ބަންގްލަދޭޝް ސަރުކާރުން ރާއްޖެއަށް ކަނޑައަޅާފައި ހުންނަވާ ސަފީރު ޑރ. މުހައްމަދު ނަޒްމުލް އިސްލާމް، ދިވެހި ސަރުކާރަށް ގިނަ އަދަދެއްގެ އަނބު މިއަދު ހަދިޔާކުރައްވައިފިއެވެ. ފޮރިން މިނިސްޓްރީގައި މިއަދު ބޭއްވި ހާއްސަ ރަސްމިއްޔާތެއްގައި، މި ހަދިޔާ ދިވެހި ސަރުކާރުގެ ފަރާތުން ހަވާލުވެވަޑައިގަތީ މިނިސްޓްރީ އޮފް ފޮރިން އެފެއާޒްގެ ޑެޕިއުޓީ ޗީފް އޮފް ޕްރޮޓޮކޯލް ބަދޫރާ ސައީދެވެ.
މިއަހަރުގެ އަނބު ހަދިޔާ ރާއްޖެއަށް ލިބިފައިވަނީ، ދިވެހިރާއްޖޭގެ 61 ވަނަ މިނިވަން ދުވަހުގެ މުނާސަބަތުގައި ބޭއްވި ރަސްމީ ހަރަކާތްތަކުގައި ބައިވެރިވެވަޑައިގަތުމަށް ބަންގްލަދޭޝްގެ ހާރިޖީ ވަޒީރު ޑރ. ހަލީލުރް ރަހުމާން ރާއްޖެއަށް ކުރެއްވި ރަސްމީ ދަތުރުފުޅާ ދިމާކޮށެވެ.
ރާއްޖޭގައި ހުންނަ ބަންގްލަދޭޝް ހައި ކޮމިޝަނުން މައުލޫމާތު ދޭ ގޮތުގައި، އެ ގައުމުގެ އެންމެ މަތީ ފަންތީގެ އަނބު ރާއްޖެއަށް ހަދިޔާކުރުމަކީ ދެ ގައުމުގެ ދެމެދުގައި އޮތް ޒަމާންވީ އެކުވެރިކަމާއި، ދެ ގައުމުގެ ރައްޔިތުންގެ ދެމެދުގައި އޮތް ގާތް ގުޅުން ރަމްޒުކޮށްދޭ ހާއްސަ ކަމެކެވެ. އަދި މިފަދަ ހަދިޔާތަކަކީ ދެ ގައުމުގެ ދެމެދުގައި އޮތް އިތުބާރާއި އެއްބާރުލުމުގެ މައްޗަށް ބިނާވެފައިވާ ވަރުގަދަ ގުޅުން އިތުރަށް ބަދަހިވެގެންދާ ކަމެއް ކަމަށް އެ ހައި ކޮމިޝަނުން ފާހަގަކުރެއެވެ.
ކިޔުންތެރިންގެ ހިޔާލު