އަންނަ ސެޕްޓެމްބަރު މަހު ކުރިއަށް ގެންދިއުމަށް ތާވަލުކުރެވިފައިވާ އެ ޕާޓީގެ ކޮންގްރެސްއަކީ ދާޚިލީ ޑިމޮކްރަސީގެ ހަރުދަނާކަމުގެ ރަމްޒެއްކަން ސާބިތުކޮށްދެވޭނެކަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ. ރައީސް މިހެން ވިދާޅުވީ ސިލްސިލާ ޕޮޑްކާސްޓް “ނޭޝަން ޗެޓް”ގައި ވާހަކަފުޅުދައްކަވަމުންނެވެ.
ޕޮޑްކާސްޓުގައި ވާހަކަފުޅު ދައްކަވަމުން ރައީސް ވަނީ ވެރިކަން ހިންގާ ޕީޕަލްސް ނޭޝަނަލް ކޮންގްރެސް (ޕީ.އެން.ސީ) އިން ދާދި ފަހުން ކުރިއަށްގެންދެވި އެތެރޭގެ އިންތިޚާބަށް އަލިއަޅުއްވާލައްވައި، ޕާޓީގެ ކުރިމަގު ހިއްސާކުރައްވާފައެވެ. އެގޮތުން، މިއަހަރުގެ ސެޕްޓެމްބަރު މަހު ކުރިއަށް ގެންދިއުމަށް ތާވަލުކުރެވިފައިވާ އެ ޕާޓީގެ ކޮންގްރެސްއަކީ ދާޚިލީ ޑިމޮކްރަސީގެ ހަރުދަނާކަމުގެ ރަމްޒެއްކަން ސާބިތުކޮށްދެވޭނެކަމުގެ ޔަޤީންކަން، އެމަނިކުފާނު ވަނީ ދެއްވާފައެވެ.
މިދިޔަ މާރިޗު މަހު އާޓިފިޝަލް ބީޗުގައި ‘ދަ ގްރޭޓް އައްޑޫ’ގެ ނަމުގައި ބޭއްވި ހަރަކާތެއްގައި ވާހަކަފުޅު ދައްކަވަމުން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަނީ ޕީއެންސީގެ ކޮންގްރެސްއަކީ ވަރަށް އިންސާފުވެރި އަދި ދެފުށް ފެންނަ ކޮންގްރެސްއަކަށް ވާނެ ކަމަށް ވިދާޅުވެފައެވެ. އަދި މިއީ ޕާޓީގެ ތެރެއިން ސިޔާސީ ގޮތުން ކުރިއަށްދާން ބޭނުންވާ ފަރާތްތަކަށް ލިބޭނެ މުހިއްމު ފުރުސަތެއްކަން އެމަނިކުފާނު ފާހަގަކުރެއްވިއެވެ.
ޕީއެންސީން މަސައްކަތް ކުރާނީ ރައްޔިތުންގެ މަސްލަހަތު އިސްކޮށް، އެއް ޓީމެއްގެ ގޮތުގައި ކަމަށާއި، އެ ޕާޓީއަކީ ޑިމޮކްރަސީއަށް ލޯބިކުރާ ޕާޓީއެއް ކަމަށްވެސް ރައީސް ވަނީ ވިދާޅުވެފައެވެ. މީގެ އިތުރުން، 2023 ވަނަ އަހަރުގެ ނޮވެންބަރު މަހު 3،000 މެންބަރުންނާއެކު ފެށި މި ޕާޓީގެ މެންބަރުންގެ އަދަދު މިހާރު 75،000 އަށް އަރާފައިވާއިރު، ޕާޓީގެ މެންބަރުންގެ އަދަދު އެއްލައްކައަށް ވުރެ އިތުރުކުރުމަކީ އަމާޒެއް ކަމަށްވެސް ރައީސް ވަނީ ވިދާޅުވެފައެވެ.
ކިޔުންތެރިންގެ ހިޔާލު