ދައުލަތުގެ ތެރޭގައި ހިނގާފައިވާ ޚިޔާނާތާއި ކޮރަޕްޝަނުގެ މައްސަލަތަކުގައި ގެއްލިފައިވާ ރައްޔިތުންގެ ފައިސާއާއި މުދާ ހޯދުމަށް ސަރުކާރުން ކުރަމުންދާ މަސައްކަތްތަކުން ކާމިޔާބު ނަތީޖާއެއް ނެރެވޭނެ ކަމުގެ ފުރިހަމަ ޔަގީންކަން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ދެއްވައިފިއެވެ.
ޕީއެސްއެމް ނިއުސްގެ “ނޭޝަން ޗެޓް” ޕްރޮގްރާމްގައި ވާހަކަފުޅުދައްކަވަމުން ރައީސުލްޖުމްހޫރިއްޔާ ވިދާޅުވީ، ދައުލަތުގެ ނިޒާމުގެ ތެރޭގައި ޒަމާންތަކެއްވަންދެން އަށަގެންފައިވާ ކޮރަޕްޝަނުގެ މައްސަލަތައް ހައްލުކުރުމަކީ ސަރުކާރުން ވަރަށް އިސްކަމެއް ދީގެން ކުރަމުންދާ މަސައްކަތެއް ކަމަށެވެ. މި މަސައްކަތް ކާމިޔާބު ކުރުމަށްޓަކައި ސަރުކާރާއި، ކޯޓުތަކާއި، އެންޓި-ކޮރަޕްޝަން ކޮމިޝަން (އޭސީސީ) އަދި ދައުލަތުގެ އެހެނިހެން އިދާރާތައް ގުޅިގެން މަސައްކަތްކުރުމުގެ މުހިންމުކަން އެމަނިކުފާނު ފާހަގަކުރެއްވިއެވެ.
ގެއްލިފައިވާ މުދަލާއި ފައިސާ އަނބުރާ ހޯދުމަށްޓަކައި އެސެޓް ރިކަވަރީ ބިލެއްގެ މަސައްކަތް މިހާރު ކުރަމުންދާކަން ހާމަކުރައްވައި ރައީސް ވިދާޅުވީ، އެ ބިލު މަޖިލީހަށް ހުށަހެޅުމުގެ އިތުރުން، މިހާރު ހުރި ޤާނޫނުތަކަށް ގެންނަންޖެހޭ އިސްލާހުތައް ވެސް ގެންނަންޖެހޭ ކަމަށެވެ. އަދި މި މަސައްކަތުގައި ދައުލަތުގެ މުއައްސަސާތައް އިތުރަށް ވަރުގަދަކޮށް ބާރުވެރިކުރުވުމަކީ ކޮންމެހެން ބޭނުންތެރި ކަމެއްގެ ގޮތުގައި އެމަނިކުފާނު ސިފަކުރެއްވިއެވެ.
ޚިޔާނާތުގެ މައްސަލަތަކުގައި ގެއްލިފައިވާ ފައިސާގެ ތެރެއިން ވީހާވެސް ބޮޑު ބައެއް ހޯދުމަށް ނަތީޖާ ނެރެވޭނެ ކަމަށް ގަބޫލުފުޅު ކުރައްވާ ކަމަށާއި، މިއީ ގޮންޖެހުން ބޮޑު މަސައްކަތެއްކަން ރައީސް ފާހަގަކުރެއްވިއެވެ. ޚާއްސަކޮށް އެމްއެމްޕީއާރުސީގެ ބޮޑު ޚިޔާނާތާއި އެ ނޫންވެސް ކޮރަޕްޝަނުގެ މައްސަލަތައް ރަނގަޅަށް ތަހުގީގުކޮށް، އެކަންކަމަށް ހައްލު ހޯދައިދިނުމަކީ ރައްޔިތުންނަށް ވެފައިވާ ވައުދެއް ކަމުގައި އެމަނިކުފާނު ވިދާޅުވިއެވެ.
ކޮރަޕްޝަނަށް މަގުފަހިވާ ގޮތަށް ހުރި ކަންކަން ނައްތާލުމަށްޓަކައި ސަރުކާރުން ގެންގުޅޭ ސިޔާސަތުތަކުގެ ތެރޭގައި ޚިދުމަތްތައް ޑިޖިޓަލް ކުރުމުގެ މަސައްކަތް ހިމެނެއެވެ. މިގޮތުން ސަރުކާރުން ތައާރަފުކޮށްފައިވާ “މޯލްޑިވްސް 2.0” ނިޒާމަކީ ދައުލަތުގެ ހިންގުން ދެފުށްފެންނަ އަދި ލުއިފަސޭހަ ނިޒާމަކަށް ހެދުމަށް އެޅޭ އެންމެ މުހިންމު ފިޔަވަޅުކަމަށް ރައީސުލްޖުމްހޫރިއްޔާ ވިދާޅުވިއެވެ. މި ނިޒާމުގެ ސަބަބުން ކޮރަޕްޝަން މަދުވެ، ބައިނަލްއަޤްވާމީ ފެންވަރުގައި ރާއްޖޭގެ ދަރަޖަ މަތިވެގެންދާނެ ކަމުގެ އުއްމީދު އެމަނިކުފާނު އާލާކުރެއްވިއެވެ.
ކިޔުންތެރިންގެ ހިޔާލު