ޚިދުމަތުގައި ގިނަ ދުވަސް ވެފައިވާ މުވައްޒަފުން ކުންފުންޏާއި ވަކިވެގެން ދިއުމަކީ ލިބޭ ދެރައެއް ނަމަވެސް، އެ މުވައްޒަފުން ވަކިވެގެންދަނީ ރަނގަޅު ލެގަސީއެއް ދޫކޮށްފައި ކަމަށް ސްޓެލްކޯގެ މެނޭޖިންގ ޑިރެކްޓަރ ޑރ. ޢަލީ އަޒްވަރު ވިދާޅުވެއްޖެއެވެ.
އެމަނިކުފާނު މިހެން ވިދާޅުވީ ސްޓެލްކޯއަށް ދިގު މުއްދަތަކަށް ޚިދުމަތްކުރައްވާފައިވާ ދެ މުވައްޒަފަކު ޚިދުމަތުން ވަކިވެވަޑައިގަތުމާ ގުޅިގެން އެ ބޭފުޅުންގެ ޚިދުމަތުގެ އަގުވަޒަންކުރުމުގެ ގޮތުން ބުދަ ދުވަހު ބޭއްވި ޙަފުލާގައެވެ. ޑރ. އަޒްވަރު ވިދާޅުވީ ތަޖުރިބާކާރު އެފަދަ ބޭފުޅުން ކުންފުންޏާއި ވަކިވެގެން ދިއުމަކީ ކުންފުންޏެއްގެ ޙައިސިއްޔަތުން ދިމާވާ ބޮޑު ގޮންޖެހުމެއް ކަމަށެވެ.
އެގޮތުން ކަންކަން ތަރައްޤީކުރުމުގެ ގޮތުން އިންޖީނުތައް އިތުރުކޮށް، އައު މޮޑެލްތައް ހޯދައި، ޢިމާރާތްތަކުގެ އާބާތުރަފިލުވައި ހެދުނު ނަމަވެސް އެފަދަ ފަރާތްތަކުގެ ތަޖުރިބާ އަލުން ލިބި ނުގަނެވޭނެ ކަމަށް ޑރ. އަޒްވަރު ފާހަގަކުރެއްވިއެވެ. މީގެއިތުރުން އެފަދަ މުވައްޒަފުން ގެންގުޅޭ އިންސްޓިޓިއުޝަނަލް މެމޮރީއަކީ މައްސަލަތަކަށް ޙައްލު ހޯދުމަށާއި ކުންފުނި ތަރައްޤީކުރުމަށް ވަރަށް މުހިންމު އެއްޗެއް ކަމަށްވެސް އެމަނިކުފާނު ވިދާޅުވިއެވެ.
ޑރ. އަޒްވަރު ވިދާޅުވީ ކަން މިހެން އޮތް ނަމަވެސް، ޚިދުމަތުން ވަކިވި މުވައްޒަފުންނަކީ ރަނގަޅު ލެގަސީއެއް ދޫކުރައްވާފައި ވަޑައިގަންނަވާ ބޭފުޅުން ކަމަށެވެ. އެގޮތުން އެ ބޭފުޅުންގެ ދަށުން މަސައްކަތްކުރަމުންދިޔަ ޒުވާން ޖީލުތަކަށް އެ ބޭފުޅުން ގިނަ ފިލާވަޅުތަކެއް ދަސްކޮށްދީފައިވާކަން އެމަނިކުފާނު ފާހަގަކުރެއްވިއެވެ.
މި ޙަފުލާގައި ޚިދުމަތުން ވަކިވެވަޑައިގެންނެވި ދެ ބޭފުޅުންނަކީ ވޭތުވެދިޔަ 48 އަހަރު ކުންފުންޏަށް ޚިދުމަތްކުރައްވާފައިވާ ސަރވިސް އިންޖިނިއަރ މުޙައްމަދު މަނިކާއި، ވޭތުވެދިޔަ 37 އަހަރު ކުންފުންޏަށް ޚިދުމަތްކުރައްވާފައިވާ އެސިސްޓަންޓް ސަރވިސް އިންޖިނިއަރ އަޙްމަދު މައުރޫފެވެ.
ކިޔުންތެރިންގެ ހިޔާލު