ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) އިން އިސްނަގައިގެން ހުޅުމާލޭގެ ފަޅުތެރެ ސާފުކުރުމަށް ހިންގި ހާއްސަ ހަރަކާތެއްގައި 61 ޖަމްބޯ ބޭގްގެ ކުނި ނަގައިފިއެވެ.
އެޗްޑީސީގެ މުވައްޒަފުން އަމަލީގޮތުން ބައިވެރިވެގެން ކުރިއަށް ގެންދިޔަ މި ހަރަކާތުގައި މައިގަނޑު ގޮތެއްގައި ނަގާފައިވަނީ މޫދަށް އުކާލާފައިވާ ޕްލާސްޓިކް ފުޅިއާއި، ދަޅުގެ އިތުރުން ތަފާތު އެކި ބާވަތްތަކުގެ ކުންޏެވެ. މިގޮތުން ޖުމްލަ 61 ޖަމްބޯ ބޭގް ފުރެންދެން ކުނި ނަގާފައިވާއިރު، މިއީ ފަޅުތެރޭގެ ދިރުންތަކަށް ލިބެމުންދާ ގެއްލުން ކުޑަކުރުމަށް އެޅުނު ވަރަށް މުހިންމު ފިޔަވަޅެކެވެ.
ހުޅުމާލެއަކީ ރައްޔިތުންނަށް ދިރިއުޅެން ފަސޭހަ، ރައްކާތެރި އަދި ސާފު ވެއްޓަކަށް ހެދުމަށްޓަކައި އެޗްޑީސީން އަންނަނީ ގިނަގުނަ މަސައްކަތްތަކެއް ކުރަމުންނެވެ. މިގޮތުން މަގުތަކާއި ޕާކުތަކުގެ އިތުރުން، މޫދާއި ގޮނޑުދޮށް ސާފުކޮށް ބެލެހެއްޓުމަކީ އެ ކޯޕަރޭޝަނުން ހާއްސަ ސަމާލުކަމެއް ދީގެން ކުރިއަށް ގެންދާ ކަންކަމެވެ. މިފަދަ ހަރަކާތްތަކުގެ ސަބަބުން އާންމުންގެ މެދުގައި ތިމާވެއްޓަށް ހޭލުންތެރިކަން އިތުރުވެ، ކުނި އުކާލުމުގައި ޒިންމާދާރުވުމަށް ބާރުއެޅިގެންދެއެވެ.
އެޗްޑީސީން މީގެ ކުރިންވެސް ވަނީ މިފަދަ ބޮޑެތި ހަރަކާތްތަކެއް ކާމިޔާބުކަމާއެކު ހިންގާފައެވެ. އެގޮތުން މިދިޔަ އަހަރުގެ އޮކްޓޫބަރު މަހުގެ ތެރޭގައި ކުރިއަށް ގެންދިޔަ “ކޯސްޓަލް ކްލީނަޕް” ހަރަކާތަކީ ފާހަގަކޮށްލެވޭ މަސައްކަތެކެވެ. އެ ހަރަކާތުގައި ހުޅުމާލޭގެ ގޮނޑުދޮށާއި މޫދު ސާފުކޮށް، ޖުމްލަ 2122 ކިލޯގެ ކުނި ވަނީ ނަގާފައެވެ. ކުރިއަށް އޮތް ތަނުގައިވެސް ތިމާވެށި ހިމާޔަތްކުރުމަށް މިފަދަ އިތުރު ހަރަކާތްތައް ރާވައި ހިންގުމަށް އެ ކޯޕަރޭޝަނުން ވަނީ އަމާޒު ހިފާފައެވެ.
ކިޔުންތެރިންގެ ހިޔާލު