މާދަމާ ރޭ ފަށާ ފީފާ ވޯލްޑް ކަޕް 2026 ގައި ސަޕޯޓް ކުރައްވަނީ އާޖެންޓީނާއަށް ކަމަށާއި، އެންމެ ކުޑައިރުން ފެށިގެންވެސް އާޖެންޓީނާއަށް ސަޕޯޓް ކުރައްވާ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެއެވެ.
ވޯލްޑް ކަޕާ ދިމާކޮށް، ވޯލްޑް ކަޕުގެ ސްޕޮންސަރެއް ވޯލްޑް ކަޕް ބޯޅައިގައި ރައީސްގެ ސޮއިކުރެއްވުމަށްފަހު ފުޓުބޯޅަ ލެޖެންޑުންނަށް ބަހަން ނިންމާފައިވާ އިރު، ރައީސް ވޯލްޑް ކަޕާ ގުޅޭގޮތުން ވާހަކަދެއްކެވީ އެ ބޯޅަތަކުގައި ސޮއިކުރައްވަމުންނެވެ. އެއީ ސްޕޯޓްސް މިނިސްޓަރު އަބްދުﷲ ރާފިއުއާ އެކުގައެވެ.
ރައީސް ވިދާޅުވީ އެންމެ ކުޑައިރުންސުރެވެސް އާޖިންޓީނާއަށް ސަޕޯޓް ކުރައްވާ ނަމަވެސް، މޮޅުވާނެ ޓީމެއް ދިމާކުރުން އެއީ އުނދަގޫކަމެއް ކަމަށެވެ. އޭގެ އިތުރުން ރައީސް ވިދާޅުވީ އިންގްލެންޑަކީވެސް ސަޕޯޓް ކުރައްވާ ޓީމެއް ކަމަށާއި، އާޖެންޓީނާ ނޫނީ ވޯލްޑް ކަޕް ނަގަން އެންމެ އެދެނީ އިންގްލެންޑް ކަމަށެވެ. ރައީސް ވިދާޅުވީ އާޖެންޓީނާއަށް ސަޕޯޓް ކުރަން ފެށުނީ ޑިއޭގޯ މަރަޑޯނާއަށް ކުރި ސަޕޯޓެއްގެ ސަބަބުން ކަމަށެވެ.
ރައީސް ވިދާޅުވީ މެޗުތައް އޮންނަ ގަޑިތަކުގެ ސަބަބުން، މެޗުތައް ބެލުން އުނދަގޫވާނެ ނަމަވެސް ވީވަރަކުން މެޗުތައް ބައްލަވާނެ ކަމަށެވެ. އޭގެ އިތުރުން ވާހަކަދައްކަވަމުން ރައީސް ވިދާޅުވީ ސަޕްރައިޒެއްގެ ގޮތުގައި މިފަހަރު ނެދަލޭންޑްސް ވޯލްޑް ކަޕް ނެގުންވެސް އެކަށީގެންވާ ކަމަށެވެ.
ކިޔުންތެރިންގެ ހިޔާލު