މޯލްޑިވްސް އިމިގްރޭޝަނުން ހުޅުމާލޭ ފޭސް 1 ގައި ހިންގި ޚާއްޞަ އޮޕަރޭޝަނެއްގައި ގަވާއިދާ ޚިލާފަށް އުޅެމުންދިޔަ 20 ބިދޭސީއަކު ހިފަހައްޓައި އޭގެ ތެރެއިން 12 މީހަކު އެ އިދާރާގެ ބެލުމުގެ ދަށަށް ގެންގޮސްފިއެވެ.
މި މަހުގެ 15 ވަނަ ދުވަހު މޯލްޑިވްސް އިމިގްރޭޝަނުން ކުރިއަށް ގެންދިޔަ މި އޮޕަރޭޝަނަކީ ރާއްޖޭގައި ގަވާއިދާ ޚިލާފަށް އުޅޭ ބިދޭސީން ހޯދުމަށް ފަށާފައިވާ މަސައްކަތުގެ ތެރެއިން ހިންގުނު ހަރަކާތެކެވެ. މި އޮޕަރޭޝަން ހިންގާފައިވަނީ ހުޅުމާލޭ ފޭސް 1 ގެ އެކި ސަރަހައްދުތަކުގައެވެ. މި ހަރަކާތުގައި ޖުމުލަ 20 ބިދޭސީއަކު ހިފަހައްޓައި އެ މީހުންގެ ލިޔެކިޔުންތައް ބަލައި ފާސްކޮށްފައިވެއެވެ.
ބަލައި ފާސްކުރުމުގެ ތެރެއިން ގަވާއިދާ ޚިލާފަށް ރާއްޖޭގައި އުޅެމުންދާކަން ކަށަވަރުވި 12 ބިދޭސީއަކު އިމިގްރޭޝަންގެ ބެލުމުގެ ދަށަށް ވަނީ ގެންގޮސްފައެވެ. މިއީ އެތައް އަހަރެއް ވަންދެން ރާއްޖޭގައި ގަވާއިދާ ޚިލާފަށް ވިޔަފާރިކޮށް އެކި މަސައްކަތްތަކުގައި ހަރަކާތްތެރިވަމުން އައި ބައެއްކަން އިމިގްރޭޝަނުން ފާހަގަކުރެއެވެ. މިފަދަ ފަރާތްތައް ހޯދައި ފިޔަވަޅު އެޅުމަކީ ސަރުކާރުގެ މުހިންމު ސިޔާސަތެކެވެ.
މި އޮޕަރޭޝަންތަކާ ގުޅިގެން އިމިގްރޭޝަންގެ ބެލުމުގެ ދަށަށް ގެނެވޭ ފަރާތްތައް އެ މީހުން ނިސްބަތްވާ ގައުމަކަށް އަނބުރާ ފޮނުވާލުމުގެ މަސައްކަތް މިހާރު ދަނީ ކުރަމުންނެވެ. މިގޮތުން ބަންދުކުރެވޭ ފަރާތްތަކުގެ މައްސަލަތައް ތަހުގީގުކުރުމަށްފަހު ގާނޫނީ އިމުގެ ތެރެއިން ޑީޕޯޓުކުރުމުގެ ކަންކަން ހަމަޖައްސަމުންދާކަމަށް ކަމާބެހޭ އިދާރާއިން މައުލޫމާތުދެއެވެ. މި މަސައްކަތުގެ މައިގަނޑު މަގުސަދަކީ ރާއްޖޭގެ އިގުތިސާދަށާއި އިޖުތިމާއީ ފޭރާމަށް ކުރިމަތިވަމުންދާ ގޮންޖެހުންތައް ކުޑަކުރުމެވެ.
ކިޔުންތެރިންގެ ހިޔާލު