ހުޅުމާލޭގައި ބިނާކުރާ ބައިނަލްއަޤްވާމީ ފެންވަރުގެ ޢަރަބި އިސްލާމީ ސްކޫލްގެ ފުރަތަމަ ފިޔަވަހީގެ މަސައްކަތް 15 މިލިއަން ރުފިޔާއަށް އާރްސީސީއާ ޙަވާލުކޮށް ޢަމަލީ މަސައްކަތް ފަށައިފިއެވެ.
ހުޅުމާލޭ ރެހެންދީ ސްކޫލާ ޖެހިގެން އޮންނަ ބިމުގައި ތަރައްޤީކުރާ މި ސްކޫލްގެ ޢަމަލީ މަސައްކަތް ފެށުމުގެ ގޮތުން އާރްސީސީން މިހާރު ވަނީ ޝީޓްޕައިލް ކުރުމުގެ މަސައްކަތް ފަށާފައެވެ. މަދީނާ އިންވެސްޓްމަންޓުން މަޢުލޫމާތު ދެއްވާފައިވާ ގޮތުގައި، މި މަޝްރޫޢުގެ ފުރަތަމަ ފިޔަވައްސަށް ކަނޑައަޅާފައިވާ 15 މިލިއަން ރުފިޔާގެ ތެރެއިން ގާތްގަނޑަކަށް 45 އިންސައްތަ ފައިސާ ވަނީ ރާއްޖެއިން ބޭރުގެ އެހީގެ ގޮތުގައި ހަމަޖެހިފައެވެ. މަސައްކަތް ކުރިއަށްދާ ވަރަކުން އިތުރު މާލީ އެހީތެރިކަން ލިބޭނެކަމުގެ ޔަޤީންކަން އެ ކުންފުންޏަށް އޮތްއިރު، އެކަށީގެންވާ މިންވަރަށް އެހީ ނުލިބިއްޖެ ޙާލަތެއްގައި ބޭންކް ލޯނެއް ނުވަތަ އިސްލާމީ އުޞޫލުން ޞުކޫކެއް އިޝޫކުރުމަށް ވަނީ ނިންމާފައެވެ. ޞުކޫކުގެ ސްޓްރަކްޗަރ ޑޮކިއުމަންޓްތައް ތައްޔާރުކުރުމުގެ މަސައްކަތްވެސް ގާތްގަނޑަކަށް ނިމިފައިވާއިރު، މިކަމާމެދު ގޮތެއް ނިންމާނީ ފުރަތަމަ ފިޔަވަހި ނިމުމުންނެވެ.
މި ސްކޫލްގެ ކިޔެވުން އެންމެ ފުރަތަމަ ފެށުމަށް ހަމަޖެހިފައިވަނީ ޕްރީސްކޫލް ދަރިވަރުންނަށެވެ. އޭގެ ފަހުން ގްރޭޑް 1 އިން ފެށިގެން 10 އަކަށް، އަދި މަތީ ތަޢުލީމުވެސް އުނގަންނައިދެވޭ ފެންވަރަށް ސްކޫލް ފުޅާކުރުމަށް ކުންފުނިން ވަނީ އަމާޒުހިފާފައެވެ. ބައިނަލްއަޤްވާމީ ފެންވަރަށް ޢަރަބި އިސްލާމީ ތަޢުލީމު ފޯރުކޮށްދޭ މި މުއައްސަސާއިން، ފޯރުންތެރިކަން ކުޑަ ކުދިންނަށާއި ޚާއްޞަ އެހީއަށް ބޭނުންވާ ދަރިވަރުންނަށް ހިލޭ ކިޔެވޭނެ އިންތިޒާމު ހަމަޖައްސައިދޭނެކަމަށް ކުންފުނިން ބުނެފައިވެއެވެ.
ސްކޫލްގެ ބިމާ އިންވެގެން ބިނާކުރާ މިސްކިތުގެ މަސައްކަތް މާލާ ކޮންސްޓްރަކްޝަނާ ޙަވާލުކޮށްގެން ކުރިއަށްދާއިރު، މިކަމަށް މާލީ އެހީތެރިކަން ފޯރުކޮށްދެއްވަނީ މަރްޙޫމް ޝައިޚް އިސްމާޢީލް މުޙައްމަދާއި އެމަނިކުފާނުގެ ޢާއިލާއިންނެވެ. މި މިސްކިތްވެސް ވަރަށް އަވަހަށް ހުޅުވިގެންދާނެއެވެ. އަލް މަދީނާ އިންވެސްޓްމަންޓް ޕްރައިވެޓް ލިމިޓެޑަކީ އިސްލާމީ ފުރިހަމަ ތަޢުލީމެއް ދަރިވަރުންނަށް ފޯރުކޮށްދިނުމުގެ މަޤްޞަދުގައި އުފައްދާފައިވާ ކުންފުންޏެކެވެ. މި ކުންފުނީގެ ހިއްސާދާރުންގެ ތެރޭގައި އިސްލާމިކް މިނިސްޓަރ ޑރ. މުޙައްމަދު ޝަހީމް ޢަލީ ސަޢީދުގެ ދަރިކަލުން ޢަބްދުﷲ މާހިލް ޝަހީމާއި، އިސްލާމިކް މިނިސްޓްރީގެ ޑެޕިއުޓީ މިނިސްޓަރ ޢަލީ އަޙްސަންގެ އިތުރުން އިސްލާމީ މަރުކަޒުގެ އިސް އިމާމު އައްޝައިޚް މުޙައްމަދު ލަޠީފް ހިމެނިވަޑައިގަންނަވައެވެ.
ކިޔުންތެރިންގެ ހިޔާލު