ޔޫއޭއީގެ ނެޝެނަލް މެރިން ޑްރެޖިންގ ކޮމްޕެނީ (އެންއެމްޑީސީ) އާއި އެމްޓީސީސީ ގުޅިގެން ރާއްޖޭގައި މަޝްރޫޢުތައް ހިންގުމާއި އިންވެސްޓުމެންޓާ ގުޅޭ ގޮތުން އަބޫދާބީގައި މަޝްވަރާ ބައްދަލުވުމެއް ބާއްވައިފިއެވެ.
އެންއެމްޑީސީގެ އަބޫދާބީ ހެޑް އޮފީހުގައި ބޭއްވި މި ބައްދަލުވުމުގައި ރާއްޖެއިން ޔޫއޭއީއަށް ކަނޑައަޅުއްވާފައިވާ ސަފީރު ޠާރިޤް އިބްރާހީމް ބައިވެރިވެވަޑައިގެންނެވިއެވެ.
އެމްޓީސީސީގެ ފަރާތުން ޗެއާ ޕާސަން ސާދާ އިބްރާހީމާއި މެނޭޖިންގ ޑިރެކްޓަރ އަޙުމަދު ސަޢުދީގެ އިތުރުން އެ ކުންފުނީގެ އިސް ބޭފުޅުން ބައިވެރިވެވަޑައިގެންނެވި އިރު އެންއެމްޑީސީ ތަމްސީލުކުރެއްވީ އެ ކުންފުނީގެ ސީއީއޯ ނީލްސް ޑި ބްރާއެން އާއި އެ ކުންފުނީގެ އިސް ވެރީންނެވެ. ދެ ކުންފުނީގެ ދެމެދުގައި އެކި ދާއިރާތަކުން ގުޅުން ބަދަހިކުރުމާ މެދު މި ބައްދަލުވުމުގައި ފުޅާ ދާއިރާއެއްގައި ވާހަކަ ދެކެވުނެވެ.
އެ ގޮތުން އެމްޓީސީސީގެ މަޝްރޫޢުތަކަށް އެންއެމްޑީސީން ފައިސާ އިންވެސްޓުކުރުމާއި ޑްރެޖިންގ ސަޕޯޓާއި އެކިއެކި އާލާތްތައް ފޯރުކޮށްދިނުމާ ބެހޭ ގޮތުން މަޝްވަރާކުރެވުނެވެ. ހަމައެއާ އެކު މުވައްޒަފުންނަށް ތަމްރީނު ދިނުމާއި އެކްސްޗޭންޖް ޕްރޮގްރާމްތައް ހިންގުމާ ބެހޭ ގޮތުން ވެސް ވާހަކަ ދެކެވުނެވެ.
މި މަޝްވަރާތަކަށް ރިޢާޔަތްކޮށް ދެ ފަރާތުގެ ދެމެދުގައި އެއްބަސްވުމެއްގައި ސޮއިކުރުމަށް ހަމަޖެހިފައިވާ ކަމަށް އެމްޓީސީސީން ބުނެފައިވެއެވެ. އެންއެމްޑީސީ ގްރޫޕަކީ މެދުއިރުމައްޗާއި ދެކުނު އޭޝިއާގެ ޤައުމުތަކުގައި މެރިން ޑްރެޖިންގ ދާއިރާގައި 50 އަހަރުގެ ތަޖުރިބާ ލިބިފައި އޮތް ކުންފުންޏެކެވެ.
އެމްޓީސީސީ އަކީ ރާއްޖޭގެ އެކި ސަރަޙައްދުތަކުގައި ބިން ހިއްކުން ފަދަ ތަރައްޤީގެ ބޮޑެތި މަޝްރޫޢުތައް ހިންގާ ރާއްޖޭގެ މައި ކުންފުނިތަކުގެ ތެރެއިން ކުންފުންޏެކެވެ.
ހަބަރު
ކިޔުންތެރިންގެ ހިޔާލު