އިސްކަންދަރު ކޮށީގައި 15 ފަންގިފިލާގެ އޮފީސް އިމާރާތެއް ކޮންޓްރެކްޓަރ ފައިނޭންސިންގ އުސޫލުން އިމާރާތްކޮށްދޭނެ ފަރާތެއް ހޯދުމަށް ދިވެހި ފުލުހުންގެ ޚިދުމަތުން އިއުލާންކޮށްފިއެވެ.
މި މަޝްރޫއު ކުރިއަށްގެންދިޔުމަށް ނިންމާފައިވަނީ ކޮންޓްރެކްޓަރ ފައިނޭންސިންގ އުސޫލުންނެވެ. މި މަސައްކަތަށް ޝައުގުވެރިވާ ފަރާތްތަކުން ރަޖިސްޓްރީވުމުގެ ފުރުޞަތު މިހާރު ހުޅުވާލާފައިވާއިރު، އެ ފުރުޞަތު އަންނަ މަހުގެ 1 ވަނަ ދުވަހާ ހަމައަށް އޮންނާނެ ކަމަށް ފުލުހުންގެ ޚިދުމަތުން މަޢުލޫމާތު ދެއެވެ. މި މަޝްރޫއުގެ ދަށުން، މިހާރު އިސްކަންދަރު ކޮށީގައި ހުރި އިމާރާތް ތަޅާލައި، އެ ބިމުގައި އައު އިމާރާތް އެޅުމަށް ވަނީ ރޭވިފައެވެ.
މިއީ މިކްސްޑްޔޫސްޑް އިމާރާތެއްގެ ގޮތުގައި ތަރައްޤީކުރާ ތަނެކެވެ. މި އިމާރާތުގައި ސަރުކާރާއި އިދާރީ މަސައްކަތްތަކުގެ އިތުރުން، އޮޕަރޭޝަނަލް މެޑިކަލް ބޭނުންތަކާއި، ތަމްރީންތައް ކުރިއަށްގެންދިޔުމަށް ޚާއްސަ ޖާގަތައް ހިމެނޭނެއެވެ. އިމާރާތުގެ 3 ވަނަ ފަންގިފިލާ ސިއްޙީ ޚިދުމަތްތަކަށް ޚާއްސަ ކުރެވިފައިވާއިރު، 4 ވަނަ ފަންގިފިލާއިން ފެށިގެން 10 ވަނަ ފަންގިފިލާއާ ހަމައަށް އޮފީސް ބައިތައް ހުންނާނެއެވެ. މީގެ އިތުރުން، 11 ވަނަ ފަންގިފިލާއިން 13 ވަނަ ފަންގިފިލާ ޚާއްސަކުރަނީ އެކަމަޑޭޝަންއަށެވެ. މި ބައިގައި 80 އާއި 100 އާ ދެމެދުގެ އެނދު ހިމެނޭހެން، އަންހެނުންނަށް ޚާއްސަ ރޫމްތަކާއި ބޭރުން އަންނަ ފަރާތްތަކަށް ޚާއްސަ ރޫމްތައް ހިމެނޭނެއެވެ.
އިމާރާތުގެ ޖާގަ ތަނަވަސްކުރުމަށްޓަކައި ޕާކިންގއަށް ޚާއްސަ ސަރަޙައްދުތަކެއް ކަނޑައަޅާފައިވެއެވެ. ބޭސްމަންޓްގައި 28 އުޅަނދާއި 85 ސައިކަލް ޕާކުކުރެވޭނެ ޖާގަ ހަމަޖައްސަންޖެހޭއިރު، ފުރަތަމަ ފަންގިފިލާގައި 17 އުޅަނދާއި ދެވަނަ ފަންގިފިލާގައި 261 ސައިކަލް ޕާކުކުރުމުގެ ޖާގަ ހަމަޖެއްސުމަށް ވަނީ ކަނޑައަޅާފައެވެ. މި އިމާރާތުގެ ފަސޭހަކަމަށްޓަކައި 6 ލިފްޓް ބެހެއްޓުމަށްވެސް ވަނީ ހަމަޖެހިފައެވެ.
މި އިމާރާތުގެ އެންމެ މަތީ ދެ ފަންގިފިލާ ޚާއްސަކުރަނީ ފުލުހުންގެ ތަމްރީން ޕްރޮގްރާމްތައް ކުރިއަށްގެންދިޔުމަށެވެ. އެގޮތުން 6 ކްލާސްރޫމް، ލައިބްރަރީ، ކޮންފަރެންސް ރޫމް، މަލްޓިޕާޕަސް ހޯލް އަދި ޓްރެއިނިންގ ހޯލް ފަދަ ވަސީލަތްތައް މި އިމާރާތުގައި ގާއިމުކުރެވޭނެއެވެ. މި މަޝްރޫއު ނިމުމުން، ފުލުހުންގެ އިދާރީ އަދި ތަމްރީންގެ ޤާބިލުކަން އިތުރުވެ، އެއް ފުރާޅެއްގެ ދަށުން ގިނަ ޚިދުމަތްތަކެއް ފޯރުކޮށްދިނުމަށް މަގުފަހިވެގެންދާނެއެވެ.
ކިޔުންތެރިންގެ ހިޔާލު