ސައުދީ އަރަބިއްޔާގެ މައްކާގައި ބާއްވާ 46 ވަނަ ކިންގް އަބްދުލްއަޒީޒް ބައިނަލްއަގުވާމީ ގުރުއާން މުބާރާތުގައި ދިވެހިރާއްޖެ ތަމްސީލުކުރުމަށް ބައިވެރިން ހޯދުމަށް ކީރި ގުރުއާނާ ބެހޭ ގައުމީ މަރުކަޒުން މިއަދު އިއުލާނުކޮށްފިއެވެ.
މި މުބާރާތުގައި ބައިވެރިވުމަށް ޝައުގުވެރިވާ ފަރާތްތަކުން އަންނަ މަހުގެ 3 ވަނަ ދުވަހުގެ ނިޔަލަށް ފޯމު ހުށަހެޅުމުގެ ފުރުސަތު ވަނީ ހުޅުވާލާފައެވެ.
މި މުބާރާތުގައި ރާއްޖެއިން ބައިވެރިވުމަށް ހަމަޖެހިފައިވަނީ ހިތުން ކިޔުމުގެ ބަޔާއި ބަލައިގެން ކިޔުމުގެ ބަޔަކުންނެވެ. ކޮންމެ ބަޔަކުން އަންހެން އަދި ފިރިހެން ބައިވެރިއަކު ހޮވުމަށް ހަމަޖެހިފައިވާއިރު، މުބާރާތުގައި ބައިވެރިވެވޭ މައިގަނޑު ދެ ކެޓަގަރީއެއް ކަނޑައަޅާފައިވެއެވެ. އެއީ ތަޖުވީދުގެ ހަމަތަކާއެކު މުޅި ގުރުއާން އެއްކޮށް ހިތުން ކިޔަވަން އެނގޭ، ހިފްޒުކުރުމުގެ ސަނަދު އޮންނަ ފަރާތްތަކަށް ހާއްސަ މުޅި ގުރުއާން ހިތުދަސްކުރުމުގެ ބަޔާއި، ގުރުއާނުގެ ވިދިވިދިގެންވާ 15 ފޮތް ތަރުތީބުން ތަޖުވީދުގެ ހުކުމްތަކާއެކު ހިތުން ކިޔަވަން އެނގޭ ފަރާތްތަކަށް ހާއްސަ ކެޓަގަރީއެވެ.
މި މުބާރާތުގައި ބައިވެރިވުމުގެ ޝަރުތުތަކުގެ ތެރޭގައި، ދިވެހި ރައްޔިތަކަށް ވުމާއެކު އުމުރުން 25 އަހަރު ނުފުރޭ ފަރާތަކަށް ވުން ހިމެނެއެވެ. އަދި މީގެ ކުރިން މި މުބާރާތުގައި ބައިވެރިވެފައިވާ ފަރާތަކަށް ނުވުންވެސް ޝަރުތުތަކުގެ ތެރޭގައި ހިމެނެއެވެ. ކީރި ގުރުއާނާ ބެހޭ ގައުމީ މަރުކަޒުން ހާމަކޮށްފައިވާ ގޮތުގައި، ރާއްޖެ ތަމްސީލުކުރާނެ ބައިވެރިން ކަނޑައަޅާނީ ކުރިމަތިލާ ފަރާތްތަކުގެ މެދުގައި ބާއްވާ ހާއްސަ އިމްތިހާނަކަށް ފަހުގައެވެ.
މި މުބާރާތަށް ހޮވޭ ފަރާތަކީ ހާއްސަ އެހީއަށް ބޭނުންވާ މީހެއް ނުވަތަ 17 އަހަރުން ދަށުގެ ކުއްޖެއް ކަމުގައިވާނަމަ، އެ ފަރާތެއްގެ ބެލެނިވެރިއަކު ދިއުމުގެ ހުރިހާ އިންތިޒާމެއް މުބާރާތް އިންތިޒާމުކުރާ ފަރާތުން ހަމަޖައްސައިދޭނެކަމަށް ގައުމީ މަރުކަޒުން ވަނީ ބުނެފައެވެ.
ކިޔުންތެރިންގެ ހިޔާލު