ރައްޔިތުންގެ މަޖިލީހުގައި ހިމެނިވަޑައިގަންނަވާ އިދިކޮޅު އެމްޑީޕީގެ މެންބަރުން ސަރުކާރުގެ ވަޒީރުންނާ ކުރެއްވުމަށް ހުށަހެޅުއްވި ސުވާލުތަކުގެ ތެރެއިން އެންމެ ގިނަ ސުވާލު އަމާޒުވެފައިވަނީ މިނިސްޓަރ އޮފް ހައުސިން، ލޭންޑް އެންޑް އާބަން ޑިވެލޮޕްމަންޓް ޑރ. އަބްދުﷲ މުއްތަލިބަށް ކަމަށް ތަފާސްހިސާބުތަކުން ދައްކައިފިއެވެ.
ގަލޮޅު އުތުރު ދާއިރާގެ އެމްޑީޕީ މެންބަރު މުޙައްމަދު އިބްރާހީމް ހާމަކުރެއްވި ގޮތުގައި، މިހާތަނަށް ސަރުކާރުގެ ވަޒީރުންނާ ސުވާލުކުރުމަށް އެމްޑީޕީގެ މެންބަރުންގެ ފަރާތުން ޖުމްލަ 258 ނޯޓިސް ވަނީ ހުށަހެޅިފައެވެ. އޭގެ ތެރެއިން 180 ސުވާލު އަމާޒުވެފައިވަނީ އެންމެ ގިނައިން ސުވާލު ކުރެވުނު އަށް ވަޒީރުންނަށެވެ.
އާންމުކުރެވުނު ތަފާސްހިސާބުތަކަށް ބަލާއިރު، އިންފްރާސްޓްރަކްޗަރާއި ބޯހިޔާވަހިކަމުގެ ދާއިރާގެ ކަންކަމާ ގުޅޭގޮތުން ޑރ. މުއްތަލިބާ ސުވާލުކުރެއްވުމަށް 56 ނޯޓިސް ވަނީ ފޮނުވާފައެވެ. މިއީ އެހެން ވަޒީރުންނާ އަޅާބަލާއިރު ވަރަށް މަތީ އަދަދެއްކަން ފާހަގަކުރެވެއެވެ.
ޑރ. މުއްތަލިބުގެ އިތުރުން ދެން އެންމެ ގިނައިން ސުވާލު އަމާޒުވި ވަޒީރުންގެ ތެރޭގައި ހިމެނިވަޑައިގަންނަވަނީ ކުރީގެ ފިނޭންސް މިނިސްޓަރު މޫސާ ޒަމީރަށް 26 ސުވާލު، އިކޮނޮމިކް މިނިސްޓަރު މުޙައްމަދު ސައީދަށް 22 ސުވާލު، ކުޅިވަރާއި ހަށިހެޔޮކަމާ ބެހޭ މިނިސްޓަރު އަބްދުﷲ ރާފިއުއަށް 20 ސުވާލު، ފިނޭންސް މިނިސްޓަރު ހަސަން ޒަރީރަށް 19 ސުވާލު، ހޯމް މިނިސްޓަރު އަލީ އިހުސާނަށް 18 ސުވާލު، ހެލްތު މިނިސްޓަރު ޤީލާ އަލީއަށް 10 ސުވާލު، އަދި އިސްލާމިކް މިނިސްޓަރު ޑރ. މުޙައްމަދު ޝަހީމް އަލީ ސައީދަށް 9 ސުވާލެވެ.
މި ސުވާލުތަކަކީ ދާއިރާތަކުގެ ތަރައްގީގެ މަޝްރޫޢުތަކާއި ސަރުކާރުގެ ސިޔާސަތުތަކާ ގުޅޭގޮތުން މެންބަރުންނަށް އޮޅުންފިލުވަން ބޭނުންވާ މުހިންމު ކަންކަމާ ގުޅޭގޮތުން ހުށަހަޅާފައިވާ ސުވާލުތަކެކެވެ. ޚާއްސަކޮށް ބޯހިޔާވަހިކަމުގެ މަޝްރޫޢުތަކާ ގުޅޭގޮތުން ހުރި ކަންބޮޑުވުންތަކާއި ސުވާލުތައް ގިނަކަން މި ތަފާސްހިސާބުތަކުން ހާމަވެގެންދެއެވެ.
ކިޔުންތެރިންގެ ހިޔާލު