ކޮންޓްރެކްޓަރ ފައިނޭންސިންގ އުސޫލުން ބ. ދަރަވަންދޫ އެއަރޕޯޓުގެ ފަސިންޖަރު ޓަރމިނަލް އަލުން ތަރައްޤީކުރުމަށް ޝައުޤުވެރިވާ ފަރާތްތަކަށް އައިލެންޑް އޭވިއޭޝަން ސަރވިސަސްއިން ފުރުސަތު ހުޅުވާލައިފިއެވެ.
މި މަޝްރޫޢަށް ޝައުޤުވެރިކަން ފާޅުކުރުމުގެ ފުރުސަތު ޖޫން 4 ވަނަ ދުވަހުގެ ރޭގަނޑު 11:59 އާ ހަމައަށް ވަނީ ހުޅުވާލާފައެވެ. ސަރުކާރުން އައިލެންޑް އޭވިއޭޝަނާ ދަރަވަންދޫ އެއަރޕޯޓު ހިންގުން ހަވާލުކޮށްފައިވަނީ މި އަހަރުގެ އޭޕްރީލް މަހުގެ ތެރޭގައެވެ. މިއީ އެ ކުންފުނީގެ ހިންގުމުގެ ދަށުން އެއަރޕޯޓަށް ގެނެވޭ މުހިންމު ކުރިއެރުމެކެވެ.
މި މަޝްރޫޢުގެ ދަށުން، މިހާރު ހުރި 959 އަކަމީޓަރުގެ ޓަރމިނަލް 1,874 އަކަމީޓަރަށް ބޮޑުކުރެވިގެންދާނެއެވެ. މީގެ ސަބަބުން ގަޑިއިރަކު ޚިދުމަތްދެވޭ މީހުންގެ އަދަދު 80 އިން 175 އަށް އިތުރުވެގެންދާނެކަމަށް އެ ކުންފުނިން ލަފާކުރެއެވެ. އައު ޓަރމިނަލްގައި ޒަމާނީ ޗެކްއިން ކައުންޓަރުތަކާއި، ބެގޭޖް ކޮންވެޔަރ ބެލްޓް ސިސްޓަމެއްގެ އިތުރުން، އެއްފަހަރާ 75 މީހުންނަށް ޚިދުމަތްދެވޭ ފެންވަރުގެ އެގްޒެކެޓިވް ލައުންޖެއް ގާއިމުކުރެވިގެންދާނެއެވެ.
2012 ވަނަ އަހަރު ހުޅުވި ދަރަވަންދޫ އެއަރޕޯޓަކީ ރާއްޖޭގެ އެންމެ ބާރުބޮޑު އެއް އެތެރޭގެ އުދުހުންތަކުގެ މަރުކަޒެވެ. ޔުނެސްކޯ ބަޔޯސްފިއަރ ރިޒަރވްއެއް ކަމުގައިވާ ބާ އަތޮޅުގައި 16 ރިސޯޓާއި 79 އަށްވުރެ ގިނަ ގެސްޓްހައުސް ހިންގަމުންދާއިރު، މިހާތަނަށް އެ އެއަރޕޯޓުން 42,000 އަށްވުރެ ގިނަ ފްލައިޓް ދަތުރުކޮށް، 1.8 މިލިއަން މީހުންނަށް ވަނީ ޚިދުމަތްދީފައެވެ. މީގެ ތެރެއިން 72 އިންސައްތައަކީ ބޭރުގެ ފަތުރުވެރިންނެވެ. މި އެއަރޕޯޓު ތަރައްޤީކުރެވިގެން ދިޔުމާއެކު، އެ ސަރަހައްދުގެ އިޤުތިޞާދަށާއި ފަތުރުވެރިކަމުގެ ސިނާޢަތަށް އިތުރު ކުރިއެރުންތަކެއް ލިބިގެންދާނެއެވެ.
ކިޔުންތެރިންގެ ހިޔާލު