މިއަދު ހެނދުނު ގ. ހުދުރުވާގޭގައި ހިނގި ނުރައްކާތެރި އަލިފާނުގެ ހާދިސާއެއްގައި އެ ގޭގެ އެއް ކޮޓަރި ބޭނުން ނުކުރެވޭ ވަރަށް އަނދައިފިއެވެ.
މިއަދު ހެނދުނުގެ ވަގުތެއްގައި ގ. ހުދުރުވާގޭގައި ވަނީ އަލިފާނުގެ ހާދިސާއެއް ހިނގާފައެވެ. ނެޝަނަލް ޑިޒާސްޓަރ މެނޭޖްމަންޓް އޮތޯރިޓީން މައުލޫމާތު ދެއްވާފައިވާ ގޮތުގައި، މި ހާދިސާގައި އެ ގޭގައި ރޯވި އަލިފާން މިހާރު ވަނީ އެއްކޮށް ނިއްވާލެވިފައެވެ. އަލިފާން ނިއްވާލުމުގެ މަސައްކަތް ކާމިޔާބުކަމާއެކު ނިންމާލެވިފައިވާއިރު، އިތުރު ތަންތަނަށް އަލިފާން ފެތުރުން ވަނީ ކޮންޓްރޯލް ކުރެވިފައެވެ.
މި ހާދިސާގެ ސަބަބުން ގ. ހުދުރުވާގެއަށް ވަނީ މާލީ ގޮތުން ބޮޑެތި ގެއްލުންތަކެއް ލިބިފައެވެ. އެގޮތުން އެ ގޭގެ އެއް ކޮޓަރި ވަނީ މުޅިން އަނދައި، ދެން އިތުރަށް ބޭނުން ނުކުރެވޭ ވަރަށް ހަލާކުވެފައެވެ. މައުލޫމާތު ލިބިފައިވާ ގޮތުގައި މި ގޭގައި ޖުމުލަ ހަތަރު މީހުން ދިރިއުޅެމުންދެއެވެ. މި ހާދިސާގައި އެއްވެސް މީހެއްގެ ފުރާނައަށް ނުވަތަ ހަށިގަނޑަށް ގެއްލުމެއް ލިބުނުކަމުގެ ރިޕޯޓެއް އަދި ކޮށްފައެއް ނުވެއެވެ.
އަލިފާނުގެ ހާދިސާއާ ގުޅިގެން ނެޝަނަލް ޑިޒާސްޓަރ މެނޭޖްމަންޓް އޮތޯރިޓީގެ ޓީމުތަކުން މިހާރު ދަނީ އެ ސަރަހައްދުގައި ހަރަކާތްތެރިވަމުންނެވެ. އެ އޮތޯރިޓީން ދަނީ ހާދިސާގެ ސަބަބުން ގެއްލުން ލިބުނު އާއިލާއަށް ބޭނުންވާ އަސާސީ އެހީތެރިކަން ފޯރުކޮށްދިނުމުގެ މަސައްކަތްތަކާއި، ލިބުނު ގެއްލުން ވަޒަންކުރުމުގެ މަސައްކަތްތައް ކުރިއަށް ގެންދަމުންނެވެ.
ކިޔުންތެރިންގެ ހިޔާލު