ހޮރްމޫޒު ކަނޑުއޮޅިއާ އެއްވެސް އުޅަނދެއް ގާތްނުވާން، އީރާނުގެ އިންގިލާބީ ލަޝްކަރުން އަންގައި އިންޒާރު ކޮށްފިއެވެ.
އީރާނުގެ އިންގިލާބީ ލަޝްކަރުން މިކަމުގެ އިންޒާރުކޮށް ނެރުނު ބަޔާނުގައި ބުނެފައިވަނީ، ހޮރްމޫޒު ކަނޑުއޮޅި މިހާރު އެއްކޮށް ބަންދުކޮށްފައިވާ ކަމަށާއި، އެހެންކަމުން، ސަލާމަތީ ފިޔަވަޅެއްގެގޮތުން އެއްވެސް އުޅަނދެއް ހޮރްމޫޒާ ގާތްވެގެން ނުވާނޭ ކަމަށެވެ.
މިފިޔަވަޅުއެޅީ، އިސްތިއުމާރީ އިސްރާއީލުގެ އަމަލުތައް ހުރިގޮތުންނާއި، ހަމަލާތައް ހުއްޓާލުމަށް ވެފައިވާ އެއްބަސްވުމުގައި ހިމެނޭ ކަންކަން އެމެރިކާއިން ފުރިހަމަ ކުރަމުން ނުގެންދާތީ ކަމަށެވެ.
ހަމަލާތައް ހުއްޓާލުމަށް ވެވުނު އެއްބަސްވުމަށް އިހްތިރާމްކޮށް ހުކުރު ދުވަހުން ފެށިގެން ހިޒްބުﷲއިން ހަމަލާއެއް ނުދެއެވެ. އެހެން ނަމަވެސް، އިސްތިއުމާރީ ސިފައިން ހުއްޓާނުލާ ގެންދަނީ ލުބުނާނުގެ ދެކުނުގެ ރަށްތަކަށް އުދުވާނީ ހަމަލާތައް ދެމުންނެވެ.
މިއަދުގެ ހަމަލާތަކުގައި އެކަނިވެސް 23 މީހުން މަރުވެ އިތުރު އެތައް ބަޔަކު ޒަޚަމްވެފައިވާ ކަމަށް ލުބުނާނު ސަރުކާރުގެ ހެލްތު މިނިސްޓްރީން ބުނެއެވެ. އަދި އިސްތިއުމާރީ ސިފައިން އަދިވެސް މަސައްކަތް ކުރަމުން ގެންދަނީ ލުބުނާނުގެ ދެކުނުން އިތުރު އަވަށްތައް ހިފުމަށެވެ.
އިސްތިއުމާރީ ސިފައިން ލުބުނާނަށް ދެމުންގެންދާ ހަމަލާތައް ހުއްޓާނުލާތީ އީރާނުން ހޮރްމޫޒު ކަނޑޮއޮޅި އަލުން ބަންދުކުރިއިރު، އީރާނާއި އެމެރިކާއާ ދެމެދު ސޮއިކުރި އެމްއޯޔޫގެ ދަށުން ސްވިޒަރލޭންޑްގައި މާދަމާ ޓެކްނިކަލް ވާހަކަތައް ފަށަންވެސް ދަނީ ތައްޔާރުވަމުންނެވެ.
ކިޔުންތެރިންގެ ހިޔާލު