ބައިނަލްއަޤުވާމީ ކަނޑުތަކުގެ ދުވަހާ ގުޅުވައިގެން، ސާސް އީ ކޮންސްޓްރަކްޝަން ޕްރައިވެޓް ލިމިޓެޑުން ރާއްޖޭގެ ތާރީޚުގައި ފުރަތަމަ ފަހަރަށް މޫދާއި ގޮނޑުދޮށްތަކުން ކުނި ނަގާ ޚާއްޞަ އުޅަނދެއް ކަމަށްވާ ސާސް އީ ސީ ސްކައުޓް ތަޢާރަފުކޮށްފިއެވެ.
މި އުޅަނދު ތަޢާރަފުކުރުމަށްޓަކައި ތިލަފުށީގައި ހުންނަ އެ ކުންފުނީގެ ސައިޓުގައި މި މަހުގެ އަށްވަނަ ދުވަހު ވަނީ ޚާއްޞަ ރަސްމިއްޔާތެއް ބާއްވާފައެވެ. މި ރަސްމިއްޔާތު ޝަރަފުވެރިކޮށްދެއްވައި އުޅަނދު ރަސްމީކޮށް އިފުތިތާޙުކޮށްދެއްވީ މޫސުމީ ބަދަލުތަކާއި ތިމާވެއްޓާއި ހަކަތައާ ބެހޭ ވަޒީރު ޢަލީ ޝަރީފެވެ. މި ރަސްމިއްޔާތުގައި ވާހަކަފުޅުދައްކަވަމުން ވަޒީރު ވަނީ ސާސް އީ ކޮންސްޓްރަކްޝަންގެ މި އިސްނެގުމަށް ތަޢުރީފުކުރައްވައި، މިއީ ރާއްޖޭގެ ނާޒުކު ކަނޑުގެ ދިރުންތައް ރައްކާތެރިކުރުމަށާއި ތިމާވެށި ޙިމާޔަތްކުރުމުގެ ރޫޙު އާލާކުރުމަށް އެހީތެރިވެދޭނެ މުހިންމު މަސައްކަތެއްކަން ފާހަގަކުރައްވާފައެވެ.
ސާސް އީ ސީ ސްކައުޓަކީ ރާއްޖޭގެ ގޮނޑުދޮށްތަކާއި ފަޅުތެރެއިންނާއި މޫދުން ޕްލާސްޓިކާއި އެހެނިހެން ކުނިބުނި ނެގުމަށް ޚާއްޞަކޮށްގެން ފަރުމާކޮށްފައިވާ އުޅަނދެކެވެ. ސާސް އީ ކޮންސްޓްރަކްޝަނުން ހާމަކުރާ ގޮތުގައި މިއީ ތިމާވެށީގެ ޒިންމާދާރުކަމާއި ދެމެހެއްޓެނިވި ވިޔަފާރީގެ އުސޫލުތަކަށް އެ ކުންފުނިން ދޭ އަހައްމިއްޔަތުކަން ރަމްޒުކޮށްދޭ ވަރަށް މުހިންމު ފިޔަވަޅެކެވެ. މި އުޅަނދުގެ ސަބަބުން މުޖުތަމަޢަށް ފައިދާކުރުމުގެ އިތުރުން، އައްސޭރިފަށުގެ ސަރަޙައްދުތައް ޙިމާޔަތްކުރުމަށް ޢާންމުން ހޭލުންތެރިކުރުވުމަށްވެސް މަގުފަހިވެގެންދާނެ ކަމަށް އެ ކުންފުނިން ބުނެއެވެ.
ތިލަފުށީގައި ބޭއްވުނު މި ޚާއްޞަ ރަސްމިއްޔާތުގައި މޫސުމީ ބަދަލުތަކާއި ތިމާވެއްޓާއި ހަކަތައާ ބެހޭ ވުޒާރާގެ އިސް ބޭފުޅުންނާއި، ހައުސިންގ ޑިވެލޮޕްމަންޓް ކޯޕަރޭޝަންގެ މަންދޫބުންނާއި، ސާސް އީ ކޮންސްޓްރަކްޝަންގެ މެނޭޖިންގ ޑިރެކްޓަރު ޢަބްދުﷲ ސަވާދުގެ އިތުރުން ކުންފުނީގެ ޙިއްޞާދާރުންނާއި މުވައްޒަފުން ބައިވެރިވިއެވެ. މި ޙަފުލާގެ ތެރެއިން ކުންފުނީގެ މެނޭޖިންގ ޑިރެކްޓަރު ވަނީ ވަޒީރަށް ޚާއްޞަ ހަނދާނީ ފިލައެއްވެސް އަރުވާފައެވެ. އަމިއްލަ ވިޔަފާރިތަކުގެ ތެރެއިން އީޖާދީ ވިސްނުންތައް ބޭނުންކޮށްގެން ތިމާވެށި ޙިމާޔަތްކުރުމަށް މުހިންމު ދައުރެއް އަދާކުރެވިދާނެކަން މި އުޅަނދު ތަޢާރަފުކުރުމާއެކު ސާބިތުވެގެން ހިނގައްޖެއެވެ.
ކިޔުންތެރިންގެ ހިޔާލު