ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު، ނޭޕާލުގެ ޤާނޫނުއަސާސީ ދުވަހުގެ މުނާސަބަތުގައި އެ ޤައުމުގެ ރައީސް، ރައިޓް އޮނަރަބަލް ރާމްޗަންދްރަ ޕޯޑެލް އާއި ބޮޑުވަޒީރު، ރައިޓް އޮނަރަބަލް ބަލެންދުރަ ޝާހަށް ތަހުނިޔާ އާއި ހެޔޮއެދުންތައް ފޮނުއްވައިފިއެވެ.
ރައީސުލްޖުމްހޫރިއްޔާ ސެޕްޓެމްބަރު 19 ވީ ހޮނިހިރު ދުވަހު، ވަކިވަކިން ފޮނުއްވި ސިޓީފުޅުތަކުގައި، ނޭޕާލާ ދެމެދުގައި އޮތް ގާތް ގުޅުމަކީ އިޙްތިރާމާއި، ސުލްޙަމަޞްލަޙަތާއި، ހަމަޖެހުމާއި، ރައްޔިތުންގެ މެދުގައި އޮތް ގުޅުމުގެ މައްޗަށް ބިނާވެފައިވާ ގުޅުމެއްކަން ފާހަގަކުރެއްވިއެވެ. އަދި ކުރިއަށް އޮތް އަހަރުތަކުގައި މި ބަދަހި ގުޅުން އިތުރަށް ވަރުގަދަވެގެންދާނެ ކަމަށް އުންމީދު ކުރައްވާ ކަމަށް އެމަނިކުފާނު ވިދާޅުވިއެވެ.
އަދި ދެ ޤައުމުގެ ދެމެދުގައި އޮތް ގުޅުން އިތުރަށް ބަދަހިކުރުމަށާއި، ތަފާތު ދާއިރާތަކުން އެއްބާރުލުން ދިނުމަށް ދިވެހިރާއްޖެއިން އިސްކަންދޭކަން ކަށަވަރުކޮށްދެއްވަމުން، ދެ ޤައުމާއި ދެ ޤައުމުގެ ރައްޔިތުންގެ މަންފާއަށްޓަކައި ދޭދޭ ގުޅުންތަކުގެ ތެރެއިންނާއި ސަރަޙައްދީ އަދި ބައިނަލްއަޤްވާމީ މަސްރަޙުގައި ގުޅިގެން ކުރެވޭ މަސައްކަތްތައް އިތުރަށް ފުޅާކުރުމަށް އުންމީދުކުރައްވާ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވިއެވެ.
ރައީސުލްޖުމްހޫރިއްޔާގެ ސިޓީފުޅު ނިންމަވާލައްވާފައިވަނީ ނޭޕާލުގެ ދެ ލީޑަރުންނަށް ފުރިހަމަ ޞިއްޙަތާއި އުފާވެރިކަމަށް އެދިވަޑައިގަންނަވަމުންނާއި، ނޭޕާލުގެ ރައްޔިތުންނަށް އަމާންކަމާއި، އެކުވެރިކަމާއި، ފާގަތިކަމަށް އިޚްލާޞްތެރިކަމާއެކު އެދިވަޑައިގަންނަވަމުންނެވެ.
ކިޔުންތެރިންގެ ހިޔާލު