ވ. އަތޮޅުގައި ޑައިވިނަށް ގޮސް އުޅެނިކޮށް ގެއްލުނު އިޓަލީގެ ޑައިވަރުން ހޯދުމުގެ މަސައްކަތުގައި އެހީތެރިވުމަށް ފިންލޭންޑުގެ ތަޖުރިބާކާރު ތިން ޑައިވަރަކު މިއަދު ރާއްޖެ އަތުވެއްޖެއެވެ.
މި މީހުން ހޯދުމަށް ސިފައިން ކުރަމުންދިޔަ އޮޕަރޭޝަން މިވަގުތަށް މެދުކަނޑާލާފައިވަނީ، އެ މަސައްކަތުގައި އުޅުނު އެމްއެންޑީއެފްގެ ސްޓާފް ސާޖެންޓު މުހައްމަދު މަހުދީ، 44، ޑީކޮމްޕްރެޝަން ސިކްނަސް (ޑީކޯ) ވެގެން އޭޑީކޭ ހޮސްޕިޓަލުގައި ފަރުވާދެމުން ދަނިކޮށް އިއްޔެ ނިޔާވުމާ ގުޅިގެންނެވެ.
ސަރުކާރުގެ އިސްތަރުޖަމާނު މުހައްމަދު ހުސެން ޝަރީފް ވިދާޅުވި ގޮތުގައި، އިޓަލީ ސަރުކާރުގެ ހުށަހެޅުމަކަށް ބޭނުންވާ ސާމާނާއެކު ރާއްޖެ އައި މި ޑައިވަރުންގެ ތެރޭގައި ކޭވް ޑައިވިންއަށް ހާއްސަ މާހިރަކު ވެސް ހިމެނެއެވެ. އިޓަލީގެ ކުންފުންޏެއްގައި މަސައްކަތްކުރާ މި ޓީމުން ކުރިއަށް އޮތް ތަނުގައި ހަރަކާތްތެރިވާނީ އެމްއެންޑީއެފްއާ ގުޅިގެންނެވެ. މީގެ އިތުރުން، މި އޮޕަރޭޝަނަށް އިޓަލީ، އިނގިރޭސިވިލާތް އަދި އޮސްޓްރޭލިއާ ސަރުކާރުން ވެސް ފަންނީ އެހީތެރިކަން ފޯރުކޮށްދޭނެކަމަށް އޭނާ ވަނީ ވިދާޅުވެފައެވެ.
ވ. އަލިމަތާ ކައިރިން އިޓަލީގެ ފަސް ޑައިވަރުން ގެއްލިފައިވަނީ، ރާއްޖޭގެ ޑައިވިން ގަވައިދުގައި ކަނޑައަޅާފައިވާ އެންމެ ފުންމިން ކަމަށްވާ 30 މީޓަރަށްވުރެ މާ ފުނަށް ގޮސް، 60 މީޓަރު އަޑީގައި އޮންނަ ހޮހަޅައަކަށް (ކޭވް އަކަށް) ފީނުމުގެ ތެރޭގައެވެ.
ކިޔުންތެރިންގެ ހިޔާލު