ބޭނުންވެއްޖެނަމަ، ދޮރު ހުޅުވިފައި ހުރި މަރުކަޒަކާއި، ތައްޔާރަށް ތިބި ސިއްހީ ހިދުމަތްތެރިން ރަށުން ލިބެން ހުރުމަކީ ރައްޔިތުންގެ ފުރާނަ ސަލާމަތް ކުރަން އެޅިގެންދާނެ ވަރަށް މުހިއްމު ފިޔަވަޅެއް.”ވަޒީރު
މި ބަދަލާއެކު ދާއިމީ ބަލި ތަކަށް ފަރުވާ ހޯދާ ފަރާތްތަކަށާއި، އުމުރުން ދުވަސްވީ މީހުންނަށާއި، އަދި ކުޑަކުދިންނަށް ބޭނުންވާ އަވަސް ފަރުވާ އެއްވެސް ދަތިކަމެއްނެތި ލިބިގެންދާނެ ކަމަށް ވަޒީރު ވިދާޅުވިއެވެ.
ކިޔުންތެރިންގެ ހިޔާލު