އއ. އުކުޅަހުގައި މި ސަރުކާރުން ޤާއިމްކުރި އައުޓްޑޯ ވޮލީކޯޓުގެ މަސައްކަތް މުޅިން ނިންމައި، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އެ ކޯޓު ރަސްމީކޮށް ހުޅުއްވައިދެއްވައިފިއެވެ. މި ކޯޓު ރަސްމީކޮށް ހުޅުވާފައި ވަނީ ރައީސުލްޖުމްހޫރިއްޔާ އުކުޅަހަށް ކުރެއްވި ރަސްމީ ދަތުރުފުޅުގެ ތެރެއިން ބޭއްވި ޚާއްޞަ ރަސްމިއްޔާތެއްގައެވެ.
އުކުޅަހުގައި އަލަށް ޤާއިމްކުރި މި ވޮލީކޯޓަކީ މިދިޔަ ޖުލައި މަހުގެ 16 ވަނަ ދުވަހު ޢަމަލީ މަސައްކަތް ފަށާފައިވާ މަޝްރޫޢެކެވެ. ޒުވާނުން ބާރުވެރިކުރުވާއި ކުޅިވަރާއި ހަށިހެޔޮކަމާ ބެހޭ ވުޒާރާއިން މި ކޯޓު އެޅުމުގެ މަސައްކަތް ޙަވާލުކޮށްފައި ވަނީ ޕްރޮކްސީ ގްރޫޕް ޕްރައިވެޓް ލިމިޓެޑާއެވެ. މުޅި މި މަޝްރޫޢަށް ދައުލަތުގެ ބަޖެޓުން ޖުމްލަ 1,359,163.58 ރުފިޔާ ޚަރަދުކޮށްފައިވެއެވެ.
މި ކޯޓަކީ ޒަމާނީ ވަސީލަތްތަކާ އެކު، ރޭގަނޑުވެސް ކުޅިވަރު ކުޅެވޭ ގޮތަށް ފުރިހަމަ ލައިޓް ސިސްޓަމެއް ހަރުކޮށް، ވަރަށް ފުރިހަމައަށް ފަރުމާކޮށްގެން ޤާއިމްކޮށްފައިވާ ވޮލީކޯޓެކެވެ. ކޯޓު ރަސްމީކޮށް ހުޅުވުމަށް ބޭއްވި ރަސްމިއްޔާތަށް ފަހު، އެ ކޯޓުގައި އެކުވެރިކަމުގެ ޚާއްޞަ ވޮލީ މެޗެއްވެސް ވަނީ ކުޅެފައެވެ.
އަތޮޅުތެރޭގެ އެކި ރަށްރަށުގައި ވޮލީ ކޯޓުތައް ތަރައްޤީކޮށް، ޒުވާނުންނަށް ކުޅިވަރު ކުޅޭނެ ފުރުޞަތުތައް ފަހިކޮށްދިނުމަށް ސަރުކާރުން ކުރަމުންދާ މަސައްކަތްތަކުގެ ދަށުން، މިހާރުވެސް އިތުރު 10 ރަށެއްގައި ވޮލީކޯޓުތައް ހެދުމުގެ މަސައްކަތްތައް ކުރިއަށްދާކަން ކުޅިވަރާ ބެހޭ ވުޒާރާއިން ފާހަގަކުރެއެވެ. މިފަދަ މަޝްރޫޢުތަކުގެ ސަބަބުން ރަށްރަށުގެ ޒުވާނުންގެ މެދުގައި ކުޅިވަރުގެ ރޫޙު އާލާވެ، ހަށިހެޔޮ މުޖުތަމަޢެއް ބިނާކުރުމަށް ސަރުކާރުން ގެންގުޅޭ ސިޔާސަތުތަކަށް ބޮޑު ކުރިއެރުމެއް ލިބިގެންދާނެއެވެ.
ކިޔުންތެރިންގެ ހިޔާލު