އީރާނާއެކު އެއްބަސްވުމެއް ހެދުމަށް އިސްތިއުމާރީ އިސްރާއީލުން ހުރަސްއެޅި ކަމަށް އެމެރިކާގެ ނައިބް ރައީސް ޖޭޑީ ވޭންސް އިއުތިރާފްވެވަޑައި ގެންފިއެވެ.
ދަ ޖޯ ރޯގަން އެކްސްޕީރިއަންސް ޕޮޑްކާސްޓްގައި ވާހަކަ ދައްކަވަމުން އެމެރިކާގެ ނައިބް ރައީސް ވިދާޅުވީ، އޭނާ އިސްވެ ހުރެ އީރާނާ ވާހަކަ ދައްކައިގެން އެއްބަސްވުމެއް ހަދާފާނެތީ އިސްރާއީލުން ފަންޑުކޮށްގެން ވާހަކަތަކަށް ހުރަސްއަޅަން އިސްރާއީލު ސަރުކާރުގެ ތެރެއިން ވަރުގަދަ ކެމްޕެއިނެއް ކޮށްފައިވާ ކަމަށެވެ.
ޖޭޑީ ވޭންސް ވިދާޅުވީ، އީރާނާ ވާހަކަ ދައްކަން އޭނާ ތާއީދުކުރައްވާތީ، އިސްރާއީލުން ފަންޑުކޮށްގެން ޓްރަމްޕްގެ ކެމްޕެއިންގެ ކުރީގެ މެމްބަރަކު އޭނާއަށް ވަރަށް ބޮޑަށް ދިމާކޮށްލި ކަމަށެވެ. އޭނާއަށް ބަހުގެ ހަމަލާތައް ދެމުންގެންދިޔަ ކަމަށެވެ.
އަދި އިސްރާއީލުން ފަންޑުކޮށްގެން ސޯޝަލް މީޑިއާ އިންފްލުއެންސަރުން ލައްވައި އޭނާއާ އެތައް ގޮތަކުން ދިމާކޮށް އަގު ވައްޓާލަން އެތައް މަސައްކަތް ކުރި ކަމަށްވެސް ނައިބް ރައީސް ވޭންސް ވިދާޅުވިއެވެ.
އެމީހުންގެ އަމާޒަކަށްވީ، އީރާނު މައްސަލަ ޑިޕްލޮމަސީގެ ތެރެއިން ހައްލުކުރިޔަ ނުދިނުން ކަމަށްވެސް ވިދާޅުވިއެވެ.
ސުލްހަވެރިމަގުން އީރާނުގެ މައްސަލަ ހައްލުކުރުމުގެ ސިޔާސަތު ދޫކޮށް، އެމެރިކާއިން އީރާނާ ދެކޮޅަށް ހުއްޓާނުލާ ހަނގުރާމަ ކުރަން ބޭނުންވެ އެކަމަށް ބާރުއަޅަމުންދާ މީހުން އިސްރާއީލު ސަރުކާރުގެ ތެރޭގައި އެބަތިބި ކަމަށް ޖޭޑީ ވޭންސް ވިދާޅުވިއެވެ.
މުއްދަތެއް ނެތްގޮތަށް އީރާނު ހަނގުރާމަ ކުރިއަށް ގެންދިއުމަށްޓަކައި، ހަނގުރާމައާ ގުޅޭގޮތުން އެމެރިކާގެ އާންމު ރައްޔިތުންގެ ވިސްނުން ބަދަލުކުރަންވެސް، އިސްރާއީލު ސަރުކާރުގެ ތެރެއިން މަސައްކަތް ކުރަމުންދާ ކަމަށް އެމެރިކާގެ ނައިބް ރައީސް ވިދާޅުވިއެވެ.
އެމެރިކާގެ ނައިބް ރައީސްގެ މި ވާހަކަތަކަކީ، އިސްތިއުމާރީ ދައުލަތަށް ނިސްބަތް ކުރައްވައި އޭނާ ދެއްކެވި ވަރަށް ވަރުގަދަ ވާހަކަތަކެކެވެ. އިސްތިއުމާރީ ދައުލަތް ޖޭޑީ ވޭންސްވަނީ ފަޟީހަތް ކުރައްވާފައެވެ.
އޭނާގެ ވާހަކަތަކުން، އެމެރިކާ ސަރުކާރުގެ ތެރޭގައި އިސްރާއީލާ މެދު ބައިބައިވުން އުފެދިފައިވާ ކަމާއި، ވެރިކަންކުރާ ޕާޓީ ތެރެވެސް ބައިބައިވެފައިވާކަން ހާމަވާ ކަމަށް މުހައްލިލުން ވިދާޅުވެއެވެ.
ކިޔުންތެރިންގެ ހިޔާލު