ފ. ނިލަންދޫގައި ގާއިމުކުރާ އައު ނަރުދަމާ ނިޒާމުގެ މަޝްރޫޢުގެ ދަށުން ޕަންޕިންގ ސްޓޭޝަންތައް ބެހެއްޓުމުގެ މަސައްކަތް ބާރު ސްޕީޑުގައި ކުރިއަށްދާކަމަށާއި، މުޅި މަޝްރޫޢުގެ 40 އިންސައްތަ މިހާރު ނިމިފައިވާކަމަށް އެ ރަށު ކައުންސިލުން ހާމަކޮށްފިއެވެ.
ނިލަންދޫ ކައުންސިލްގެ ރައީސް ޢަލީ އަޙްމަދު ހާމަކުރެއްވި ގޮތުގައި، އެ ރަށުގައި އަލަށް އާބާދުވަމުންދާ ސަރަހައްދުތަކުގައި ނަރުދަމާ ހޮޅި އެޅުމުގެ މަސައްކަތްތައް މިހާރު ވަނީ އެއްކޮށް ނިމިފައެވެ. އަދި މިވަގުތު އެންމެ ބާރަށް ކުރިއަށްދަނީ ރަށުގެ ފަސް ސަރަހައްދެއްގައި ނަރުދަމާ ޕަންޕިންގ ސްޓޭޝަންތައް ނުވަތަ ޓޭންކުތައް ބެހެއްޓުމުގެ މަސައްކަތެވެ. މި މަޝްރޫޢުގެ މަސައްކަތް އެއްވެސް މެދުކެނޑުމެއްނެތި ކުރިއަށްދާކަމަށް ކައުންސިލުން ކަށަވަރުކޮށްދެއެވެ.
ދައުލަތުގެ ބަޖެޓުން ޚަރަދުކޮށްގެން ހިންގާ މި މަޝްރޫޢަކީ މާލޭ ވޯޓަރ އެންޑް ސްވަރޭޖް ކޮމްޕެނީއާ ހަވާލުކޮށްގެން ކުރިއަށްގެންދާ މަޝްރޫޢެކެވެ. ޖުމްލަ 69.6 މިލިއަން ރުފިޔާގެ މި މަޝްރޫޢު ނިންމުމަށް ކަނޑައަޅާފައިވަނީ 720 ދުވަހުގެ މުއްދަތެކެވެ. މިދިޔަ އަހަރުގެ ސެޕްޓެންބަރު މަހުގެ ތެރޭގައި އަމަލީ މަސައްކަތް ފެށި މި މަޝްރޫޢުގެ ތެރޭގައި ނަރުދަމާ ހޮޅި އެޅުމާއި، ޕަންޕިންގ ސްޓޭޝަން އަދި ޖަންކްޝަން ބެހެއްޓުމުގެ އިތުރުން އައުޓްފޯލް އެޅުމުގެ މަސައްކަތް ހިމެނެއެވެ.
ނިލަންދޫގައި މިހާރު ބޭނުންކުރަމުން އަންނަ ނަރުދަމާ ނިޒާމަކީ ސުނާމީ ކާރިސާއާ ގުޅިގެން ޕައިލެޓް ޕްރޮޖެކްޓެއްގެ ދަށުން ގާއިމުކޮށްފައިވާ ނިޒާމެކެވެ. މި ނިޒާމަށް ދިމާވެފައިވާ މައްސަލަތަކުގެ ސަބަބުން އެ ރަށުގެ ރައްޔިތުން އެތައް ދުވަހެއް ވަންދެން ވަނީ ބޮޑެތި ދަތިތަކަކާ ކުރިމަތިލާން ޖެހިފައެވެ. ނިމިދިޔަ ސަރުކާރުތަކުން މިކަމަށް ހައްލެއް ގެނައުމަށް މަސައްކަތް ފެށި ނަމަވެސް، އަމަލީ ގޮތުން އެކަށީގެންވާ މަސައްކަތްތަކެއް ކުރިއަށް ގޮސްފައިނުވާކަން ކައުންސިލުން ފާހަގަކުރެއެވެ. ނަމަވެސް މިހާރު ކުރިއަށްދާ އައު ނަރުދަމާ ނިޒާމުގެ މަސައްކަތް ނިމުމާއެކު، ރައްޔިތުންނަށް ދިމާވެފައިވާ ތަކުލީފުތަކަށް ދާއިމީ ހައްލެއް ލިބިގެންދާނެއެވެ.
ކިޔުންތެރިންގެ ހިޔާލު