ވެރިކަން ކުރާ ޕީޕަލްސް ނެޝަނަލް ކޮންގްރެސް (ޕީއެންސީ)ގެ ކޮންގްރެސް ބާއްވަން ކުރިން ކަނޑައެޅި ތާރީހު އޯލެވެލް އިމްތިހާނުގެ ދުވަސްވަރާ ދިމާވާތީ، އެ އަށް ވުރެ އަވަހަށް ކޮންގްރެސް ބޭއްވުމަށް އެ ޕާޓީގެ އާއްމު މަޖިލީހުން ރޭ ފާސްކޮށްފި އެވެ. ޕީއެންސީގެ ލީޑަޝިޕުން ކުރިން ނިންމާފައި އޮތީ އެ ޕާޓީގެ ކޮންގްރެސް އަންނަ އޮކްޓޯބަރު މަހު ބޭއްވުމަށެވެ.
ޕީއެންސީގެ އިސް އޮފިޝަލަކު މައުލޫމާތު ދެއްވި ގޮތުގައި، ކޮންގްރެސް ބާއްވާ ތާރީހު އަވަސްކުރަން ރޭގެ ބައްދަލުވުމަށް ހުށަހެޅުއްވީ ޕާޓީގެ ރައީސް ޑރ. މުހައްމަދު މުއިއްޒެވެ. މި ހުށަހެޅުން ފާސްކުރީ ބައްދަލުވުމުގައި ބައިވެރިވި މެންބަރުންގެ އިއްތިފާގުންނެވެ.
“ކުރިން ކަނޑައެޅި ތާރީހު މި ދިމާވަނީ ޖީސީއީ އޯލެވެލް އިމްތިހާނު ބާއްވާ ދުވަސްވަރާ. އެހެންވެ ރައީސް އެދިވަޑައިގެންނެވީ އެ އަށް ވުރެ އަވަސްކުރަން،” އޮފިޝަލް
Advertisement
މި ކޮންގްރެސްއަކީ ޕާޓީގެ ޑިމޮކްރަސީ ހަރުދަނާކޮށް ވަރުގަދަ ކުރުމަށް ލިބޭ މުހިއްމު ފުރުސަތެއް ކަމަށް ރައީސް މުއިއްޒު ވަނީ މީގެ ކުރިން ވިދާޅުވެފަ އެވެ. އެގޮތުން ރާއްޖޭގެ ހުރިހާ ރަށެއްގައި ވެސް މި ކޮންގްރެސްއަށް ތައްޔާރުވުމުގެ މަސައްކަތް ފެށުމަށާއި، ރަށްރަށުގެ ސްޓިއަރިން ކޮމެޓީތަކާއި ދާއިރާތަކުގެ ރައީސުން ފަދަ މުހިއްމު މަގާމުތަކަށް އެންމެ އެކަށީގެންވާ ކެންޑިޑޭޓުން ހޮވުމުގެ މަސައްކަތް ކުރުމަށް ރައީސް ވަނީ ބާރުއަޅުއްވާފަ އެވެ.
ޕީއެންސީގެ ރައީސް އިތުރަށް ވިދާޅުވީ، ކޮންގްރެސްއަށް މީހުން އައްޔަންކުރާއިރު ގައުމާއި ރަށުގެ މަސްލަހަތުގެ އިތުރުން ދާއިރާގެ މަސްލަހަތު އިސްކުރާނެ ބޭފުޅުންނަށް އިސްކަންދޭން ޖެހޭނެ ކަމަށެވެ. މި ކޮންގްރެސްގެ ތައްޔާރީތައް މުޅި ރާއްޖޭގައި ފެށުމަށް ރައީސް ގޮވާލެއްވީ މިދިޔަ އޭޕްރިލް މަހު އއ. ރަސްދޫގައި ބޭއްވި ޚާއްސަ ޖަލްސާއެއްގަ އެވެ.
ކިޔުންތެރިންގެ ހިޔާލު