ބޮޑުތަކުރުފާނު މަގު ފުޅާކޮށް ތަރައްގީކުރުމުގެ މަޝްރޫއުގެ ދަށުން މިހާރު ބަންދުކޮށްފައި އޮތް ސަރަހައްދަށް ފެރީތަކަށް ލެފޭނެ ވަގުތީ އިންތިޒާމެއް އެމްޓީސީސީން ހަމަޖައްސައިފިއެވެ.
އެމްޓީސީސީން އާންމުކޮށްފައިވާ މައުލޫމާތުގައިވާ ގޮތުން، ޕޯސްޓު އޮފީހާއި ކުރީގެ ނަސަންދުރާއާ ދެމެދުގައިވާ ޖެޓީ ސަރަހައްދަށް ފެރީ ލަފައި، ފަސިންޖަރުން އެރުމަށާއި ފޭބުމަށް މިހާރު ވަނީ ވަގުތީ ގޮތުން ހުއްދަ ދީފައެވެ. މި ހުއްދަ ދީފައިވީ ނަމަވެސް، އެ ސަރަހައްދުގައި މަގު ހެދުމުގެ މަސައްކަތް އަދިވެސް ކުރިއަށްދާތީ، އެއްގަމު އުޅަނދުފަހަރު ވަނުން ވަނީ މަނާކޮށްފައެވެ. ފެރީ އޮޕަރޭޓުކުރުމަށް ހާއްސަކޮށްފައިވާ ސަރަހައްދު އަންގައިދޭ ޗާޓެއް އެ ކުންފުނިން އާންމުކޮށްފައިވާއިރު، އެ ސަރަހައްދު ބޭނުންކުރާ ފަރާތްތަކުން މުވައްޒަފުންގެ އިރުޝާދުތަކާ އެއްގޮތަށް އަމަލުކުރުމަށް ވަނީ އިލްތިމާސްކޮށްފައެވެ.
މާލޭގެ އުތުރު ފަރާތުން ބޮޑުތަކުރުފާނު މަގު ޒަމާނީ ފެންވަރަށް ތަރައްގީކުރުމަށް ހިންގާ މި މަޝްރޫއުގެ ދަށުން މިހާރު ކުރިއަށްދަނީ މަގު ފުޅާކޮށް ތާރުއެޅުމުގެ މަސައްކަތެވެ. މީގެ އިތުރުން ފެން ހިންދާ ނިޒާމު ގާއިމުކުރުމާއި ދުވާރު ފުޅާކޮށް ހަތަރު ލޭނު ގާއިމުކުރުމުގެ މަސައްކަތްވެސް ހަލުއިކަމާއެކު އަންނަނީ ކުރަމުންނެވެ. މި މަޝްރޫއުގެ ދަށުން މީގެ ކުރިން ވަނީ އެމްއެމްއޭއިން ފެށިގެން މާލޭ ނޯތު ހާބަރާ ހަމައަށް އޮންނަ ސަރަހައްދުގައި ތާރުއަޅައި ނިންމާފައެވެ.
ނިމިދިޔަ އަހަރުގެ އޯގަސްޓު މަހުގެ 21 ވަނަ ދުވަހު ފެށި މި މަޝްރޫއު ކުރިއަށް ގެންދަނީ ތިން ބަޔަކަށް ބަހާލައިގެންނެވެ. އަށްސަތޭކަ ތިރީސް މީޓަރުގެ މި މަގު ހަތަރު ލޭނަށް ފުޅާކޮށް ނިމުމުން، މާލޭގެ ކާރޫބާރޫ ބޮޑުވުމާއި ތޮއްޖެހުމަށް އެކަށީގެންވާ ހައްލެއް ލިބިގެންދާނެ ކަމަށް ސަރުކާރުން ބުނެއެވެ. މިހާތަނަށް މަސައްކަތް ނިމިފައިވާ ސަރަހައްދުތައް ހުޅުވާލުމާއެކު މާލޭގެ ޓްރެފިކަށް ބޮޑު ލުޔެއް ވަނީ ލިބިފައެވެ.
ކިޔުންތެރިންގެ ހިޔާލު