އެމެރިކާގެ ސްޓޭޓް ޑިޕާޓްމަންޓުގެ އިސް އޮފިޝަލެއް ކަމަށްވާ ނިކޮލް ޗުލިކް ތިލަފުއްޓަށް ވަޑައިގެން، މާލޭ ވިޔަފާރި ބަނދަރު ތިލަފުއްޓަށް ބަދަލުކުރުމުގެ މަޝްރޫއުގެ މަސައްކަތްތައް ބައްލަވާލައްވައި، އެމެރިކާގެ ފަރާތުން އެހީތެރިކަން ފޯރުކޮށްދެވޭނެ ދާއިރާތަކާ ގުޅޭގޮތުން މަޝްވަރާކުރައްވައިފިއެވެ.
އެމެރިކާގެ އެމްބަސީން ހާމަކުރި ގޮތުގައި، އެމެރިކާގެ ސްޓޭޓް ޑިޕާޓްމަންޓުގެ ބިއުރޯ އޮފް ސައުތު އެންޑް ސެންޓްރަލް އޭޝިއާގެ ޕްރިންސިޕަލް ޑެޕިއުޓީ އެސިސްޓެންޓް ސެކްރެޓަރީ ނިކޮލް ޗުލިކް ރާއްޖެއަށް ކުރެއްވި ދަތުރުފުޅުގައި ތިލަފުއްޓަށް ވަޑައިގެން، އެ ސަރަހައްދުގައި ކުރިއަށްދާ މަސައްކަތްތައް ބައްލަވާލެއްވިއެވެ. މި ދަތުރުފުޅުގައި އެމްޕީއެލްގެ އިސްވެރިންނާ ބައްދަލުކުރައްވައި، މަޝްރޫއުގެ މިހާރުގެ ހާލަތާއި އެމެރިކާއަށް ފޯރުކޮށްދެވޭނެ އިންފްރާސްޓްރަކްޗާގެ އެހީތެރިކަމާ ގުޅޭގޮތުން މައުލޫމާތު އޮޅުންފިލުއްވިއެވެ.
މާލޭ ވިޔަފާރި ބަނދަރު ތިލަފުއްޓަށް ބަދަލުކުރުމުގެ މަޝްރޫއަކީ މާލޭ ވިޔަފާރި ބަނދަރުގައި ދިމާވާ ޖާގައިގެ ދަތިކަމާއި ތޮއްޖެހުން ކުޑަކުރުމަށް ފަށާފައިވާ މަޝްރޫއެކެވެ. އެމްޕީއެލްގެ ސީނިއާ ބިޒްނަސް ޑިވެލޮޕްމަންޓް މެނޭޖަރު މުހައްމަދު އައިމަން ވިދާޅުވި ގޮތުގައި، މި މަޝްރޫއުގެ މައިގަނޑު މަގުސަދަކީ ވިޔަފާރިތަކަށް ފަސޭހަ ކޮށްދިނުމާއި، ބަނދަރުގެ ހިދުމަތްތައް އަވަސްކުރުމެވެ. ތިލަފުށިން އެމްޕީއެލްއަށް 20 ހެކްޓަރުގެ ބިން މި މަޝްރޫއަށް ހާއްސަކޮށްފައިވެއެވެ.
މި މަޝްރޫއުގެ ފުރަތަމަ ފިޔަވަހި ޗައިނާ ހާބާ އިންޖިނިއަރިން ކޮމްޕެނީއާ ހަވާލުކުރީ ފެބްރުއަރީ 2026 ގައެވެ. މި ކުންފުންޏާ ހަވާލުކޮށްފައިވަނީ 125 މީޓަރުގެ ބާތެއްގެ އިތުރުން މުދާ އުފުލާ އުޅަނދުފަހަރު ބަނދަރުކުރެވޭނެ ސަރަހައްދެއް ތަރައްގީކުރުމަށެވެ. އަދި ބަނދަރުގައި ބޭނުންކުރާނެ ކްރޭން ހަރުކުރުމާއި، މަޝްރޫއަށް ބޭނުންވާ ސާވޭ އާއި ޑިޒައިންގެ މަސައްކަތްތައް ކުރުމަށްވެސް އެ ކުންފުންޏާ ވަނީ ހަވާލުކޮށްފައެވެ.
ކިޔުންތެރިންގެ ހިޔާލު