މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ)ގެ ކެޕޭސިޓީ އިތުރުކުރުމުގެ މަސައްކަތް ސަރުކާރު މިހާރު ކުރަމުންދާކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެއެވެ.
ޕީއެސްއެމްގެ “ނޭޝަން ޗެޓް” ޕްރޮގްރާމުގައި މިރޭ ވާހަކަފުޅު ދައްކަވަމުން ރައީސް ވިދާޅުވީ މެދުއިރުމަތީގައި ފެށި ހަނގުރާމައިގެ ސަބަބުން ރާއްޖެއިން ކުރަންޖެހޭ ހަރަދުތަކައް ވަރަށް ބޮޑު ބަދަލުތަކެއް ގެންނަން ޖެހުނު ކަމަށެވެ. ނަމަވެސް، މިހާރު އެ ދަތިކަމުން އަރައިގެނެވޭ ހިސާބަށް އާދެވިފައިވާކަމަށް ރައީސް ވިދާޅުވިއެވެ.
“އެގޮތުން އެންމެ މުހިންމު އިސްކަމެއް މިދެނީ ބޮޑެތި މަޝްރޫއުތައް ހިންގާ ކުންފުނިތައް ހަރުދަނާ ކުރަން. ހާއްސަކޮށް، އެންމެ ގިނަ މަޝްރޫއު ހިންގަނީ އެމްޓީސީސީ. އެމްޓީސީސީގެ ކެޕޭސިޓީ ބޮޑުކުރަންޖެހޭ. ދެން އެ މަސައްކަތް މިހާރު އެބަ ދޭ ކުރިއަށް. އެއްކަމަށް އެމްޓީސީސީއަށް ބޭނުންވާ ބޭރު ފައިސާ ލިބޭނެ ގޮތްތައް މީ ޑޮލަރު ލިބޭނެ ގޮތްތައް” ރައީސް ވިދާޅުވިއެވެ.
ރައީސް ވިދާޅުވީ އެމްޓީސީސީއަށް ބޭރު ފައިސާ ލިބޭނެ ގޮތްވެސް ހަމަޖެހެމުންދާ ކަމަށާއި، މާ ލަސްތަކެއް ނުވެ ބޮޑު ހިލައާއި އެހެން ތަކެތި ގެނެސް، ތަރައްގީގެ މަޝްރޫތައް ފެށިގެންދާނެކަމަށް ރައީސް ވިދާޅުވިއެވެ. އެހެންކަމުން، ބަނދަރު ހެދުމާއި ރިވެޓްމެންޓް ޖެހުންފަދަ މަޝްރޫއުތައް ވަރަށް އަވަހަށް ފެށިގެންދާނެކަމަށް ރައީސް ވިދާޅުވިއެވެ.
އަދި ބިން ހިއްކުމުގެ ގިނަ މަސައްކަތްތަކެއް އެމްޓީސީސީއާ ހަވާލުކޮށްފައިވާއިރު، އިތުރު ޑްރެޖަރެއް ހޯދައިދިނުމުގެ މަސައްކަތް ކުރަމުންދާކަމަށް އެ މަނިކުފާނު ވިދާޅުވިއެވެ.
މިހާރު އެމްޓީސީސީ އޮތް މަހާޖައްރާފަށްވުރެ ތިން ގުނަ ބޮޑު މަހާޖައްރާފާއެއް ވަނީ ސެކިއުއާ ކުރެވިފައިކަމަށް ރައީސް ވިދާޅުވިއެވެ. މިއަހަރު ނިމެންވާއިރަށް އާ ޑްރެޖަރު ރާއްޖެ ގެނެވޭނެކަމަށް އުންމީދު ކުރެވޭ ކަމަށާއި، އެއިރުން ބިން ހިއްކުމުގެ މަޝްރޫއުތައް ބާރު ސްޕީޑުގައި ކުރިއަށްދާނެކަމަށް ރައީސް ވިދާޅުވިއެވެ.
ރޯޑް ޑިވެލޮޕްމެންޓް ކޯޕަރޭޝަން (އާރްޑީސީ) އެމްޓީސީސީއާ އެއްކޮށްލަނީ އާރްޑީސީގެ ވަސީލަތްތައް އެމްޓީސީސީގެ ތެރެއަށް ވައްދައި، އެމްޓީސީސީގެ ކެޕޭސިޓީ އިތުރުކޮށް، މަގު ހެދުމުގެ މަސައްކަތް ރަނގަޅު ފެންވަރެއްގައި ކުރިއަށް ގެންދިއުމަށްކަމަށް ރައީސް ވިދާޅުވިއެވެ.
ކިޔުންތެރިންގެ ހިޔާލު