“ވަރަ އެކްސްޕޯ 2026” ގެ ގޯލްޑް ޕާޓްނަރ އަދި ޓެކްނޯލޮޖީ އެންޑް ޑިޒައިން ޕާޓްނަރެއްގެ ގޮތުގައި ނޯވަސް ޕްރައިވެޓް ލިމިޓެޑް ހަމަޖައްސައި، ދާޚިލީ ސަލާމަތާއި ފަންނިއްޔާތާ ބެހޭ ވުޒާރާއާއި ނޯވަސް ޕްރައިވެޓް ލިމިޓެޑާ ދެމެދު ފަހުމުނާމާއެއްގައި މިއަދު ސޮއިކޮށްފިއެވެ.
މި ފަހުމުނާމާގައި ސޮއިކޮށްފައި ވަނީ، މިއަދު ހެނދުނު 11:30 ގައި ދާޚިލީ ސަލާމަތާއި ފަންނިއްޔާތާ ބެހޭ ވުޒާރާގައި ބޭއްވި ހާއްސަ ރަސްމިއްޔާތުގައެވެ. އެއްބަސްވުމުގައި ވުޒާރާގެ ފަރާތުން ސޮއިކުރެއްވީ މިނިސްޓަރ އޮފް ސްޓޭޓް ފޮރ ހޯމްލޭންޑް ސެކިއުރިޓީ، ލޭބަރ އެންޑް ޓެކްނޮލޮޖީ، ޑރ. ޢަބްދުﷲ ނަޒީރުއެވެ. ނޯވަސް ޕްރައިވެޓް ލިމިޓެޑްގެ ފަރާތުން ސޮއިކުރެއްވީ މެނޭޖިން ޑިރެކްޓަރ މުޙައްމަދު ޖައިލަމް ރަފީޤެވެ.
މި ރަސްމިއްޔާތުގައި ދާޚިލީ ސަލާމަތާއި ފަންނިއްޔާތާ ބެހޭ ވުޒާރާގެ އިސް ބައެއް ބޭފުޅުން އަދި ނޯވަސް ޕްރައިވެޓް ލިމިޓެޑްގެ އިސް ބޭފުޅުން ބައިވެރިވެވަޑައިގެންނެވިއެވެ.
ނޯވަސް ޕްރައިވެޓް ލިމިޓެޑާ ދެމެދު ސޮއިކުރެވުނު ފަހުމުނާމާގެ މައިގަނޑު މަޤްޞަދަކީ ވަރަ އެކްސްޕޯގެ މެއިން އަދި ޒޯން އަރކްވޭސް ހެދުމާއި، ސައިޓް ޕްލޭން ހެދުމާއި، ޕޯސްޓަރ، ބެނަރ އަދި ބެޖު ފަދަ ޑިޒައިނާ ގުޅުންހުރި އެންމެހައި ކަންކަމުގައި އެހީތެރިކަމާއި އެއްބާރުލުން ފޯރުކޮށްދިނުމުގައި އެކުންފުނިން ޕާޓްނަރެއްގެ ގޮތުގައި ހަރަކާތްތެރިވުމެވެ.
“ވަރަ އެކްސްޕޯ 2026” ބޭއްވުމަށް ހަމަޖެހިފައިވަނީ 2026 ވަނަ އަހަރުގެ ނޮވެންބަރު މަހުގެ 26 އިން ފެށިގެން 28 ގެ ނިޔަލަށް ހުޅުމާލޭގެ ސެންޓްރަލް ޕާކުގައެވެ. މިއީ ދައުލަތުގެ ގިނަ މުއައްސަސާތަކަކާއި އަމިއްލަ ވިޔަފާރިތަކުން ބައިވެރިވެގެން، ރާއްޖޭގައި ހުރި ވަޒީފާގެ ފުރުސަތުތަކާއި، އެކި ދާއިރާތަކުން ބޭނުންވާ ހުނަރުތަކާއި، އުފެއްދުންތެރިކަން ދައްކާލުމަށް ބޭއްވޭ އެންމެ ބޮޑު އެކްސްޕޯއެވެ.
އެކްސްޕޯގެ ސަބަބުން ވަޒީފާ ދޭ ފަރާތްތަކާއި ވަޒީފާ ބޭނުންވާ ފަރާތްތަކާ ސީދާ ބައްދަލުވެ، މަސައްކަތުގެ މާހައުލާ ގުޅޭ މަޢުލޫމާތު ބަދަލުކުރުމުގެ ފުރުސަތު ލިބިގެންދާނެ ކަމަށް ދާޚިލީ ސަލާމަތާއި ފަންނިއްޔާތާ ބެހޭ ވުޒާރާއިން ވިދާލުވިއެވެ. މީގެ އިތުރުން އެ ވުޒާރާއިން ވަނީ، ވަރަ އެކްސްޕޯއާ ބެހޭ އެންމެ ފަހުގެ މަޢުލޫމާތު www.varaexpo.mv އިން ލިބިވަޑައިގަންނަވާނެ ކަމަށް ވިދާޅުވެފައެވެ.
ކިޔުންތެރިންގެ ހިޔާލު