ހުޅުމާލެ ތިންވަނަ ފިޔަވަހިން ދޫކޮށްފައިވާ ގޯތިތަކަށް ކަރަންޓު ގުޅައިދެވޭނީ އެ ސަރަޙައްދުގެ ލޭންޑް ޔޫސް ޕްލޭން (އެލްޔޫޕީ) އެޗްޑީސީން ފައިނަލްކުރުމުން ކަމަށް ސްޓެލްކޯއިން ބުނެފިއެވެ.
މީގެ ކުރިން ހުޅުމާލޭގެ ކަރަންޓު ނެޓްވޯކް ބެލެހެއްޓުމުގެ މަސައްކަތް ކުރަމުން އައީ އެޗްޑީސީންނެވެ. ނަމަވެސް ފާއިތުވި ޖޫން މަހުގެ 18 ވަނަ ދުވަހު ދެވަނަ ފިޔަވަހީގެ ކަރަންޓު ނެޓްވޯކް ވަނީ ސްޓެލްކޯއާ ޙަވާލުކޮށްފައެވެ. މި ބަދަލާއެކު، ދެވަނަ ފިޔަވަހީގެ ގޯތިތަކަށް ކަރަންޓު ގުޅުމުގައި ދިމާވަމުން އައި ދަތިތަކަށް ޙައްލެއް ލިބި، މިހާރު ގޯތި ލިބިފައިވާ ފަރާތްތަކުން އެދުމުން ކަނެކްޝަން ދޫކުރެވޭނެ ކަމަށް ސްޓެލްކޯއިން ވިދާޅުވިއެވެ.
ސްޓެލްކޯއިން ފާހަގަކުރި ގޮތުގައި، ކުރީގައި މި ސަރަޙައްދުގެ ކަރަންޓު ނެޓްވޯކްގެ މަސައްކަތްތައް ކުރިއަށް ގެންދިޔައީ އެޗްޑީސީން ބޭރުގެ ކުންފުނިތަކަށް ހަވާލުކޮށްގެންނެވެ. މީގެ ސަބަބުން ދިމާވި މައްސަލަތައް ޙައްލުކުރުމުގައި ބޮޑެތި ގޮންޖެހުންތަކެއް ހުރި ކަމަށް އެ ކުންފުނިން ބުނެއެވެ.
ޚިދުމަތް އިތުރަށް ހަރުދަނާކުރުމުގެ ގޮތުން، ދެވަނަ ފިޔަވަހީގައި އިމަޖެންސީ ރެސްޕޮންސް ސެންޓަރެއް ޤާއިމުކުރުމަށް ބޭނުންވާ ޖާގަ މިހާރު އެޗްޑީސީން ވަނީ ސްޓެލްކޯއަށް ދޫކޮށްފައެވެ. ކަރަންޓުގެ މައްސަލަތަކަށް އަވަހަށް ޖަވާބުދާރީވުމަށްޓަކައި މިއީ މުހިންމު ފިޔަވަޅެއް ކަމަށް ބެލެވެއެވެ.
ހުޅުމާލޭގެ އާބާދީ އިތުރުވަމުންދާ ދިއުމާ އެއްވަރަށް ޔުޓިލިޓީ ކެޕޭސިޓީ އިތުރުކުރުމުގެ މަސައްކަތްތައް ސަރުކާރުން ކުރަމުންދާ އިރު، ހުޅުމާލޭގައި 70 މެގަވޮޓުގެ އައު އިންޖީނުގެއެއް ބިނާކުރުމުގެ ޢަމަލީ މަސައްކަތް މި އަހަރު ތެރޭގައި ފެށުމަށް ސްޓެލްކޯއިން ދަނީ ތައްޔާރުވަމުންނެވެ.
ކިޔުންތެރިންގެ ހިޔާލު