ހުޅުމާލެ ދެވަނަ ފިޔަވަހީގެ ހިޔާ ޓަވަރު 13 ކައިރީގައި އޮންނަ ހުސްބިމަކުން ފޯނު ކޭބަލްތަކެއް ބުރިކޮށް ވަގަށް ނަގަން އުޅުނު 50 އަހަރުގެ ފިރިހެނަކު ފުލުހުން ހައްޔަރުކޮށްފިއެވެ.
ފުލުހުން މައުލޫމާތު ދީފައިވާ ގޮތުގައި، މި މައްސަލައިގައި ހައްޔަރުކޮށްފައިވަނީ ގދ. ނަޑެއްލާ، ވެލަބުލިގެ، އުމުރުން 50 އަހަރުގެ ޠާހިރު މުޙައްމަދެވެ. އޭނާ ހައްޔަރުކޮށްފައިވަނީ މިދިޔަ އަންގާރަ ދުވަހުގެ މެންދުރު 12:32 ހާއިރުއެވެ. ފުލުހުންނަށް ލިބުނު ރިޕޯޓަކާ ގުޅިގެން އެ ސަރަހައްދަށް ދިޔައިރު، އޭނާ ހުރީ ހިޔާ ޓަވަރު 13 ކައިރީގައި އޮންނަ ހުސްބިމެއްގެ ކޮށިތެރެއިން ފޯނު ކޭބަލްތަކެއް ބުރިކޮށްގެން ވަގަށް ނަގަން ތައްޔާރުވެގެންނެވެ.
ފުލުހުން އެ ސަރަހައްދަށް ގޮސް އޭނާ ހައްޔަރުކުރިއިރު، ވަގަށް ނަގާފައިވާކަމަށް ބެލެވޭ ކޭބަލްތަކެއް އޭނާގެ އަތުން ފެނިފައިވެއެވެ. އަދި އޭނާ ބުރިކޮށްފައިވާ ބައެއް ނަރުތައް ގޯންޏަކަށް އަޅާފައި ހުއްޓައި ފެނިފައިވާކަމަށްވެސް ފުލުހުން ބުނެފައިވެއެވެ. އޭނާގެ ބަންދާމެދު ގޮތެއް ނިންމުމަށް ކޯޓަށް ހާޒިރުކުރުމުން، މައްސަލައިގެ ތަހުގީގު ކުރިއަށްގެންދިއުމަށްޓަކައި އޭނާގެ ބަންދަށް 15 ދުވަހުގެ މުއްދަތެއް ކޯޓުން ވަނީ އަމުރުކޮށްފައެވެ.
މި މައްސަލަ ފުލުހުން މިހާރު އިތުރަށް ތަހުގީގު ކުރަމުންދާއިރު، މީގެކުރިންވެސް މާލެ ސަރަހައްދުގައި ކަރަންޓު ކޭބަލްތައް ބުރިކޮށް އަދި ޓްރާންސްފޯމަރުތަކުން ވައްކަންކުރާ މީހުންގެ މައްސަލަތައް ފެންމަތިވެފައިވެއެވެ. މިފަދަ ވައްކަންތަކުގެ ސަބަބުން އާންމު ހިދުމަތްތަކަށް ބުރޫއަރައި، ބޮޑެތި ގެއްލުންތަކާ ކުރިމަތިލާންޖެހޭކަން ފާހަގަކުރެވެއެވެ.
ކިޔުންތެރިންގެ ހިޔާލު