ވ. އަލިމަތާ ކައިރީގައި އޮންނަ ފަރުގެ ހޮހަޅައަކަށް ފީނަން ގޮސް އުޅެނިކޮށް ގެއްލުނު ފަތުރުވެރިން ހޯދުމުގެ އޮޕަރޭޝަންގައި ފުލުހުންގެ ޑައިވް ޓީމުން ދެއްކި ހިތްވަރަށް ހޯމް މިނިސްޓަރު ޢަލީ އިޙްސާނާއި ކޮމިޝަނަރ އޮފް ޕޮލިސް އަޙްމަދު މުޙައްމަދު ތައުރީފު ކުރައްވައިފިއެވެ.
މި މަހުގެ ސާދަ ވަނަ ދުވަހު ހިނގި މި ހިތާމަވެރި ހާދިސާގައި އިޓަލީގެ ފަސް ފަތުރުވެރިންނާއި، އެމްއެންޑީއެފްގެ ޑައިވަރު ސާޖަންޓް ފަސްޓް ކްލާސް މުޙައްމަދު މަހުދީ ވަނީ ނިޔާވެފައެވެ. ނިޔާވި ފަތުރުވެރިންގެ ހަށިގަނޑުތައް މިހާރު އިޓަލީއަށް ފޮނުވާލާފައިވާއިރު، އެ ގައުމުގެ ކަމާބެހޭ ފަރާތްތަކުން ވަނީ މި މަރާ ގުޅޭ ޖިނާއީ ތަހުގީގެއް ފަށާފައެވެ.
އިޓަލީގެ މީޑިއާތަކުން ރިޕޯޓުކޮށްފައިވާ ގޮތުގައި، މި މައްސަލައިގެ ތަހުގީގަށް ޖެނޯއާގެ ފުލުހުން ވަނީ ނިޔާވި ޑައިވަރުންގެ މޯބައިލް ފޯނުތަކާއި އެހެނިހެން އިލެކްޓްރޯނިކް އާލާތްތައް ހިފަހައްޓާފައެވެ. އަދި އެ މީހުންގެ ޕޯސްޓްމޯޓަމް ހެދުމަށް ވެސް ވަނީ ތާވަލުކުރެވިފައެވެ.
ގެއްލުނު މީހުން ހޯދުމުގެ މަސައްކަތް ފުރަތަމަ ފެށީ ފުލުހުންނާއި ސިފައިން ގުޅިގެންނެވެ. ނަމަވެސް، ފުރަތަމަ ޑައިވްގައި ސިފައިންގެ ޑައިވަރު މަހުދީ ނިޔާވުމާ ގުޅިގެން އެ އޮޕަރޭޝަން މެދުކަނޑާލުމަށްފަހު، އަލުން ފަށައި ނިންމާލީ ފިންލޭންޑުގެ ތަޖުރިބާކާރު ތިން ޑައިވަރުންގެ އެހީތެރިކަމާއެކުގައެވެ.
މި އޮޕަރޭޝަންގައި ހަރަކާތްތެރިވި ފުލުހުންނާ އާދީއްތަ ދުވަހު ކޮމިޝަނަރ އޮފް ޕޮލިސްގެ އޮފީހުގައި ބައްދަލުކުރައްވައި، ވަޒީރު އިޙްސާން އަދި ކޮމިޝަނަރ އޮފް ޕޮލިސް ވަނީ ފުލުހުންގެ ބުރަ މަސައްކަތާއި ހިތްވަރު ފާހަގަކުރައްވައި، އާންމުންނަށް ޚިދުމަތް ދިނުމާއި ގާނޫނީ ޒިންމާ އަދާކުރުމުގައި ދެމިތިބުމަށް ގޮވާލައްވާފައެވެ.
މި ހާދިސާގައި ނިޔާވެފައިވަނީ ޖެނޯއާ ޔުނިވަރސިޓީގެ ޕްރޮފެސަރ މޮނިކާ މޮންޓެފަލްކޯނޭ އާއި އޭނާގެ ދަރިފުޅު ޖޯޖިއާ ސޮމަކާލްގެ އިތުރުން، ރިސާޗަރ މޫރިއެލް އޮޑެނީނޯ، ރިސާޗް އެސިސްޓެންޓް ފެޑެރީކޯ ގުއަލްޓިއޭރީ އަދި އިންސްޓްރަކްޓަރ ޖިއަންލޫކާ ބެނެޑެޓީއެވެ.
މީހުން ސަލާމަތްކުރި ޓީމުން މައުލޫމާތު ދޭ ގޮތުގައި، މި މީހުން ހޮހަޅައަށް ވަނީ އަމިއްލައަށެވެ. އަދި އެ މީހުން ތާށިވީ ބަންދުވެފައިވާ މަގަކުން ކުރިއަށް ދެވުމުގެ ސަބަބުންނެވެ. ޑޭން ޔޫރަޕްގެ ސީއީއޯ ލޯރާ މަރޯނީ ވިދާޅުވި ގޮތުގައި، ހޮހަޅަ ތެރޭގައި އޮތް ވެލިގަނޑެއްގެ ސަބަބުން ލޮލަށް ފެންނަ މިންވަރު ދަށްވެ، ނުބައި މަގަކުން ދެވުނީ އެއީ ނުކުންނަ މަގު ކަމަށް ހީކޮށެވެ.
ހަތަރު ޑައިވަރުންގެ ހަށިގަނޑު އެއްތަނަކުން ފެނިފައިވާއިރު، ބެނެޑެޓީގެ ހަށިގަނޑު ފެނިފައިވަނީ ހޮހަޅައިގެ ފުރަތަމަ ބައިންނެވެ.
ކިޔުންތެރިންގެ ހިޔާލު