މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ) ގެ ޑިރެކްޓަރުންގެ ބޯޑުގައި ޢާންމު ޙިއްޞާދާރުން ތަމްސީލުކުރާ ދެ ޑިރެކްޓަރުންގެ މަޤާމަށް ކުރިމަތިލުމުގެ ފުރުޞަތު އެ ކުންފުނިން އިޢުލާނަކުން ހުޅުވާލައިފިއެވެ.
މިއީ އެމްޓީސީސީގެ ހިންގާ ޤަވާއިދުގެ 57 ވަނަ މާއްދާގެ ދަށުން ޢާންމު ޙިއްޞާދާރުންގެ ފަރާތުން އިންތިޚާބުކުރަންޖެހޭ ޑިރެކްޓަރުން ހޮވުމަށް ހުޅުވާލި ފުރުޞަތެކެވެ. އެ ކުންފުނީގެ ބޯޑުގައި ސަރުކާރުގެ ފަރާތުން ފަސް ޑިރެކްޓަރުން ތިއްބަވާއިރު، ޢާންމު ޙިއްޞާދާރުންގެ ތެރެއިން އިންތިޚާބުކުރަނީ ދެ ޑިރެކްޓަރުންނެވެ.
ކެޕިޓަލް މާރކެޓް ޑިވެލޮޕްމަންޓް އޮތޯރިޓީގެ ކޯޕަރޭޓް ގަވަރނަންސް ކޯޑުގައި ބާރުއަޅާފަދައިން، ކުންފުނީގެ ބޯޑު ޑިރެކްޓަރުކަމަށް ވީހާވެސް ގިނަ އަންހެން ބޭފުޅުން ކުރިމަތިލެއްވުމަށް އެމްޓީސީސީން އެދެއެވެ. ޑިރެކްޓަރުކަމަށް ކުރިމަތިލާ ފަރާތްތަކުގައި ކުންފުނީގެ ހިންގާ ޤަވާއިދުގެ 67 ވަނަ މާއްދާގައިވާ ޝަރުތުތައް ފުރިހަމަވާންޖެހޭނެއެވެ.
މި މަޤާމަށް ކުރިމަތިލާ ފަރާތަކީ އުމުރުން 30 އަހަރުވެފައިވާ ދިވެހި ރައްޔިތަކަށް ވާންޖެހޭނެއެވެ. އަދި އެ ފަރާތަކީ އެމްޓީސީސީގެ ޙިއްޞާދާރަކަށް ވުން ނުވަތަ ޙިއްޞާދާރު ކުންފުންޏަކުން ނޮމިނޭޓްކޮށް ބޯޑު ޤަރާރަކުން ހުއްދަދީފައިވާ ފަރާތަކަށް ވާންޖެހެއެވެ.
މީގެއިތުރުން އެޕްލިކޭޝަނާއެކު ހުށަހަޅާ ރިކޯޑު ބަލާ ފޯމު ސާފު ފަރާތަކަށް ވުމާއެކު، މާލީ ރިޕޯޓުތައް ދިރާސާކުރުމުގެ ޤާބިލުކަން ހުންނަންޖެހޭނެއެވެ. ބަނގުރޫޓުވެފައިވާ ފަރާތަކަށް ނުވުމާއި، އަދާނުކޮށް އޮތް ސާބިތު ދަރަންޏެއް ނެތުމަކީވެސް ޝަރުތެކެވެ.
ފާއިތުވި ފަސް އަހަރު ތެރޭގައި ބޯޑު މެންބަރުކަމުގެ މަސްއޫލިއްޔަތު އަދާކުރުމަށް ސަސްޕެންޑް ނުވަތަ ޑިސްކޮލިފައި ކޮށްފައިވާ ފަރާތްތަކަށް ކުރިމަތިއެއް ނުކެވޭނެއެވެ. އަދި އެމްޓީސީސީގެ ވަޒީފާއެއް އަދާކުރާ ފަރާތަކަށް ނުވުމާއި، މަސްލަޙަތު ފުށުއަރާ ވިޔަފާރިއެއްގައި ޝާމިލުވާ ފަރާތަކަށް ވެގެންނުވާނެއެވެ.
މި މަޤާމަށް ކުރިމަތިލެވޭނީ ޕަބްލިކް ނުވަތަ ސަރުކާރު ކުންފުންޏެއްގެ ބޯޑުގައި ނުވަތަ މެނޭޖްމަންޓް ފެންވަރުގައި މަދުވެގެން 10 އަހަރުގެ ތަޖުރިބާ ހުރި ފަރާތްތަކަށެވެ. ނުވަތަ ވިޔަފާރިއާ ގުޅުންހުރި ދާއިރާއަކުން ފުރަތަމަ ޑިގްރީއާއެކު ފަސް އަހަރުގެ ތަޖުރިބާ ނުވަތަ ޑިޕްލޯމާއާއެކު 10 އަހަރުގެ ޢަމަލީ ތަޖުރިބާ ލިބިފައިވާންޖެހެއެވެ.
ކޯޕަރޭޓް ގަވަރނަންސް، ބިޒްނަސް ޑިވެލޮޕްމަންޓް، ޤާނޫނު، ފައިނޭންސް އަދި ކުންފުނީގެ ވިޔަފާރިއާ ގުޅޭ ދާއިރާތަކުން މަތީ ތަޢުލީމާއި ތަޖުރިބާ ލިބިފައިވާ ފަރާތްތަކަށް އިސްކަންދެވޭނެއެވެ. ޝަރުތުހަމަވާ ފަރާތްތައް އިވެލުއޭޓްކުރާނީ ކުންފުނީގެ ނޮމިނޭޝަން އެންޑް ރެމިއުނެރޭޝަން ކޮމެޓީންނެވެ.
ކުރިމަތިލާ ފަރާތްތަކުގެ މަޢުލޫމާތު ބޯޑަށް ހުށަހެޅުމަށްފަހު، އަހަރީ ޢާންމު ޖަލްސާގެ ކުރިން ޢާންމުކޮށް އިޢުލާންކުރާނެއެވެ. މިއިންތިޚާބު އޮންނާނީ 2025 ވަނަ އަހަރުގެ އަހަރީ ޢާންމު ޖަލްސާގައެވެ.
ޝަރުތު ފުރިހަމަވާ ފަރާތްތަކުން 24 ސެޕްޓެމްބަރު 2026 ގެ 14:00 ގެ ނިޔަލަށް އެމްޓީސީސީގެ ޝެއަރހޯލްޑަރސް އޮންލައިން ޕޯރޓަލް މެދުވެރިކޮށް އެޕްލިކޭޝަން ހުށަހަޅަންޖެހެއެވެ.
ކިޔުންތެރިންގެ ހިޔާލު