އިންޓަނޭޝަނަލް އޮލިމްޕިކް އެކަޑެމީ (އައިއޯއޭ) އިން އިންތިޒާމުކޮށްގެން ބާއްވާ 66 ވަނަ އިންޓަނޭޝަނަލް ސެޝަން ފޯ ޔަންގް އޮލިމްޕިކް އެމްބެސެޑާސްގައި ބައިވެރިވުމަށް ރާއްޖޭގެ ޒުވާން ދުވުންތެރިޔާ އައިޝަތު ޝަބާ ސަލީމް ގްރީސްއަށް ފުރައިފިއެވެ.
ގްރީސްގެ އެންޝިއެންޓް އޮލިމްޕިއާގައި އޮންނަ ޔޫތު އޮލިމްޕިކް އެމްބެސެޑާސް ސެޝަންއަކީ އިއްޔެއިން ފެށިގެން މިމަހުގެ 18 ވަނަ ދުވަހަށް ކުރިއަށްދާ ހަރަކާތެކެވެ. އެ ސެޝަނަކީ އޮލިމްޕިކް އެމްބެސެޑަރުން ބިނާކުރުމަށާއި، އޮލިމްޕިކް އަސާސްތައް ހިފަހައްޓާނެ ލީޑަރުން ބިނާކުރުމަށް ބާއްވާ ހާއްސަ ހަރަކާތެކެވެ.
ގްރީސްގައި ކުރިއަށްދާ ހަރަކާތުގެ ތެރޭގައި އޮލިމްޕިކްސްއާއި ކުޅިވަރުގެ އެހެނިހެން ތަޖުރިބާކާރުންގެ ލެކްޗާތައްވެސް ކުރިއަށްދާނެއެވެ. އަދި ގްރޫޕް އިވެންޓްތަކާއި އޮލިމްޕިކްސްގައި ވާދަކޮށްފައިވާ އެތުލީޓުންގެ ސެޝަންތައްވެސް ކުރިއަށް ގެންދާނެއެވެ. އޭގެ އޮލިމްޕިކް އުސޫލުތަކުގެ ހާއްސަ ވޯކްޝޮޕްތަކާއި އެކި ގައުމުތަކުގެ އެތުލީޓުންނާ ގުޅުން ބަދަހި ކުރުމަށް ހާއްސަ ފުރުސަތުތައްވެސް ޔޫތު އޮލިމްޕިކް އެމްބެސެޑާ ސެޝަންތަކުން ލިބިގެންދާނެއެވެ.
ޝަބާއަކީ މިވަގުތު ރާއްޖޭގައި ހުރި އެންމެ ކުރިއަރަމުން އަންނަ އެއް ދުވުންތެރިޔާ އެވެ. ޝަބާ ވަނީ ދާދިފަހުން ޗައިނާގައި ބޭއްވި ދެ މުބާރާތެއްގައިވެސް ރާއްޖެ ތަމްސީލު ކޮށްފައެވެ.
ކިޔުންތެރިންގެ ހިޔާލު