މޯލްޑިވިއަން ޑިމޮކްރެޓިކް ޕާޓީގެ ކުރިއަށް އޮތް ޗެއާޕާސަން އިންތިހާބު ކާމިޔާބު ކުރައްވާނީ އެމަނިކުފާނުކަން ކުރީގެ ރައީސް އިބްރާހީމް މުހައްމަދު ސޯލިހަށް ވެސް ޔަގީންވެވަޑައިގަންނަވާކަމަށް ކުރީގެ ރައީސް މުހައްމަދު ނަޝީދު ވިދާޅުވެއްޖެއެވެ.
ހުކުރު ދުވަހު ބޭއްވުމަށް ހަމަޖެހިފައިވާ މި އިންތިހާބުގައި ރައީސް ސޯލިހް ރަސްމީކޮށް ތާއިދުކުރައްވަނީ ގަލޮޅު ދެކުނު ދާއިރާގެ މެންބަރު މީކާއިލް އަހުމަދު ނަސީމަށެވެ. އެހެންނަމަވެސް، ކެމްޕޭން ހަރަކާތެއްގައި ވާހަކަފުޅުދައްކަވަމުން ރައީސް ނަޝީދު ވިދާޅުވީ، އިންތިހާބު ކާމިޔާބު ކުރައްވާނީ އެމަނިކުފާނުކަން ޔަގީންވާ ކަމަށާއި، އިންތިހާބަށްފަހު ޕާޓީ ކުރިއެރުވުމުގައި ރައީސް ސޯލިހް އެކުގައި މަސައްކަތް ކުރައްވާނެ ކަމުގެ އެއްވެސް ޝައްކެއް ނެތް ކަމަށެވެ.
އެމްޑީޕީގެ އެތެރޭގެ ސިޔާސީ ވާދަވެރިކަން ބޮޑުވެފައިވާ މި ދަނޑިވަޅުގައި، މީކާއިލްގެ ޓީމުން ވޯޓުގެ ފަރަގު ކުޑަކުރަން މަސައްކަތް ކުރި ނަމަވެސް، އެ ފަރަގު ކުޑަނުކުރެވޭނެކަން ވެސް ރައީސް ސޯލިހަށް އެނގިވަޑައިގަންނަވާނެ ކަމަށް ރައީސް ނަޝީދު ވިދާޅުވިއެވެ. މިއީ ޕާޓީގެ އެތެރޭގެ އިންތިހާބުތަކުގައި އާންމުކޮށް ފެންނަ ސިޔާސީ ވާދަވެރިކަމުގެ ތެރެއިން ޕާޓީގެ އިސް ލީޑަރުންގެ ފަރާތުން ފެންނަމުންދާ ކަންކަމެވެ.
މީގެ އިތުރުން 2028 ވަނަ އަހަރު ބޭއްވުމަށް ހަމަޖެހިފައިވާ ރިޔާސީ އިންތިހާބުގައި އެމްޑީޕީގެ ޓިކެޓް ހޯއްދެވުމަށް ރައީސް ސޯލިހްގެ އަރިހުގައި ތިއްބެވި ބައެއް ބޭފުޅުން ޝައުގުވެރިކަން ފާޅުކުރައްވަމުންދާ ކަމަށްވެސް ރައީސް ނަޝީދު ފާހަގަކުރެއްވިއެވެ. އޭގެ ތެރޭގައި ކުރީގެ ފޮރިން މިނިސްޓަރު އަބްދުﷲ ޝާހިދު، މާލެ ސިޓީގެ މޭޔަރު އާދަމް އާޒިމް އަދި ހުޅުމާލޭ ދެކުނު ދާއިރާގެ މެންބަރު ޑރ. އަހުމަދު ޝަމްހީދުގެ ނަން އެމަނިކުފާނު ފާހަގަކުރެއްވިއެވެ.
ރިޔާސީ ޓިކެޓަށް ގިނަ ބަޔަކު ވާދަކުރި ނަމަވެސް، މި ވަގުތު ޕާޓީގެ އެންމެ ބޮޑު އަމާޒަކަށް ވާންޖެހޭނީ ޗެއާޕާސަން އިންތިހާބަށްފަހު އެންމެން ގުޅިގެން ޕާޓީ ވަރުގަދަކޮށް، މިހާރުގެ ސަރުކާރު ޖަވާބުދާރީކުރުވުން ކަމަށް ރައީސް ނަޝީދު ވިދާޅުވިއެވެ.
ކިޔުންތެރިންގެ ހިޔާލު