ހއ. ދިއްދޫގައި އިމާރާތް ކުރާ ހއ. އަތޮޅު ހޮސްޕިޓަލްގެ އާ އިމާރާތުގެ މަސައްކަތުގެ ތެރެއިން ލީން ކޮންކްރީޓް ކުރުމާއި، ސްޓްރިޕް ފޫޓިން ކޮންކްރީޓް ކުރުމުގެ މަސައްކަތުގެ އިތުރުން ޓައި ބީމްގެ ރީއިންފޯސްމަންޓާއި ޝަޓަރިންގް މަސައްކަތްތައް ކުރިއަށްދާ ކަމަށް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ) އިން ހާމަކޮށްފިއެވެ.
މި މަޝްރޫއަކީ ދިއްދޫގެ އިތުރުން މުޅި ހއ. އަތޮޅުގެ ރައްޔިތުންނަށް ޒަމާނީ ސިއްހީ ހިދުމަތް ފޯރުކޮށްދިނުމުގެ މަގުސަދުގައި ސަރުކާރުން ކުރިއަށްގެންދާ މުހިންމު މަޝްރޫއެކެވެ. ދިއްދޫގައި ހުންނަ އެ އަތޮޅު ހޮސްޕިޓަލްގެ އާ އިމާރާތުގެ އަމަލީ މަސައްކަތް ފެށުމަށްޓަކައި ބިންގާ އަޅާފައިވަނީ ދެހާސް ފަންސަވީސް ވަނަ އަހަރުގެ ނޮވެމްބަރު މަހުގެ ބާވީސް ވަނަ ދުވަހުއެވެ.
އެމްޓީސީސީން މައުލޫމާތު ދޭ ގޮތުގައި މި މަޝްރޫއުގެ ދަށުން ފަންސާސް އެނދުގެ ޖާގައިގެ ހޮސްޕިޓަލެއް އިމާރާތް ކުރުމުގެ އިތުރުން، އެއް ފަންގިފިލާގެ 24 ބްލޮކަކާއި ވަށާފާރު ރޭނުމުގެ މަސައްކަތް ހިމެނެއެވެ. މިއީ 185.5 މިލިއަން ރުފިޔާއަށް، 780 ދުވަހުގެ ތެރޭގައި ނިންމުމަށް ހަވާލުކޮށްފައިވާ މަޝްރޫއެކެވެ.
ހަތަރު ހާހަށްވުރެ ބޮޑު އާބާދީއެއް އޮންނަ ދިއްދޫއަކީ އަތޮޅުގެ ވެރިކަން ކުރާ ރަށް ކަމަށްވުމުން، ދުވާލެއްގެ މައްޗަށް އެތައް ބަޔަކު ސިއްހީ ފަރުވާ ހޯދުމަށް އެ ރަށަށް ދަތުރުކުރެއެވެ. ނަމަވެސް، މިހާރު ބޭނުންކުރަމުންދާ އަތޮޅު ހޮސްޕިޓަލް ބާވެ، ހިދުމަތްތައް ފުޅާނުވެ އޮތުމަކީ އަތޮޅުގެ ރައްޔިތުން އަބަދުވެސް ކުރަމުން އަންނަ ބޮޑު ޝަކުވާއެކެވެ.
މި މަޝްރޫއު ނިމުމުން، ކުޅުދުއްފުށި ސިޓީއަށް ނުވަތަ މާލެ ސިޓީއަށް ދާންނުޖެހި، ތިލަދުންމަތީގެ ރައްޔިތުންނަށް އަމިއްލަ ސަރަހައްދުން ޒަމާނީ ސިއްހީ ފަރުވާ ލިބޭނެ ގޮތް ހަމަޖެހިގެންދާނެއެވެ. އެމްޓީސީސީން ބުނެފައިވަނީ ދިއްދޫ ހޮސްޕިޓަލްގެ އާ އިމާރާތުގެ މަސައްކަތް ނިމުމާއެކު، ތިލަދުންމަތީގައި ދިރިއުޅޭ އާންމު ރައްޔިތުންނަށް ސިއްހީ ހިދުމަތް ހޯދުމުގައި ބޮޑެތި ލުއިފަސޭހަތަކެއް ލިބިގެންދާނެ ކަމަށެވެ.
ކިޔުންތެރިންގެ ހިޔާލު