ސަރަހައްދުގައި ހަރަކާތްތެރިވާ އިސްރާއީލާ ދެކޮޅު ޖަމާއަތްތަކާ ގުޅިގެން އެތައް ދިމާއަކުން އެއްފަހަރާ އިސްރާއީލަށް ހަމަލާދޭން އީރާނުން މަސައްކަތް ކުރަމުންދާ ކަމަށް އިސްރާއީލުން ތުހުމަތު ކޮށްފިއެވެ.
މިކަން ހާމަކޮށްފައިވަނީ އިސްރާއީލުގެ ޖެރޫސަލަމް ޕޯސްޓުން އާންމުކުރި ރިޕޯޓަކުންނެވެ.
މި ރިޕޯޓްގައި ބުނެފައިވަނީ، އިސްރާއީލާއެކު ދެން ފަށާ ހަނގުރާމައެއްގައި އެއްފަހަރާ އެތައް ފަރާތްތަކުން އިސްރާއީލަށް ހަމަލާދޭން އީރާނުން ތައްޔާރުވަމުންދާ ކަމަށް އިސްރާއީލުގެ ޖާސޫސީ އިދާރާއިން ގަބޫލުކުރާ ކަމަށެވެ.
އިސްރާއީލަށް ހަމަލާ ދިނުމުގައި އީރާނާއެކު، ލުބުނާނުގެ ހިޒްބުالله، ފަލަސްތީނުގެ ހަމާސް، ޔަމަނުގެ ހޫޘީން އަދި އީރާނާ ގުޅިފައިވާ އިރާގުގެ ހަތިޔާރުއެޅި ޖަމާއަތްތައްވެސް ބައިވެރިވާނޭ ކަމަށާއި، މިއީ، އެންމެން ގުޅިގެން އެއްފަހަރާ އިސްރާއީލަށް ހަމަލާދޭން ފެށުމުގެ ޕްލޭނެއް ކަމަށް އިސްރާއީލުން ގަބޫލު ކުރެއެވެ.
އެގޮތުން ރިޕޯޓްގައި ބުނެފައިވަނީ، އޮކްޓޯބަރު ހަތެއްގައި ތަޖުރިބާކުރި ނާކާމިޔާބީތަކަށް ރިއާޔަތްކޮށް، ޖޮއިންޓް ކޮމިއުނިކޭޝަންއާއި، ޕްލޭނިންއާއި، އޮޕަރޭޝަނަލް މެކޭނިޒަމްތައް އީރާނުން ބިނާކުރަމުންދާ ކަމަށެވެ.
މިކަމުގައި އިސްވެ ހަރަކާތްތެރިވަމުން ގެންދަނީ އީރާނުގެ ގުދުސް ފައުޖު ކަމަށްވެސް ބުނެފައި ވެއެވެ.
އިސްރާއީލަށް ހަމަލާ ދިނުމަށްޓަކައި މިސައިލާއި ޑްރޯންގެ ގާބިލްކަން އަލުން ގާއިމްކުރުމާއި، ގުޅިފައިވާ ތަމްރީނުތައް ބޭއްވުމާއި، ޖަމާއަތްތަކުގެ މެދުގައި ވިލަރެސްކުރުން ވަރުގަދަކުރަމުން ގެންދާ ކަމަށްވެސް ބުނެފައި ވެއެވެ.
ގުދުސް ފައުޖުން އެކަން ކުރަމުންގެންދަނީ ޖަމާއަތްތަކުގެ ވިއުގައިގައި ހިމެނޭ ކޮމާންޑަރުންނާ ގުޅިގެން ކަމަށްވެސް، ޖެރޫސަލަމް ޕޯސްޓްގެ ރިޕޯޓްގައި ބުނެފައި ވެއެވެ.
ސަރަހައްދުގެ ގައުމުތަކަށް އިސްވެ ހަމަލާ ދިނުމަށާއި، ބިންތަކަށް އަރައިގަތުމަށް މި ބާވަތުގެ ތުހުމަތުތައް ކުރުމަކީ އިސްތިއުމާރީ ދައުލަތުން އާންމުކޮށް ކުރަމުންދާ ކަމެކެވެ. ހަމާސްއިން އިސްރާއީލަށް ދޭ ހަމަލާތައް މަޑުޖައްސާލުމުން ބުނެފައިވަނީ، އީރާނުން ހަމާސްގެ މުޖާހިދުން ގެންގޮސް ތަމްރީނުކުރަމުންދާ ކަމަށެވެ.
ޣައްޒާ އިސްތިއުމާރުކޮށްގެން އުޅެނީ ހަމާސްގެ ފަރާތުން ނުރައްކާ އަންނަ ކަމަށް ބުނެއެވެ. ލުބުނާނުގެ ދެކުނު ހިފައިގެން އުޅެނީ ހިޒްބުﷲގެ ފަރާތުން ނުރައްކާ އަންނަ ކަމަށް ބުނެއެވެ.
ސޫރިޔާގެ ބިމަށް އަރައިގަނެ ބިންތައް ހިފައިގެން ތިބީ ސޫރިޔާގެ ދެކޮޅުވެރި ޖަމާއަތްތަކުން އިސްރާއީލަށް ނުރައްކާކުރާ ކަމަށް ތުހުމަތު ކޮށެވެ.
އިސްތިއުމާރީ ދައުލަތުން މިހާރު އެ އުޅެނީ އީރާނާ ދެކޮޅަށް އުދުވާނުތައް ފަށާނެ ހުއްޖަތެއް ހޯދުމަށެވެ. އިސްތިއުމާރީ ދައުލަތުން އެކަން ކުރިޔަސް ކުރާނީ އެމެރިކާ ހައްލާލައިގެން އެމެރިކާގެވެސް ބައިވެރިވުމާ އެކުގައެވެ.
ކިޔުންތެރިންގެ ހިޔާލު