ކުރިއަށް އޮތް އެމްޑީޕީގެ ޗެއާޕާސަން އިންތިޚާބުގައި ވޯޓުލެވޭ މީހުންގެ ވަގުތީ ލިސްޓު އިސްލާހުކުރުމަށްފަހު، ޝަކުވާ ހުށަހެޅުމަށް ތިން ދުވަހުގެ މުއްދަތެއް އެ ޕާޓީން ދީފިއެވެ.
އެމްޑީޕީން ބުނެފައިވާ ގޮތުގައި، ވޯޓުލާ މީހުންގެ ވަގުތީ ލިސްޓު އިސްލާހުކޮށްފައިވަނީ ކުރިން ހުށަހަޅާފައިވާ ޝަކުވާތަކާއި ރީ-ރަޖިސްޓްރީ ކުރުމަށް އެދި ހުށަހެޅި ފޯމުތަކަށް ބިނާކޮށެވެ. އާދީއްތަ ދުވަހު ޝަކުވާ ހުށަހެޅުމަށް ހުޅުވާލާފައިވާއިރު، މިކަމަށް އެންމެ ފަހުގެ ވަގުތެއްގެ ގޮތުގައި ކަނޑައަޅާފައިވަނީ ބުދަ ދުވަހުގެ މެންދުރުފަހު 02:00 އަށެވެ. އަދި މި ވަގުތުގެ ފަހުން އިތުރު އެއްވެސް ޝަކުވާއެއް ބަލައިނުގަންނާނެ ކަމަށް އެ ޕާޓީން ވަނީ ރަސްމީކޮށް އިއުލާނުކޮށްފައެވެ.
މި އިންތިޚާބުގައި މައިގަނޑު ގޮތެއްގައި ތިން ބޭފުޅަކު ވާދަކުރައްވައެވެ. އެއީ ކުރީގެ ރައީސް މުޙައްމަދު ނަޝީދާއި، ގަލޮޅު ދެކުނު ދާއިރާގެ މަޖިލިސް މެންބަރު މީކާއިލް އަޙްމަދު ނަސީމްގެ އިތުރުން އިބްރާހީމް މުޙައްމަދު (ވާޑު) އެވެ. މީގެ ތެރެއިން މި އިންތިޚާބުގައި އެންމެ ބޮޑު ވާދަވެރިކަމެއް އޮތީ ރައީސް ނަޝީދާއި މީކާއިލްއާ ދެމެދުގައެވެ.
2028 ވަނަ އަހަރުގެ ރިޔާސީ އިންތިޚާބުގައި އެމްޑީޕީގެ ޓިކެޓު ފައްޔާޒް އިސްމާއީލަށް ދެއްވުމަށް ތާއީދުކުރައްވާ ކަމަށް ނަޝީދު ވިދާޅުވެފައިވާއިރު، ރާއްޖޭގެ ވެރިކަމުގެ ނިޒާމަށް ބޮޑެތި ބަދަލުތަކެއް ގެންނަވާނެ ކަމަށް އެމަނިކުފާނު ވަނީ ވައުދުވެވަޑައިގެންފައެވެ. އަނެއްކޮޅުން މީކާއިލް ވައުދުވެވަޑައިގަންނަވަނީ ޕާޓީގެ އެތެރޭގެ ބައިބައިވުންތައް ނައްތާލައި، ކުރިއަށް އޮތް ރިޔާސީ ޕްރައިމަރީގައި ވަކި ފަރާތަކަށް ނުޖެހި ހުންނެވުމަށެވެ.
އެމްޑީޕީގެ އެތެރޭގެ ވާދަވެރިކަން ވަރަށް ބޮޑަށް އިތުރުވެފައިވާ މި ދަނޑިވަޅުގައި، ޗެއާޕާސަން ހޮވުމަށް ބާއްވާ މުހިންމު އިންތިޚާބުގެ ވޯޓުލުން އޮންނާނީ ޖޫން 12 ވަނަ ދުވަހުއެވެ. މިއީ އެ ޕާޓީގެ މުސްތަގުބަލާއި ސިޔާސީ މިސްރާބު ކަނޑައެޅުމުގައި ވަރަށް މުހިންމު ދައުރެއް އަދާކުރާނެ އިންތިޚާބެކެވެ.
ކިޔުންތެރިންގެ ހިޔާލު