ގދ. ތިނަދޫއަށް ނިސްބަތްވާ އަދި ގިނަ އަދަދެއްގެ މުދާ އުފުލަމުންދިޔަ “ޖަޒީރާ” ބޯޓު ވ. ފެލިދޫ ކައިރިން ދިޔަވެގެން އަޑިއަށް ހިނގައްޖެއެވެ.
މުދާ އުފުލާ މި ބޯޓު އަޑިއަށް ގޮސްފައިވަނީ ވ. ފެލިދޫގެ ފަސް ނޯޓިކަލް މޭލު ބޭރުންނެވެ. އެމްއެންޑީއެފުން މައުލޫމާތު ދީފައިވާ ގޮތުގައި، މި ބޯޓު ދިޔަވެގެން އަޑިއަށްދާކަމުގެ ރިޕޯޓު ލިބުމާއެކު އެމްއެންޑީއެފް މާލޭ އޭރިއާ ކޮމާންޑުގެ ކޯސްޓްގާޑް ސެކަންޑް ސްކޮޑްރަންގެ އުޅަނދެއް ވަނީ އެ ސަރަހައްދަށް ދަތުރުކުރަން ފަށާފައެވެ.
ބޯޓު އަޑިއަށް ދިއުމާ ގުޅިގެން އޭގައި ހުރި ބައެއް ތަކެތި އޮޔާ ދާތީ، އެ ސަރަހައްދުން ދަތުރުކުރާ ފަރާތްތަކުން ސަމާލުކަން ދިނުމަށް ކޯސްޓްގާޑުން ވަނީ އިލްތިމާސްކޮށްފައެވެ. ހާއްސަ ގޮތެއްގައި ރޭގަނޑުގެ ވަގުތުތަކުގައި ދަތުރުކުރާ އުޅަނދުފަހަރުން މިކަމަށް އިތުރަށް ސަމާލުވުމަށް ވަނީ އަންގާފައެވެ.
އެމްއެންޑީއެފް ކޯސްޓްގާޑުން ލަފާކުރާ ގޮތުގައި، ބޯޓުން އޮޔާދާ ތަކެތި ދަތުރުކުރަމުން ދަނީ ފެލިދޫގެ ފަސް ނޯޓިކަލް މޭލު ބޭރުން އިރުމައްޗަށެވެ. އެހެންކަމުން އެ ސަރަހައްދުން ދަތުރުކުރާ ކަނޑުއުޅަނދުފަހަރުން ދަތުރުކުރުމުގައި ރައްކާތެރިކަމުގެ ފިޔަވަޅުތައް އެޅުމަކީ ނުހަނު މުހިންމު ކަމެކެވެ.
ކިޔުންތެރިންގެ ހިޔާލު